ထိုင်းနိုင်ငံ စမွတ်စခွန်ခရိုင်၊ မဟာချိုင်က အခက်အခဲကြုံတွေ့နေရတဲ့ မြန်မာ ရွှေ့ပြောင်းအလုပ်သမားတွေ ခိုလှုံနေတဲ့ AAC မဟာမိတ်အဖွဲ့ရုံးကို ပိတ်သိမ်း ပေးဖို့ ထိုင်းအာဏာပိုင်တွေက ဖေဖော်ဝါရီလ ၁၈ ရက်မှာ လာရောက်ပြောဆိုတယ်လို့ AAC မဟာမိတ်အဖွဲ့ထံ မှ  သိရပါတယ်။ 

အဆိုပါ ရုံးမှာ ထိုင်းနိုင်ငံ ကို ရောက်ရှိပြီး အကြောင်း အမျိုးမျိုး နဲ့ အလုပ်သမားအခွင့်ရေးချိုးဖောက်ခံရပြီး နေရေးစားရေး အခက်ခဲ ဖြစ်နေတဲ့ မြန်မာအလုပ်သမား ၁၀၀ ကျော် ခိုလှုံနေထိုင်လျက်ရှိပြီး  အလုပ်သမားအခွင့်ရေးပြန်လည်ရရှိ ဖို့ကိုလည်း  AAC မဟာမိတ်အဖွဲ့မှ ကူညီ ဆောင်ရွက်ပေးနေတယ်လို့ ဆိုပါတယ်။ 

အခုလို ကူညီပေးနေတဲ့   AAC မဟာမိတ်ရုံးဟာ ထိုင်းအစိုးရဆီမှာ တရားဝင် မှတ်ပုံတင်ထားတာမရှိတဲ့ အတွက် ရုံးကိုပိတ်ပေးဖို့နဲ့ စာရွက်စာတမ်းအထောက်အထားရှိတဲ့ အလုပ်သမား ကိုသာ ကူညီဆောင်ရွက်ပေးဖို့ ထိုင်းအာဏာပိုင်တွေက လာရောက် ပြောကြားခဲ့တယ်လို့ AAC မဟာမိတ်အဖွဲ့မှဒါရိုက်တာဦးခိုင်ကြီးကပြောပါတယ်။ 

""တရားဝင်မှတ်ပုံတင်ဖို့က ကျွန်တော်တို့က မြန်မာနိုင်ငံသားတွေဖြစ်နေတော့ လုပ်ရကိုင်ရခက်တာပေါ့ " လို့ သူက ဆိုပါတယ်။ 

ထိုင်းအာဏာပိုင်တွေ အနေနဲ့ ရုံးကိုပိတ်သိမ်းဖို့  လာရောက်ပြောစဉ်မှာလည်း AAC ရုံး အတွင်း ခိုလှုံ နေတဲ့ မြန်မာအလုပ်သမားတွေရဲ့ အထောက်အထားတွေ ကို တောင်းယူစစ်ဆေးခဲ့တယ်လို့ သိရပါတယ်။ 

"စစ်ဆေးပြီးတော့ ဖမ်းဆီးတာမျိုးတော့ မရှိခဲ့ဘူး ဧည့်စာရင်း မတိုင်လို့ဆိုပြီး အလုပ်သမားအချို့ ရဲ့စာရွက်စာတမ်းတွေကိုတော့ သိမ်းသွားတယ်""လို့ ဒါရိုက်တာဦးခိုင်ကြီးကပြောပါတယ်။ 

ဧည့်စာရင်းမတိုင်ဘဲ နေထိုင်သူတွေ  ကို တစ်ဦးလျင် ဘတ် ၄၀၀၀ စီနဲ့ အိမ်ပိုင်ရှင်က ဘတ် ၁၆၀၀ ဒဏ်ကြေး ပေးဆောင်ပြီးမှ စာရွက်စာတမ်းတွေ ပြန်လည်ရရှိမှာဖြစ်တယ်လို့လည်း သိရပါတယ်။ 

ထိုင်းနိုင်ငံရှိ  အလုပ်သမားအခွင့်ရေးချိုးဖောက်ခံနေရတဲ့ မြန်မာအလုပ်သမားတွေကို ခိုလှုံခွင့်ပေးပြီး ကူညီဆောင်ရွက်ပေးနေရာကနေ အခုလို ရုံးပိတ်သိမ်းခံရတဲ့ အတွက် မြန်မာအလုပ်သမားတွေမှာ များစွာ အခက်ခဲ နစ်နာမှုတွေ ဖြစ်လာနိုင်တယ်လို့သိရပါတယ်။