၂၀၂၄ အောက်တိုဘာလအတွင်း ရန်ကုန်မြို့ရှိ မြို့ပြပြောက်ကျားအင်အားစုတွေက စစ်ကောင်စီကို ပုံစံ မျိုးစုံနဲ့ တိုက်ခိုက်မှု ၁၅ ကြိမ်ရှိခဲ့တယ်လို့ Rangoon Scout Network(RSN) က ထုတ်ပြန်ထားပါတယ်။
၂၀၂၁ စစ်တပ်အာဏာ သိမ်းပြီး နောက်ပိုင်း မြို့ပြပြောက်ကျားအင်အားစုတွေက စစ်အုပ်ချုပ်ရေးယန္တရားကို ဆက်လက်အကောင်အထည်ဖော်လျက်ရှိတဲ့ မြို့နယ်အသီးသီးက ပစ်မှတ်တွေကို ရွေးချယ်တိုက်ခိုက်နေတာပါ။
ပြီးခဲ့တဲ့ လထဲမှာတော့ ရွှေပြည်သာမြို့နယ် အမှတ် - ၁၉ ရပ်ကွက်အုပ်ချုပ်ရေးမှူးရုံး၊ မြောက်ဥက္ကလာပမြို့နယ် (ဋ) ရပ်ကွက် အုပ်ချုပ် ရေးမှူးရုံး၊ မြောက်ဥက္ကလာမြို့နယ် ၂ ရပ်ကွက် အုပ်ချုပ်ရေးမှူးရုံး၊ လှည်းကူးမြို့မရဲစခန်း၊ တောင်ဒဂုံမြို့နယ် (၂၆) ရပ်ကွက် အုပ်ချုပ်ရေးမှူးရုံးတို့ကို ဖောက်ခွဲတိုက်ခိုက်ခဲ့တယ်လို့ သိရပါတယ်။
ရန်ကုန် အောင်မင်္ဂလာအဝေးပြေး ကားဝင်းအနီးရှိ စစ်ဘက်ရေးရာလုံခြုံရေးတပ်ဖွဲ့(စရဖ)ဝင်း၊ မှော်ဘီလေတပ် နှင့် ခြေမြန်တပ်ရင်း (ခမရ) -၁၀၆ တပ်ရင်းတို့ကို တိုက်ခိုက်ခဲ့လို့ စစ်ကောင်စီတပ်သားတွေ ထိခိုက်သေဆုံးမှုတွေ ရှိခဲ့တယ်လို့ သိရပါတယ်။
စစ်ကောင်စီတပ်နဲ့ စစ်အုပ်ချုပ်ရေးဒေါက်တိုင်များကို မိုင်းခွဲတိုက်ခိုက်မှု ၁၀ ကြိမ်၊ လက်ပစ်ဗုံးနဲ့ တိုက်ခိုက်မှု လေးကြိမ်၊ လက်နက်အတို၊ ရှော့တိုက်ဒုံး၊ ၄၀ မမ၊ တုတ်/ဓား အသုံးပြုပြီး တစ်ကြိမ်စီ တိုက်ခိုက်ခဲ့တာဖြစ်တယ် လို့ သိရပါတယ်။
အောက်တိုဘာလအတွင်း ရန်ကုန်မြို့ပြပြောက်ကျားတပ်ဖွဲ့ဝင်တွေဟာ ကြည့်မြင်တိုင်၊ တောင်ဒဂုံ၊ ဒဂုံ၊ ဗဟန်း၊ မင်္ဂလာဒုံ၊ မရမ်းကုန်း၊ မြောက်ဥက္ကလာ၊ မှော်ဘီ၊ ရွှေပြည်သာ၊ လှည်းကူး၊ လှိုင်သာယာနှင့် အင်းစိန်စတဲ့ မြို့နယ် တွေမှာ စစ်ဆင်ရေးပြုလုပ်ခဲ့တာလို့ သိရပါတယ်။
