ထိုင်းနိုင်ငံခိုလမြို့တွင်ရှိသော(အိုင်ဖစ်ရေသန့်စက်ရုံ)နှင့်ချွန်ပူလီခရိုင်စီလာချာမြို့တွင်ရှိသော (ကားဂျိုင့်ပစ္စည်းစက်ရုံ)တွင်လုပ်နေသောမြန်မာလုပ်သားနှစ်ဦးသည် လုပ်ငန်းခွင်ထိခိုက်မှုကြောင့်လက်ပြတ်သွားကြသော်လည်း လုပ်ငန်းရှင်များမှတာဝန်ယူမှုမရှိသဖြင့် လျော်ကြေးငွေရရှိရန် WAG မဟာမိတ်အဖွဲ့သို့အကူအညီတောင်းခံလာကြောင်းသိရပါတယ်။
ထိုင်းနိုင်ငံ၊ ခိုလမြို့တွင်ရှိသော ထိုင်းလုပ်ငန်းရှင်ပိုင် (အိုင်ဖစ်ရေသန့်စက်ရုံ)တွင် အလုပ်လုပ်နေသော မြန်မာ (MOU) အလုပ်သမား မဝင်းဝင်းအေးသည်အဆိုပါစက်ရုံတွင်အလုပ်လုပ်နေသည်မှာတစ်နှစ်ကျော်ရှိပြီဖြစ်ပြီး ဇွန်လ၂ရက်နေ့မွန်းလွဲနှစ်နာရီတွင် ရေသန့်ကိုင်သည့် စက်တွင် ရေဘူးခွံပါသဖြင့် လှမ်းကောက်လိုက်ရာမှ စက်လည်သည်နှင့် ဘယ်ဘက်လက်နှင့်ဆံပင်များညပ်ပါသွားခဲ့ခြင်းဖြစ်ပါတယ်။
အဆိုပါအခင်းဖြစ်ပွားပြီးချင်း ခိုလမြို့ရှိ မဟာလဆေးရုံသို့ ပို့ဆောင် ဆေးကုသမှုခံယူရင်း ညဘက်အချိန်တွင်လက်ကိုတံတောင်ဆစ်အပေါ်မှဖြတ်ပစ်လိုက်ရတာဖြစ်ပါတယ်။
မဟာလဆေးရုံတွင် (၁၅) ရက်ကြာဆေးကုသမှုခံယူပြီးနောက် ဆေးရုံဆင်းချိန်တွင် ဆေးကုသမှုစရိတ်များကို စက်ရုံသူဌေးမှ ကုန်ကျခံရှင်းပေးခဲ့ပြီး နောက်ပိုင်းအလုပ်နားနေချိန်တွင် စက်ရုံမှမည်သည့်ထောက်ပံ့ငွေမှမပေးသည့်အပြင် ဆုံးရှုံးသွားသည့်အပေါ် တာဝန်ယူမှုတာဝန်ခံမှုမရှိကြောင်းသိရပါတယ်။
"ကောင်မလေးက MOU နဲ့တက်လာတာဘဲ။ သူတို့သူဌေးကပကန်ကြေးတွေဖြတ်ထားတယ်။ဒါပေမဲ့ဒီအလုပ်သမားရဲ့ပကန်ကြေးက ရုံးမှာရှိမနေဘူး။ထိုင်းနိုင်ငံမှာဥပဒေတစ်ခုရှိတယ်။လုပ်ငန်းခွင်မှာထိခိုက်နစ်နာသွားပြီ ကိုယ်လက်အစိတ်အပိုင်းဆုံးရှုံးသွားပြီဆိုအမှုတော့ရင်ဆိုင်ရမယ်။သူတို့သူဌေးကပကန်ရုံးကိုလည်းဖြစ်တယ်ဆိုတာဘဲကျန်းထားတာရှိတာ ဖြစ်လာမဲ့စာရွက်စာတမ်းတွေကိုဘာမှမသွင်းထားဘူး"လို့ WAG အလုပ်သမားမဟာမိတ်အဖွဲ့ခေါင်းဆောင်ကိုမုန်တိုင်းကပြောပါတယ်။
ထိုင်းနိုင်ငံ၊ ချွန်ပူလီခရိုင်၊ စီလာချာမြို့တွင်ရှိသော တရုတ်နိုင်ငံသားပိုင် (ကားဂျိုင့်ပစ္စည်းစက်ရုံ)တွင်အလုပ်လုပ်နေနေသောမြန်မာ(PJ)အလုပ်သမားကိုမိုးထက်သာသည်အဆိုပါစက်ရုံမှာအလုပ်လုပ်နေတာတစ်နှစ်ခန့်ရှိပြီဖြစ်ပြီး ဇွန်လ၆ရက်နေ့ညနေ လေးနာရီတွင် လုပ်ငန်းခွင်အတွင်းစက်ချို့ယွင်းမှုဖြစ်ပြီး ညာဘက်လက်ညိုးနှင့်လက်ခလယ်ကို အရင်းမှဖြတ်လိုက်ရပြီးလက်သန်းကြွယ်နှင့်လက်သန်းမှာကွေးသွားခဲ့ခြင်းဖြစ်ပါတယ်။
အဆိုပါလက်ချောင်းများဆုံးရှုံးရသည့်အပေါ် လုပ်ငန်းရှင်ဘက်မှတာဝန်ယူမှုမရှိသောကြောင့် WAG အလုပ်သမားမဟာမိတ်အဖွဲ့သို့အကူအညီတောင်းခံလာခြင်းဖြစ်ကြောင်းသိရပါတယ်။
"ဆေးရုံရဲ့စာရွက်စာတမ်းတွေတောင်းနေပြီ ပြီးရင်ထိုင်းသက်ဆိုင်ရာရုံးတွေကိုလည်းအကြောင်းကြားထားပါတယ်။သူသူဌေးကမြန်မာပြည်သားတွေဖြစ်တော့တစ်လနှစ်လလောက်တော့ထောက်ပံ့ပေးတာပေါ့နောက်ပိုင်းကြဘာမှမကူညီမထောက်ပံတော့ဘူး"လို့ကိုမုန်တိုင်းကပြောပါတယ်။
ထိုင်းရှိမြန်မာရွှေ့ပြောင်းအလုပ်သမားများအနေဖြင့်လုပ်ငန်းခွင်အတွင်းထိခိုက်မှုရှိပါက အလုပ်သမားအရေးကူညီဆောင်ရွက်နေသည့်အဖွဲ့အစည်းများ စကားပြန်များကိုဆက်သွယ်ရန်လိုအပ်ပြီး စက်ရုံမှစေခိုင်းသည့်အတိုင်းဆောင်ရွက်ပြီးလက်မှတ်မထိုးရန်လိုအပ်ကြောင်း ကိုမုန်တိုင်းကပြောပါတယ်။
