လျှောက်ထားသူများလွန်းတာကြောင့် ရုန်းရင်းဆန်ခတ်ဖြစ်ကာ လျှောက်လွှာရောင်းချမှုရပ်ဆိုင်းခဲ့တဲ့ ဂျပန်ဘာသာ အရည်ချင်းစစ်စာမေးပွဲ လျှောက်လွှာ JLPTရောင်းချမှုကို အွန်လိုင်းစနစ်နဲ့ ပထမဆုံးအကြိမ် ပြန်လည်လက်ခံသွားမယ်လို့ စာမေးပွဲကျင်းပရေးကော်မတီက အသိပေးထုတ်ပြန်လိုက်ပါတယ်။
JLPT စာမေးပွဲဖြေဆိုခွင့်လျှောက်ထားမှုကို ဩဂုတ် ၂၀ ရက်ကစပြီး ၂၆ ရက်အထိ အွန်လိုင်းစနစ်နဲ့ ပြန်လက်ခံသွားမှာဖြစ်ပြီး လျှောက်လွှာစတင်လက်ခံမဲ့ ပထမဆုံးရက်မှာ N-1 အဆင့်ဖြေဆိုခွင့်ကို စတင်လက်ခံသွားမှာလို့ သိရပါတယ်။ အခြားသောအဆင့်ဖြေဆိုခွင့်တွေအတွက် အွန်လိုင်းလျှောက်လွှာလက်ခံမယ့်ရက်ကိုတော့ ဩဂုတ်လ ၁၉ ရက်မှာ ထပ်မံ အသိပေးကြေညာပေးသွားမယ်လို့ အသိပေးလိုက်တာဖြစ်ပါတယ်။
ဒါ့အပြင် JLPT စာမေးပွဲဖြေဆိုခွင့်လျှောက်ထားမှုကို အွန်လိုင်းစနစ်နဲ့ ပထမဆုံးအကြိမ် စတင်လက်ခံတာဖြစ်တဲ့အတွက် လျှောက်ထားသူများပြားရင် နည်းပညာချို့ယွင်းတာမျိုးရှိနိုင်တယ်လို့လည်း အသိပေးထုတ်ပြန်ထားပါတယ်။
ပြီးခဲ့တဲ့ သြဂုတ်၅ရက်နံနက်ပိုင်းက အဆိုပါလျှောက်လွှာရောင်းချခြင်း၀ယ်ယူနိုင်ရန်တန်စီထားတဲ့ လူငယ်များက အရေအတွက်များပြားလွန်းတဲ့အပြင် ရုန်းရင်းဆန်ခတ်ဖြစ်ပွား၍ စာမေးပွဲလျှောက်လွှာများရောင်းချခြင်းရပ်ဆိုင်းကာ စစ်တပ်ကိုခေါ်ယူရှင်းလင်းခဲ့တာကြောင့် လူအများေ၀ဖန်ပြောဆိုမှုတွေနဲ့ တာ၀န်ရှိသူတွေကိုကန့်ကွက်မှုတွေလည်း ရှိခဲ့ပါတယ်။
အဲ့ဒီနောက် လူအများစိတ်၀င်စားခဲ့တဲ့ ဂျပန်ဘာသာအရည်ချင်းစစ်စာမေးပွဲလျှောက်လွှာ(JLPT 2022 ဒီဇင်ဘာအတွက်) လျှောက်လွှာရောင်းချခြင်းနှင့်ပတ်သက်သည့် စာမေးပွဲလျှောက်လွှာ ရောင်းချပြီးသည့်စာရင်းကို JLPT စာမေးပွဲကျင်းပရေးကော်မတီ မြန်မာနိုင်ငံဂျပန်ပြန်ပညာသင်ဟောင်းအသင်း (MAJA)က သြဂုတ်၆ရက်က သတင်းထုတ်ပြန်လိုက်ပါတယ်။
အဆိုပါထုတ်ပြန်ချက်အရ ၂၀၂၂ခုနှစ် ဒီဇင်ဘာလ စာမေးပွဲအတွက် ရောင်းချပြီးသည့် လျှောက်လွှာ အရေအတွက်ဟာ ရန်ကုန်စာဖြေဌာနအတွက် စုစုပေါင်း လက်ခံရောင်းချပြီးသည့် အရေအတွက် ၂၅၈၆၈ ဉီးဖြစ်ပြီး မန္တလေးစာဖြေဌာနအတွက် စုစုပေါင်းရောင်းချပြီးသည့် အရေအတွက် - ၉၅၆ ဉီးတို့ဖြစ်တယ်လို့သိရပါတယ်။
ဒါ့အပြင် ရန်ကုန်စာဖြေဌာန ၂၀၂၂ခုနှစ် ပြီးခဲ့တဲ့ဇူလိုင်လ စာမေးပွဲမှာ Online form တင်ခဲ့ပြီး ဖြေဆိုခွင့်မရခဲ့တဲ့ကျောင်းသားကျောင်းသူများအတွက် ဦးစားပေး လက်ခံထားတဲ့အရေအတွက် N3 Level - ၉၉၉ ဦးနှင့် N4 Level - ၂၀၈၄ ဦးဖြစ်တယ်လို့ ထုတ်ပြန်ချက်အရသိရပါတယ်။
