ထိုင်းနိုင်ငံ၊ ချွန်ပူလီခရိုင်၊ ချာချင်ဆောင်၊ နောင်စာတစ် လမ်း(၁)ရှိ မီးကြိုးဟောင်းစက်ရုံက မြန်မာရွှေ့ပြောင်း လုပ်သား ၁၈၀ ဦး ကို လစာနဲ့ နစ်နာကြေးမပေးဘဲ အလုပ်ဖြုတ်တဲ့ စက်ရုံသူဌေးကို မြို့နယ် အလုပ်သမားကာကွယ်စောင့်ရှောက်ရေးရုံး (ဆဝါဒီကန်ရုံး)ကို တိုင်ကြား လိုက်ပြီးနောက် မြန်မာလုပ်သားတွေ အလုပ်ပြန်ဆင်းရတယ်လို့ ၎င်းကိစ္စရပ်ကိုကူညီပေးနေတဲ့ WAG အလုပ် သမား မဟာမိတ်အဖွဲ့ ထံ မှ သိရပါတယ်။

‎စက်ရုံဘက်မှ လာမယ့်ဇွန် လ၂၈ ရက်နေ့မှာ စက်ရုံပိတ်သိမ်းတော့မယ်ဆိုကာ ဇွန်လ ၂၄ရက်က မြန်မာလုပ်သား ၁၈၀ဦး က်ို အလုပ် ဖြုတ်လိုက်တဲ့ အပြင် ကျန်ရှိတဲ့ လုပ်အားခပါမပေးဘဲ စာရွက်စာတမ်း တွေကိုပါ သိမ်းဆည်းခဲ့တာလို့ သိရပါတယ်။

ဒါကြောင့် မြန်မာအလုပ်သမား တွေက WAG အလုပ် သမား မဟာမိတ်အဖွဲ့ထံ အကူအညီတောင်းသဖြင့် WAG အဖွဲ့ က အလုပ်သမားတွေ နဲ့အတူ

 

မြို့နယ် အလုပ်သမားကာကွယ်စောင့်ရှောက်ရေးရုံး ဆဝါဒီကန်ရုံးကို ယနေ့ ဇွန်လ ၂၇ ရက် မနက်က သွားရောက်တိုင်ကြားခဲ့တာဖြစ်ပါတယ်။

တိုင်ကြား လိုက်တဲ့ အတွက် ‎ဆဝါဒီကန်ရုံးကို စက်ရုံသူဌေးမှ လာရောက်ညှိ နှိုင်းပြီးနောက် မြန်မာ အလုပ်သမား တွေ ကို အလုပ်ပြန်ပေး တဲ့ အပြင် အလုပ်ရပ်နားထားတဲ့ ရက်အတွက် လုပ်အားခ အပြည့်ပေးရန် ရက်ကြီးခါကြီးနားရက်အလုပ်ဆင်းပါက လုပ်ခ နှစ်ဆပေးရန်တို့ ကို ပါ ဆဝါဒီကန်ရုံးဝန်ကြီးကိုယ်တိုင် သတ်မှတ်ပေးခဲ့တယ်လို့ သိရပါတယ်။

 

""ကျွန်တော်တို့ တွေ မနက်ဖြန် ၂၈ ရက် မှာ အလုပ်ပြန်ဆင်းရပါပြီ တနင်္ဂနွေ ပိတ်ရက် လုပ်ခ နှစ်ဆ လည်း ပြန်ရပါပြီ အရင်က အပြည့်အဝမရပါဘူး အခု အလုပ်သမားအခွင့်ရေး အပြည့်အဝပြန်ရပါပြီ ကူညီပေးတဲ့ WAG အဖွဲ့ ကိုလည်း အထူးကျေးဇူးတင်ပါတယ်""လို့ မီးကြိုးဟောင်းစက်ရုံကမြန်မာလုပ်သားတစ်ဦးကပြောပါတယ်။

 

ယခု လပိုင်း အတွင်း ထိုင်းနိုင်ငံ ချွန်ပူလီခရိုင် အတွင်းက စက်ရုံ အချို့ရှိ မြန်မာလုပ်သားတွေ ကို ကြိုတင်အကြောင်းမကြားဘဲ အလုပ်ဖြုတ်တာတွေ များနေတယ်လို့ မြန်မာလုပ်သားအရေးကူညီပေးနေသူတွေထံကသိရပါတယ်။