ထိုင်းနိုင်ငံမှာ ရွှေ့ပြောင်းလုပ်သားတွေ အပါအဝင် အလုပ်သမားတွေ ရဲ့ မီးဖွားခွင့်ကို ရက် ၉၀ ကနေ ရက်ပေါင်း ၁၂၀ အထိ တိုးမြှင့်ပေးဖို့ စက်တင်ဘာ ၁၅ ရက်မှာ ထိုင်းအထက်လွှတ်တော်က အတည်ပြုလိုက်တယ်လို့ ထိုင်းသတင်းတွေမှာဖေါ်ပြထားပါတယ်။
အလုပ်သမား ကာကွယ်စောင့်ရှောက်ရေး ဥပဒေကြမ်းကို အတည်ပြုလိုက်တာ ဖြစ်ပြီး မီးဖွားခွင့်ကို ရက်ပေါင်း ၁၂၀ အထိ တိုးမြှင့်ပေမယ့် လုပ်ခလစာ အပြည့်ခံစားခွင့်ကိုတော့ ရက် ၆၀ သာ ရရှိမယ်လို့ သိရပါတယ်။
ဒါ့အပြင် မသန်စွမ်းကလေးများအား ပြုစုစောင့်ရှောက်ရန်အတွက် ၁၅ ရက် ဆက်တိုက်ခွင့်ယူနိုင်မှာ ဖြစ်သလို အိမ်ထောင်ဖက် သည်လဲ ၁၅ ရက် ခွင့်ယူနိုင်စေရန် အခွင့်အရေးပေးထားတယ်လို့ ဆိုပါတယ်။
အထက်လွှတ်တော်မှ အဆိုပါ ဥပဒေကြမ်းကို ဝန်ကြီးချုပ်ထံသို့ တင်သွင်းမှာဖြစ်ပြီး၊ ဘုရင်မင်းမြတ်မှ လက်မှတ်ရေးထိုးပြီးနောက် အစိုးရပြန်တမ်းတွင် ထုတ်ပြန်ကြေညာမည်ဖြစ်ကာ ဥပဒေအဖြစ် အကျိုးသက်ရောက်မှာဖြစ်တယ်လို့ သိရပါတယ်။
ယခုဥပဒေ ကို ၂၀၂၅ ခုနှစ်၊ နှစ်ကုန်ပိုင်းမှာ အသက်ဝင်လာမယ်လို့ ခန့်မှန်းရပြီး ဥပဒေအသက်ဝင်လာသည်နှင့် တစ်ပြိုင်နက် ဦးစီးဌာနမှ အလုပ်ရှင်များ၊ အလုပ်သမားများနဲ့ သက်ဆိုင်သူတွေအားလုံးကို ဥပဒေရဲ့ ရည်ရွယ်ချက်ကို သိရှိနားလည်စေရန်အတွက် ရှင်းလင်းချက်များ ထုတ်ပြန်ပြီး အသိပညာပေးမှုတွေပြုလုပ်မယ်လို့သိရပါတယ်။
Ref-The Nation
