ပြည်ပနိုင်ငံတွေကို ရွှေ့ပြောင်းလုပ်သားအဖြစ် ထွက်ခွာလုပ်ကိုင်ရာမှာ ယခင်က လူစိတ်ဝင်စားမှုနည်းပါးခဲ့တဲ့ လာအိုနိုင်ငံသို့ အထည်ချုပ်လုပ်ငန်းဖြင့် တရားဝင်လုပ်သား သွားရောက်လုပ်ကိုင်သူ များပြားလာတယ်လို့ သိရပါတယ်။
"ခုကလာအိုကိုစိတ်၀င်စားတာတော့များလာပြီ။ သူများတွေပို့နေကြတယ်။ ကျွန်တော်တော့မပို့ဘူး။ သူကဆင်းရဲတဲ့နိုင်ငံစာရင်း၀င်နေပါသေးတယ်။ ခေါ်တာကတော့ ဟိုဘက်ကပေးခေါ်တာပါပဲ။ ဒါပေမဲ့ဒီဘက်မှာလည်းယူကြတယ်။ zero cost ရယ်လို့ တော့မရှိသေးဘူး။ ဖွံ့ဖြိုးစနိုင်ငံတွေမှာမရှိဘူး။ အများစုကစက်ချုပ်ပဲ။ တစ်နေ့၁၂နာရီ လစာတစ်လ ဒေါ်လာ၂၀၀ ပဲပို့တဲ့သူတွေပို့နေကြပါတယ်။ စက်မချုပ်တတ်ရင်လာအိုသွားလို့မရဘူး။ အိမ်အကူဆိုရင် စင်္ကာပူအကောင်းဆုံးပါပဲ"လို့ ပြည်ပသို့အလုပ်သမားစေလွှတ်နေတဲ့ လုပ်ငန်းရှင်တစ်ဦးကဆိုပါတယ်။
လာအိုနိုင်ငံဟာ ဆင်းရဲတဲ့နိုင်ငံစာရင်း၀င်ပြီး လုပ်ခလစာအလွန်နည်းပါးတဲ့အတွက် ပြည်တွင်းကအလုပ်သမားတွေသွားရောက်လုပ်ကိုင်ဖို့ လူစိတ်ဝင်စားမှုနည်းပါးခဲ့တာဖြစ်ပြီး ယခုအခါ စစ်အာဏာသိမ်းပြီးနောက် တိုင်းပြည်မငြိမ်သက်ခြင်းနဲ့အတူ အလုပ်အကိုင်တွေရှားပါလာခြင်း၊ ကုန်ဈေးနှုန်းအဆမတန်မြင့်တက်လာခြင်းနဲ့ တိုးမြင့်လာခြင်းမရှိတဲ့ လုပ်ခလစာရရှိမှုနဲ့ စား၀တ်နေရေးမလုံလောက်တာတွေကြောင့် ပြည်တွင်းမှာလုပ်ကိုင်ရခြင်းထက် ပြည်ပနိုင်ငံသို့ထွက်ခွာလုပ်ကိုင်မှုတွေပိုမိုမြင့်တက်လာခဲ့တာဖြစ်ပါတယ်။
"ခုက အထည်ချုပ်လုပ်သားတွေကို အဓိကခေါ်တာပဲ။ လာအိုနိုင်ငံကို အထည်ချုပ်အလုပ်နဲ့ သွားကြတာအရင်ကတည်းကပဲ။ စက်မချုပ်တတ်ရင်လာအိုမသွားနဲ့ပဲ အရင်ကတော့ ဒီက တရုတ်ကုမ္ပဏီတွေက လာအိုမှာ စက်ရုံအသစ်လုပ်ရင် နီးစပ်ရာကနေတို့ ရောက်နေတဲ့အလုပ်သမားရဲ့ ဆက်စပ်သူတွေတို့အဲလိုချိတ်ဆက်ခေါ်သွားကြတာ၊ အခုကေတာ့ Demand letterတွေရှိတော့ တရားဝင်စေလွှတ်နေကြတာပါ" လို့ ၎င်းကဆိုပါတယ်။
မြန်မာနိုင်ငံနှင့် အိမ်နီးချင်းဖြစ်တဲ့လာအိုနိုင်ငံသို့ သွားရောက်လုပ်ကိုင်တာတွေဟာ ယခုနှစ်ပိုင်းမှစတင်ကာ အေဂျင်စီများမှတစ်ဆင့် တရားဝင်လုပ်သားစေလွှတ်မှုရှိလာသလို ပုံစံအမျိုးမျိုးနဲ့သွားရောက်လုပ်ကိုင်တာတွေလည်းများပြားလာကာ သွားရောက်လုပ်ကိုင်ရတဲ့ လုပ်ငန်းအမျိုးအစားတွေဟာ စားသောက်ဆိုင်လုပ်ငန်း၊ ဆောက်လုပ်ရေးလုပ်ငန်းနဲ့ ဂိမ်းဆိုင် လုပ်ငန်းများအတွက် လုပ်သားများ ခေါ်ယူနေပြီး စက်ချုပ်လုပ်ငန်းအတွက်ခေါ်ယူမှုအများဆုံးဖြစ်ကာ အခြေခံလစာဒေါ်လာ၂၀၀ ဖြစ်ကာ မြန်မာငွေ၈သိန်းမှ ဆယ်သိန်းအထိသာရရှိတယ်လို့လည်း သိရပါတယ်။
