ထိုင်းနိုင်ငံ နခွန်ရတ်ချာစီးမားပြည်နယ် ပါခ်ချောင်ခရိုင်၊ ချနတ်ခရိုင်ခွဲမှာ ဆောက်လုပ်ဆဲ မြေအောက်ရထားဥမင်လိုဏ်ခေါင်းပြိုကျမှုကြောင့် မြန်မာအလုပ်သမားတစ်ဦးအပါအဝင် ပိတ်မိနေသူ ၃ဦးထဲ မှ မြန်မာအလုပ်သမား၏ ရုပ်အလောင်းကို ယနေ့ဩဂုတ်လ ၂၉ရက်မှာ ရှာဖွေတွေ့ရှိခဲ့တယ်လို့ ထိုင်းသတင်းဌာနတွေရဲ့ဖေါ်ပြချက်အရသိရပါတယ်။
ဩဂုတ်လ ၂၄ ရက် ညပိုင်း လောက်မှာ ပြိုကျခဲ့တာ ဖြစ်ပြီး မြန်မာအလုပ်သမားတစ်ဦးနဲ့တရုတ်နိုင်ငံသား နှစ်ဦးတို့ ပိတ်မိနေခဲ့တာ ဖြစ်ပါတယ်။
ပြိုကျခဲ့တဲ့ နေရာ ကို ၅ရက်တိုင်ရှာဖွေပြီး နောက် မြန်မာအလုပ်သမားရဲ့ ရုပ်အလောင်းကို ယနေ့နေ့လည်မတိုင်ခင်က ကယ်ဆယ်ရေးသမားတွေ ရှာဖွေတွေ့ရှိခဲ့တာ ဖြစ်ပြီး ကျန်၂ဦးကိုတော့ ဆက်လက်ရှာဖွေနေတယ်လို့ ဆိုပါတယ်။
မြန်မာအလုပ်သမား မှာ ထရပ်ကားမောင်းသူဖြစ်ပြီး တရုတ်အလုပ်သမားနှစ်ဦးတွင် တစ်ဦး မှာ ဆောက်လုပ်ရေး လုပ်ငန်းခွင်ကြီးကြပ်ရေးမှုးနဲ့ကျန်တစ်ဦး မှာ ဘက်ဖိုးမောင်းသူ ဖြစ်တယ်လို့ သိရပါတယ်။
သေဆုံးသွားတဲ့ မြန်မာအလုပ်သမားရဲ့ ကျန်ရစ်သူမိသားစု တွေ နဲ့ လည်း အဆက်သွယ်ရရှိထားပြီလို့ သိရပါတယ်။
၎င်းရထားလမ်းစီမံကိန်းဟာ အရှည် ၂၅၁ကီလိုမီတာရှိပြီး ဘန်ကောက်မြို့ကနေ နခွန်ရက်ချာစီးမားပြည်နယ်ကို ဆက်သွယ်ဖို့ ရည်မှန်းထားကာ ၂၀၂၈ခုနှစ် တွင်ပြီးစီးရန်ရည်ရွယ်ထားတယ်လို့ သိရပါတယ်။
