ထိုင်းနိုင်ငံ ရှိ လုပ်ငန်းခွင်အတွင်း အလုပ်လုပ်ကိုင်နေစဉ် စက်ညှပ်သွားရာမှ ခန္ဓာကိုယ်ပွန်းပဲ့ဒဏ်ရာနဲ့ ဦးခေါင်းရေပြား အပြင်းထန်ထိခိုက်ဆုံးရှူံးသွားတဲ့ မြန်မာလုပ်သားအမျိုးသမီး ကို ပကန်စခွန်နှင့် ထိခိုက်နစ်နာကြေးအတွက် ဘတ်ငွေ ၇သိန်းကျော် ရရှိအောင်ကူညီပေးခဲ့တယ်လို့ 𝐌.𝐇.𝐀.𝐂 မဟာမိတ်အဖွဲ့ထိုင်းရောက်မြန်မာလုပ်သားကူညီစောင့်ရှောက်ရေးကော်မတီ မှ သတင်းထုတ်ပြန်ထားပါတယ်။

 

၂၀၂၄ ခုနှစ် ဇူလိုင်လ၂၁ရက်နေ့က စမှုစခွန်ခရိုင် မဟာချိုင် ကထူးပင်ရှိ သံစက်ရုံ တစ်ခု မှာ လုပ်ကိုင်နေတဲ့ အသက်၂၆နှစ်အရွယ် မြန်မာလုပ်သားအမျိုးသမီးငယ်တစ်ဦးဟာ အလုပ်ချိန်အတွင်း စက်ညပ်သွားတာကြောင့် ဦးခေါင်းအရေပြားတစ်ခြမ်း ဆုံးရှုံးကာ ပွန်းပဲ့ဒဏ်ရာ များ ရရှိခဲ့တယ်လို့ သိရပါတယ်။

 

ထိခိုက်ဒဏ်ရာရရှိခဲ့တဲ့ မြန်မာလုပ်သားအမျိုးသမီးရဲ့ နစ်နာမှုအတွက် ကူညီပေး ဖို့ 𝐌.𝐇.𝐀.𝐂 မဟာမိတ်အဖွဲ့ထံ ၂၀၂၄ခုနှစ် နိုဝင်ဘာလ ၁၂ ရက်နေ့ မှာ အကူညီတောင်းခံခဲ့တယ်လို့ ဆိုပါတယ်။

 

အခုလို အကူညီတောင်းခံမှုအပေါ် MHAC မဟာမိတ်အဖွဲ့က သွားရောက်တွေ့ဆုံခဲ့ရာ နစ်နာသူ မြန်မာအလုပ်သမားမှာ နေထိုင်ရေး အခက်ခဲရှိတာကြောင့် ရုံးမှာ ဘဲ တစ်နှစ်ကျော်ကြာ နေထိုင်ခွင့်ပေးခဲ့တယ်လို့ သိရပါတယ်။

 

၂၀၂၅ခုနှစ် အောက်တိုဘာလ၂၈ရက်မှာတော့ 𝐌.𝐇.𝐀.𝐂 မဟာမိတ်အဖွဲ့ရဲ့ ကူညီဆောင်ရွက်ပေးမှု ကြောင့် ထိခိုက်ဒဏ်ရာရရှိခဲ့တဲ့ မြန်မာလုပ်သားအမျိုးသမီး အတွက် ပကန်စခွန်နှင့် ထိခိုက်နစ်နာကြေးအတွက် ဘတ်ငွေ ၇၄၅၀၀၀ ရရှိခဲ့တယ်လို့ သိရပါတယ်။