ထိုင်းအစိုးရက ပြည်ပ ရွှေ့ပြောင်းလုပ်သားတွေ အတွက်အလုပ်လုပ်ခွင့်အထောက်အထား (ဝေါ့ပါမစ်) ကို ဒီဂျစ်တယ်စနစ်ဖြင့် ပြုလုပ်ပေးမယ်လို့ထိုင်းအလုပ်အကိုင်စီမံခန့်ခွဲရေး ရုံးကကြေညာလိုက်ပါတယ်။

 

၎င်းကိစ္စရပ်နဲ့ ပက်သက်ပြီး အလုပ်အကိုင်စီမံခန့်ခွဲရေးဌာနက ဇူလိုင် ၃၀ ရက် သတင်းစာရှင်းလင်းပွဲ မှာ ပြည်ပရွှေ့ပြောင်းလုပ်သားတွေအတွက် ဝေါ့ပါမစ်နဲ့ပတ်သက်ပြီး ဒစ်ဂျစ်တယ်စနစ်နဲ့ ပြုလုပ်မယ့်အစီစဉ်ကို မိတ်ဆက်ပြသခဲ့ပါတယ်။

 

ထိုင်းနိုင်ငံရှိ နိုင်ငံခြားသား လုပ်သားတွေ အတွက် အလုပ်လုပ်ကိုင်ခွင့် ပါမစ် ဝန်ဆောင်မှု တွေ ကို ခေတ်မှီစေရန်နဲ့ ပိုမိုချောမွေ့လွယ်ကူစေဖို့ ရည်ရွယ်ပြီး လုပ်ဆောင်တာ ဖြစ်တယ်လို့ ဆိုပါတယ်။

 

လာမယ့်စက်တင်ဘာ ၁ ရက် နေ့ကစပြီး လုပ်ဆောင်ပေးမှာ ဖြစ်ကာ ယခုစနစ် မှာ လျှောက်ထားသူတွေအနေနဲ့ အွန်လိုင်းမှ တစ်ဆင့် မှတ်ပုံတင်နိုင်မှာဖြစ်ပြီး အလုပ်လုပ်ခွင့်ပါမစ် လျှောက်လွှာတွေ ကို တစ်ရက်လျှင် ၂၄ နာရီ ပတ်လုံး ပိတ်ရက်မရှိ ပေးပို့နိုင်မှာဖြစ်ပြီး လျှောက်လွှာကြေး ကို အွန်လိုင်းမှ တစ်ဆင့်ပေးဆောင်နိုင်မှာဖြစ်တယ်လို့ သိရပါတယ်။

 

ခွင့်ပြုချက် ရရှိပြီး တဲ့ လျှောက်ထားသူတွေဟာ မိမိတို့နှစ်သက်ရာ ဝန်ဆောင်မှု စင်တာတွေ မှာ ရက်ချိန်းယူပြီး အလုပ်လုပ်ကိုင်ခွင့်ပါမစ်ကို လူကိုယ်တိုင် ထုတ်ယူနိုင်မယ်လို့ ဆိုပါတယ်။

 

လတ်တလောမှာတော့ ထိုင်းနိုင်ငံ တဝန်း အလုပ်လုပ်ခွင့်ပါမစ် ထုတ်ပေးတဲ့ စင်တာတွေ ကို ဘန်ကောက်မြို့တွင် ၇နေရာ၊ အခြားခရိုင်တွေ မှာ ၃၃ နေရာ နဲ့ ရွှေ့ပြောင်းစနစ်နဲ့ လုပ်ဆောင်ပေးတဲ့ဌာန ၈ခုအထိ ဖွင့်လှစ်ပေးမယ်လို့သိရပါတယ်။

ဝေါ့ပါမစ်လျှောက်ထားရာမှာ ယခင်က မကောက်ယူခဲ့တဲ့ အချက်အလက်တွေကိုပါ ကောက်ယူမှာဖြစ်ပြီးဇီဝဗေဒနည်းပညာ အသုံးပြုပြီး ကိုယ်ရေးအချက်အလက် တွေကို စစ်ဆေးခြင်းပြုလုပ်သွားမှာဖြစ်ကြောင်းသိရပါတယ်။

Ref-The Reporters