ထိုင်းနိုင်ငံချာချင်ဆောင်မြို့မှာ ရှိတဲ့ သတ္တုရုံ မှာ အလုပ်လုပ်ကိုင်နေတဲ့ ရွှေ့ပြောင်း မြန်မာအလုပ်သမား အမျိုးသမီး ၃ ဦးကို မသင်္ကာမှုနဲ့ စစ်ဆေးဖို့ အတွက် အဝတ်အစားများချွတ်ခိုင်းတဲ့ တရုတ် သူဌေး ကိုမကျေနပ်တဲ့ အတွက် စက်ရုံရှိ မြန်မာအလုပ်သမားတွေက WAG အလုပ်သမားကူညီစောင့်ရှောက်ရေး အဖွဲ့ထံ အကူညီလာရောက်တောင်းခံတယ်လို့ သိရပါတယ်။
ယင်းစက်ရုံ မှာ MOU မြန်မာအလုပ်သမား အမျိုးသား ၄ ဦး အမျိုးသမီး ၂၆ ဦး စုစုပေါင်း ၃၀ ဦးရှိတယ်လို့ ဆိုပါတယ်။
၎င်း အလုပ်သမား ၃၀ ထဲ က အမျိုးသမီး ၃ ဦး ကို မင်္သကာ မှု ဖြင့် စစ်ဆေးရာ မှာ အဝတ်အစားများချွတ်ခိုင်းတဲ့ အတွက် ယင်း အမျိုးသမီး ၃ဦး မှာ ယောက်ျားသားများရှေ့ တွင် မချွတ် နိုင်ကြောင်း ငြင်းဆိုရာ မှ တရုတ်သူဌေး က အဝတ်မချွတ်ပါက ထမင်းမကျွေးဟုဆိုကာ အခန်းတံခါးကို ပိတ်ထားခဲ့တယ်လို့ သိရပါတယ်။
"အခုလို တရုတ်သူဌေး က ပြုလုပ်တဲ့ အတွက် ကျန်ရှိတဲ့ အလုပ်သမား ၂၇ဦး က မကျေမနပ် ဖြစ်ပြီးတော့ ကျွန်တော်တို့ WAG အလုပ်သမားကူညီစောင့်ရှောက်ရေးအဖွဲ့ ကို အကူညီ လာတောင်းတဲ့ အတွက် ချက်ချင်းပဲ သွားပြီး ဖြေရှင်း ပေးခဲ့ပါတယ်။အဲ့စက်ရုံဘက်က တာဝန်ရှိသူတွေနဲ့ တွေဆုံဖြေရှင်း ပြီးတဲ့ အခါ မှာ အလုပ်သမားတွေရဲ့ လိုအပ်ချက်တွေ တောင်းဆိုချက်တွေကို တာဝန်ရှိသူတွေ က လုပ်ပေးမယ်လို့ကတိပေးတယ်" လို့ WAG အလုပ်သမားကူညီစောင့်ရှောက်ရေး အဖွဲ့ တာဝန်ရှိသူတစ်ဦးကပြောပါတယ်။
၎င်း စက်ရုံဟာ တရုတ်နိုင်ငံသားပိုင် သတ္တုစက်ရုံ ဖြစ်ပြီး တန်ဖိုးကြီး လက်ဝတ်ရတနာများ ထုတ်လုပ်တဲ့ စက်ရုံ တစ်ခုဖြစ်တယ်လို့ သိရပါတယ်။သတ္တုအပိုင်းအစတွေ ကို ယင်းစက်ရုံရှိ အလုပ်သမားအချို့က ခိုးယူနေကြတဲ့ အတွက် စက်ရုံတာဝန်ရှိသူတွေ က အလုပ်သမား အားလုံးကို မသင်္ကာမှုနဲ့ စစ်ဆေးနေခြင်းဖြစ်တယ်လို့ သိရပါတယ်။
