စစ်မှုထမ်းရန်အတွက်ဆိုကာ ဧရာဝတီတိုင်း လပွတ္တာမြို့မှာ အသက် ၁၈ နှစ်ကနေ ၃၅ နှစ်အ ထိလူငယ်တွေအားလုံးကို ဗလာမပါမဲနှိုက်ခိုင်းပြီး စစ်မှုထမ်းခေါ်ရန်ကြိုးပမ်းတာကို ရပ်ကွက်လူကြီးတွေ ပြုလုပ်နေတယ်လို့ သတင်းရရှိပါတယ်။
အဆိုပါ ဖြစ်စဉ်တွင် အသက်ပြည့်ပြီးသား လူငယ်တွေအားလုံး မဲနှိုက်ရမှာဖြစ်ပြီး မဲနံပတ် အရင်ကျသူက အရင်လိုက်ရန်နှင့် ရပ်ကွက်တခုလျင် တယောက်နှုန်းနဲ့ တစ်လ တကြိမ် ခေါ်ယူသွားမှာဖြစ်ကြောင်း အုပ်ချုပ်ရေးမှူးတွေက အသိပေးလာတယ်လို့ ပြောပါတယ်။
"လပွတ္တာမြို့က စုစုပေါင်း ၁၀ ရပ်ကွက်ရှိတော့ တလကို ၁၀ ယောက်နှုန်းခေါ်မယ်ပြောပါတယ်။ မဲနံပတ်အရင်ကျတဲ့သူက အရင်လိုက်လို့ ပြောတယ်။မဲပေါက်ထားတဲ့လူတွေထဲက နံပတ် ၁ တို့ ၂ တို့ ဆိုမရှိကြတော့ဘူးလို့လည်းကြားတယ်၊ မဲမနှိုက်ခင်အရင်လတွေက လူမခေါ်ရေးအတွက် ယောက်ကျားလေးရှိတဲ့အိမ်က ၁ သိန်း ၈ သောင်းပေးရပြီး ၃ ယောက်ရှိရင် ၃ သိန်းထိပေးရတယ်"လို့ အဲ့ဒီမြို့က ပြည်သူတစ်ဦးကပြောပါတယ်။
လက်ရှိမှာလူငယ်တွေအနေနဲ့ မှတ်ပုံတင် ပြုလုပ်ဖို့ပါ ခက်ခဲနေပြီး ရပ်ကွက်ထောက်ခံစာပါမှ လုပ်ပေးမယ်ဆိုတာကြောင့် ရပ်ကွက်ထောက်ခံစာယူပါကလည်း ရပ်ကွက်အုပ်ချုပ်ရေးမှူးက ထောက်ခံစာမလုပ်ပေးတာကြောင့် အခက်အခဲတွေကြုံနေရတယ်လို့ ပြောပါတယ်။
"နဂိုကလပွတ္တာမြို့ကအေးချမ်းတယ် ကြံ့ခိုင်ရေးထောက်ခံသူများသလို့ မြို့လေးကကျဉ်းတော့ အာဏာရှင်ဆန့်ကျင်ရေးမှာ လူတွေတော်တော်များများပါဝင်ခဲ့ပေမဲ့ မြို့ရဲ့ငွေကြေးပြည့်စုံသူတော်တော်များများက သတင်းပေးဒလန်းတွေများလို့စစ်တပ်ထောက်ခံသူများလို့အားလုံးက ငြိမ်နေခဲ့ရတယ် ခုတော့ ကြံခိုင်ရေးထောက်ခံသူလည်းမရဘူး စစ်တပ်ထောက်ခံသူလည်းမရဘူး အားလုံးရဲ့အိမ်ရှေ့တခါးကိုလာခေါက်နေပြီ"လို့ ပြည်သူတစ်ဦးက ပြောပါတယ်။
