ရနောင်း-ရန်ကုန် ကုန်ပစ္စည်းတင်သွင်းတင်ပို့မှု ကို ကုန်သေတ္တာစနစ်နဲ့ ဆောင်ရွက်လျက်ရှိရာကနေ အောက်တိုဘာ ၁ ရက် မှ စကာ MACCS စနစ်နဲ့ ပြောင်းလဲဆောင်ရွက်မယ်လို့ အကောက်ခွန်ဦးစီးဌာနက ကြေညာပါတယ်။
ကုန်သွယ်မှုနှင့်ကုန်စည်စီးဆင်းမှု မှန်ကန်မြန်ဆန်စေရေးအတွက် နယ်စပ်ကုန်သွယ်ရေးနည်းလမ်းနဲ့ ရနောင်း - ရန်ကုန် ကို ကုန်သေတ္တာစနစ် အသုံးပြုပြီး ပို့ကုန်သွင်းကုန်လုပ်ငန်း လုပ်ငန်းစဉ် ကို ၂၀၂၄ ခုနှစ် ဇွန်လ မှစတင်ကာ Manual နည်းလမ်းဖြင့် ဆောင်ရွက်ခွင့်ပြုခဲ့တယ်လို့ ဆိုပါတယ်။
ယခုအခါ ရနောင်း-ရန်ကုန် ကုန်သေတ္တာစနစ်ဖြင့် တင်သွင်းတင်ပို့မှု များ အတွက် ကြေညာလွှာ ဖွင့်လှစ်တာကို Manual နည်းလမ်း အစား အောက်တိုဘာ ၁ရက်မှစပြီး MACCSစနစ်နဲ့ ဆောင်ရွက်သွားမယ်လို့ သိရပါတယ်။
ဒါကြောင့် ပို့ကုန်သွင်းကုန် ကြေညာလွှာတင်သွင်းသူတွေဟာ ကြေညာလွှာမှာ မိမိတို့ တင်ပို့တင်သွင်းမှုနဲ့ သက်ဆိုင်တဲ့ မပျက်မကွက်ဖြည့်စွက်ရမယ်လို့ အကောက်ခွန်ဦးစီးဌာနရဲ့ ထုတ်ပြန်ချက်မှာ ဖော်ပြထားပြီး ကြေညာလွှာမှာ Station ၊ Section Mode of Transport နဲ့ Loading /Unloading Location တွေကို အထူးဂရုပြုဖြည့်စွက်ရမယ်လို့ ဆိုပါတယ်။
MACCS စနစ်ဆိုတာမှာ အလိုအလျောက်ကုန်စည်လွှဲပြောင်း သယ်ယူခွင့်ပေးပို့စနစ်ဖြစ်ကာ စာရွက်စာတမ်းဖြင့်ဖြည့်စွက်ရတာတွေကို အွန်လိုင်းနဲ့ အလွယ်တကူ ပြုလုပ်နိုင်အောင် လုပ်ဆောင်ထားခြင်းဖြစ်ပါတယ်။
၎င်းစနစ်အရ သွင်းကုန်ကြေညာလွှာတွေကို အလိုအလျှောက်လက်ခံစိစစ်ပေးပြီး ကျသင့်အခွန်တွေကိုအလိုအလျှောက်တွက်ချက်ကာ ငွေပေးချေမှု လုပ်ငန်းစဉ်ပြီးတာနဲ့ကုန်ပစ္စည်းထုတ်ယူခွင့်ကို စက်ကနေအလိုအလျောက်ပြန်ချပေးတဲ့စနစ်တွေ ပါဝင်တယ်လို့ သိရပါတယ်။
