မန္တလေးတိုင်းဒေသကြီး၊ ရမည်းသင်းမြို့နယ်၊ သပြေပင်ကျေးရွာက ရေကြီးရေလျှံမှုတွေကြောင့် မြေပြိုကျမှု ဖြစ်ကာ သေဆုံးသူဦးရေဒေသခံ ၂၅ဦးနဲ့ရွှေ့ပြောင်းလုပ်သားများ စုစုပေါင်း ၁၀၀ ခန့်ရှိတယ်လို့ ဒေသခံတွေထံကသိရပါတယ်။
"သပြေပင်ကျေးရွာက ၂၅ယောက်။ ကျန်တာက ရွှေ့ပြောင်းလုပ်သားတွေလို့သိရတယ်။ ခန့်မှန်းအားလုံး ၁၀၀ ဝန်းကျင်ရှိနိုင်မယ်။ ၁၀၀ မကျော်ဘူးလို့သိရတယ်။ ကျွန်တော်တို့လှူရင်းလေ့လာခဲ့ရသလောက်ပေါ့။ စာရင်အတိအကျမသိနိုင်ဘူး။ ရွာလုံး ကျွတ်မြေအောက်ရောက်တာလည်းမဟုတ်ဘူး ရွှေ့ပြောင်းလုပ်သားအများဆုံးရှ်ိတဲ့ လုပ်ကွက်မြုပ်တာနဲ့မျောတာတော့ရှိတယ်လို့သိရတယ်" လို့ သပြေပင်ကျေးရွာခေတ္တရောက်ရှိနေသူတစ်ဦးက ဆိုပါတယ်။
သပြေပင်ကျေးရွာမြေပြိုမှုကြောင့် သေဆုံးသူစာရင်းထုတ်ပြန်တာမရှိပေမဲ့ လူ ၈ ယောက်သာ သေဆုံးခဲ့ပြီး ဒဏ်ရာရသူအချို့ ရှိတယ်လို့ စစ်ကောင်စီ သတင်းထုတ်ပြန်ထားပါတယ်။
ဒေသခံတစ်ဦးဖြစ်သူကလည်း " သေဆုံးကများနိုင်တယ်။ အလုပ်သမားကိုကအများကြီးပျောက်နေတာတွေရှ်ိသေးတယ်။ ခုကစာရင်းမငသိရနိုင်သေးတာကြောင့်ပါ။ ၇၀၀ လည်းမရှိသလို ၈ ယောက်ဆိုတာကလည်းမဟုတ်ပါဘူး။ သတင်းက သေဆုံးစာရင်းမသိရသေးဘဲ သတင်အမှားနဲ့ဖုံးနေတာ"လို့ နယ်ခံတစ်ဦးကဆိုပါတယ်။
စက်တင်ဘာ ၁၁ ရက် ၁၂ ရက်နေ့ရဲ့ မိုးရွာသွန်းမှုတွေကြောင့် သပြေပင်ကျေးရွာဟာ တောင်ကျချောင်းရေနဲ့အတူ မြေပြိုကျပြီး လူအယောက် ၇၀၀ လောက် သေဆုံးတယ် ဆိုပြီး သတင်းတွေ ထွက်ပေါ်ခဲ့တာ ဖြစ်ပါတယ်။
ရမည်းသင်းမြို့နယ်၊ မိုးထိမိုးမိရွှေလုပ်ကွက်မှာ ရွှေတူးဖော်ရေးလုပ်ကွက်နှင့် ရွှေတူးဖော်ရေးအလုပ်သမားများနေထိုင်ရာနေရာများဖြစ်ကာ မိုးထိမိုးမိရွှေတူးဖော်ရေးတွင် လုပ်ကွက်ပေါင်း၄၀ နီးပါးရှိတယ်လို့လည်းသိရပါတယ်။
ရမည်းသင်းမြို့နယ်၊ သပြေပင်ကျေးရွာဟာ အိမ်ခြေ ၃၅၀ ကျော်ရှိတဲ့အနက် အမြင့်ပိုင်းက အိမ်ခြေ ၄၀ ကျော်လောက်သာ ကျန်တယ်လို့ သတင်းတွေအရ သိရပါတယ်။
မိုးထိမိုးမိ ရွှေတူးဖော်ရေးလုပ်ကွက်မှာ အလုပ်လုပ်တဲ့ ရွှေ့ပြောင်းအလုပ်သမား မိသားစုတွေ နေကြပြီး ရေမြင့်တက်မှုကြောင့် သပြေပင် ဘုန်းတော်ကြီး ကျောင်းမှာခုံလှုံနေတဲ့သူတွေရှိသလိုရေဘေးရှောင်စခန်းမှာရှိနေကြသူတွေလည်းရှိလို့ သေဆုံးဒေသခံ၂၅ဦးအပြင်အများစုက ရွှေ့ပြောင်းလုပ်သားတွေလို့ မှန်းထားတယ်လို့သိရပါတယ်။
စက်တင်ဘာ ၁၄ ရက်၊ ညပိုင်းထိ စာရင်းတွေအရ နိုင်ငံတစ်ဝန်း ရေကြီးရေလျှံ မြေပြိုမှုတွေကြောင့် ရွှေ့ပြောင်းခဲ့ရ တဲ့ နေအိမ် ၇၂၉၀၀ ကျော်၊ လူဦးရေ ၃၂၀၀၀၀ ကျော် ရှိပြီး သေဆုံးသူ ၁၁၃ ယောက်၊ ပျောက်ဆုံးသူ ၆၄ ယောက်၊ ဒဏ်ရာရရှိသူ ၁၄ ယောက် ရှိခဲ့တယ်လို့လည်း ဗိုလ်ချုပ် ဇော်မင်းထွန်းက စစ်ကောင်စီလက်အောက်ခံမီဒီယာတွေမှာ ပြောကြားခဲ့တာဖြစ်ပါတယ်။
Photo-ဒေသခံ
