ထိုင်းနိုင်ငံ အတွင်း နိုင်ငံခြားသား လုပ်သားတွေကို လုပ်ခွင့်မပြုထားတဲ့ လုပ်ငန်းတွေ မှာ နိုင်ငံခြားသားတွေ လုပ်ကိုင်မှုရှိ မရှိ ကို တနိုင်ငံလုံးအတိုင်းအတာနဲ့ စစ်ဆေးသွားမယ်လို့ အလုပ်အကိုင်ရှာဖွေရေးဌာန (DOE) ညွှန်ကြားရေးမှူးချုပ် မစ္စတာဖိချက် ထောင်ဖန်က အသိပေးပြောကြားလိုက်ပါတယ်။
နိုင်ငံခြားသား လုပ်သားတွေဟာ ကားငှားရမ်းတဲ့လုပ်ငန်း၊ ဈေးဆိုင်များ၊ ခရီးသွားလမ်းညွှန်လုပ်ငန်းနဲ့ အဓိက ခရီးသွားဒေသနဲ့ စီးပွါးရေးဇုန်တွေမှာရှိတဲ့ လုပ်ငန်းတွေ၊ဆံသဆိုင်တွေအပါအဝင် နေရာအမျိုးမျိုးမှာ ထိုင်းနိုင်ငံသားများ နဲ့ တရားမဝင် ယှဉ်ပြိုင် လုပ်ကိုင်တာကြောင့် ဒေသခံ စီးပွားရေး လုပ်ငန်းများ ထိခိုက်စေတယ်လို့ သတင်းထွက်ပေါ်တဲ့အပေါ် အခုလို စစ်ဆေးဖို့ ထုတ်ဖေါ်ပြောတာဖြစ်ကြောင်းသိရပါတယ်။
အလုပ်သမားဝန်ကြီးဌာန အနေနဲ့ သက်ဆိုင်ရာဌာနတွေနဲ့ ပူးပေါင်းပြီး ဘန်ကောက်၊ ဖူးခက်၊ ချင်းမိုင်၊ ကော့စမွေ၊ ပတ္တရား အပါအဝင် နိုင်ငံတစ်ဝန်းလုံး ရှိ လုပ်ငန်းခွင်တွေ ကို တင်းကျပ်စွာ စစ်ဆေးသွားမယ်လို့ သိရပါတယ်။
အလုပ်လုပ်ခွင့် ပါမစ်မရှိဘဲ သို့မဟုတ် လုပ်ပိုင်ခွင့်ကျော်လွန် လုပ်ကိုင်ပါက ဒဏ်ငွေ ဘတ် ၅,၀၀၀ မှ ၅၀,၀၀၀ နဲ့ ဇာတိနိုင်ငံသို့ ပြန်ပို့ခံရမှာဖြစ်ပြီး ၂ နှစ် ကြာ အလုပ်လုပ်ကိုင်ခွင့်ပါမစ် လျှောက်ထားခွင့် ပိတ်ပင်ခံရမှာ ဖြစ်တယ်လို့ အသိပေးထားပါတယ်။
အလုပ်ရှင်တွေ အနေနဲ့ လည်း ပါမစ်မရှိသူကို ငှားရမ်းပါက သို့မဟုတ် လုပ်ပိုင်ခွင့်ကျော်လွန်ခွင့်ပြုပါက ငှါးရမ်းထားတဲ့ နိုင်ငံခြားသားလုပ်သားတစ်ဦးလျှင် ဘတ် ၁၀,၀၀၀ မှ ၁၀၀,၀၀၀ အထိ ဒဏ်ငွေ ချမှတ်ခံရမှာဖြစ်သလို ထပ်မံကျူးလွန်ပါက ထောင်ဒဏ် ၁ နှစ်အထိ သို့မဟုတ် ဘတ် ၅၀,၀၀၀ မှ ၂၀၀,၀၀၀ အထိ ဒဏ်ငွေ ချမှတ်ခံရပြီး ၃ နှစ် ကြာ နိုင်ငံခြားသားအလုပ်သမား ငှားရမ်းခွင့် ပိတ်ပင်ခံရမှာ ဖြစ်တယ်လို့ ဆိုပါတယ်။
ဒါ့အပြင် တရားမဝင် အလုပ်လုပ်ကိုင်နေတဲ့ နိုင်ငံခြားသား လုပ်သားတွေကို တွေ့ရှိပါက ပြည်နယ်တိုင်းရှိ မည်သည့်ပြည်နယ် အလုပ်အကိုင်ရုံးကိုမဆိုတိုင်ကြားနိုင် တယ်လို့ ထိုင်းအလုပ်သမားဝန်ကြီးဌာနက အသိပေးကြေညာထားပါတယ်။
