ရန်ကုန်တိုင်းဒေသကြီးအတွင်း မြို့နယ်အများစုတွင် ယခုရက်ပိုင်း မိုးသည်းထန်စွာ ရွာသွန်းမှုများကြောင့် ရပ်ကွက်အချို့ရှိ အနိမ့်ပိုင်းနေရာများ၌ ရေဝင်နစ်မြုပ်မှုများ ဖြစ်ပေါ်ကာ အခက်အခဲဖြစ်နေကြရတယ်လို့သိရပါတယ်။
" ရွှေပြည်သာကအတော်ဆိုးတယ်ကြားရပါတယ်။ လှိုင်သာယာဘက်ရော သမိုင်းဘက်ရောပေါ့။ တောင်ဥက္ကလာဘက်တောင် စာတိုက်လမ်းဆုံ ပဒေသာလမ်းဆုံဆိုရင်ရေတွေ အတော်တက်နေလို့ ကားတောင် လှည့်ပြန်ခဲ့ရတယ်။ CRV, RAV4တို့ SUV တို့လို အလတ်စားလေးတွေပါ သွားဖို့ သိပ်မကောင်းပါဘူး။ ကိုယ်တွေတော့ ကားပြန်လှည့်ပြီး တခြားလမ်းကြောင်းကနေ ပတ်သွားခဲ့လိုက်ရတယ်" လို့ Deliver လုပ်သားတစ်ဦးက ဆိုပါတယ်။
အောက်တိုဘာ ၁၉ ရက်နေ့ညကတည်းက ဆက်တိုက်ရွာသွန်းတဲ့ မိုးကြောင့် အောက်တိုဘာ ၂၁ ရက်မှာ ရန်ကုန်မြို့ရေကြီးရေလျှံမှုတွေစတင်ဖြစ်ပေါ်လာကာ အောင်မဂ်လာအဝေးပြေးကားဝင်း၊
ရွှေပြည်သာ၊ လှိုင်သာယာ၊ မဂ်လာဒုံ၊ မရမ်းကုန်း၊ သမိုင်း၊ ဒဂုံမြို့သစ်မြောက်ပိုင်း၊ အရှေ့ပိုင်းနဲ့ တောင်ပိုင်းအပြင် ဒဂုံဆိပ်ကမ်းမြို့နယ်တို့မှာ နေအိမ်တွေထဲအထိရေလျှံမှုဖြစ်ကာ အခက်အခဲတွေကြုံနေရတယ်လို့ သိရပါတယ်။
" ရွှေပြည်သာကိုသွားတာ ရေကအကုန်ကြီးနေလို့ လှည့်ပြန်ခဲ့ရတယ်။ ပါရမီလမ်းဆိုသစ္စာလမ်းပွိုင့်အထိ ကားတွေသွားမရဘူးရေကြီးနေတာ။ လှိုင်သာယာဘက်ရိုးကြိးမှာ ကျွန်တော့်သူငယ်ချင်းအပြင်ထွက်မရဘူးရေကြီးနေလို့ အိမ်တွေထဲအထိ။ သူအလုပ်အရေးကြီးတာကို ထွက်မရလို့မထွက်ရဘူး" လို့ မြို့ပြနေပြည်သူတစ်ဦးက ဆိုပါတယ်။
ရေကြီးမှုတွေမှာ ရွှေပြည်သာကအဆိုးဆုံးဖြစ်နေပြီး ရေရှောင်ကယ်ထုတ်ရတာတွေ ရေလွတ်ရာကိုပြောင်းရွှေ့ရတာတွေအထိ ရှိနေလို့ပြည်သူ ၇၀၀ လောက်အထိ ကူညီမှူတွေလုပ်နေရတာစားသောက်ရေးအတွက်ပါ အခက်အခဲတွေရှိနေကြတယ်လို့ ပရဟိတအသင်းတွေထံက သိရပါတယ်။
ရွှေပြည်သာမြို့နယ် အမှတ် ၇၊ အမှတ် ၈ ရပ်ကွက်၊ ပုလဲလမ်းတဝိုက်၊ အမှတ် ၁၀ ရပ်ကွက်၊ အမှတ် ၁၂ ရပ်ကွက်၊ အမှတ် တ/၁၅ ရပ်ကွက်နဲ့ ၁၄လမ်းဆုံစတဲ့နေရာတွေမှာ နေအိမ်၊ လိုင်းခန်းများအတွင်းသို့ပါ ရေများဝင်ရောက်လာနေသလို အခြားသောနေရာတော်တော်များများမှာလည်း အိမ်အခန်းထဲထိ ရေတွေရောက်လာလို့ ပစ္စည်းရွှေ့ပြောင်းခြင်းများ ထုပ်ပိုးထားတာတွေ ပြုလုပ်နေရတယ်လို့ သိရပါတယ်။
အဲဒီလို နေအိမ်ထဲသို့ ရေဝင်ရောက်လာမှုများကြောင့် မြို့နယ်နေ ပြည်သူအချို့ နေစရာ အခက်အခဲများ၊ စားစရာ အခက်အခဲများဖြစ်လို့ ပရဟိတအသင်းများ ထမင်းထုပ်များသောက်ရေများ ဝိုင်းဝန်းကူညီပံ့ပိုးနေကြရသလို မြို့နယ်အနှံ့မှာ ယာဥ်ကြောပိတ်ဆို့မှုတွေလည်း ရှ်ိနေတယ်လို့ သိရပါတယ်။
Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
#MyanmarLabourNews
