ထိုင်းနိုင်ငံ စက်ရုံ၊ အလုပ်ရုံများရှိ မြန်မာအလုပ်သမား တွေ အနေနဲ့  Passport မှ Passport သို့လည်းကောင်း CI မှ Passport သို့လည်းကောင်း Mobile Team ဖြင့် ဆောင်ရွက်လိုပါက မြန်မာသံရုံး၊ ကောင်စစ်ဌာန ကို  လာရောက်ဆက်သွယ် ဆောင်ရွက်နိုင်တယ်လို့ ဘန်ကောက်ရှိ မြန်မာသံရုံး က နိုဝင်ဘာ ၇ ရက် နေ့မှာ အသိပေးကြေညာထားပါတယ်။

ဒါ့အပြင် CI မှ နိုင်ငံကူး လက်မှတ်သို့ လဲလှယ်လျှောက်ထားလိုသူတွေ အနေ နဲ့  မဟာချိုင်ရှိ သာမန်မြန်မာနိုင်ငံကူးလက်မှတ်ထုတ်ပေးရေးဌာနစိတ် (TDCC) မှာလည်း  သွားရောက်ဆောင်ရွက်နိုင်တယ်လို့ ဆိုပါတယ်။

ပြီးခဲ့တဲ့ နိုဝင်ဘာ ၅ ရက်နေ့က ထိုင်းနိုင်ငံရှိ ရွှေ့ပြောင်းမြန်မာအလုပ်သမားများကိစ္စနှင့် ပတ်သက်ပြီး မြန်မာသံအမတ်ကြီးနဲ့ ထိုင်းနိုင်ငံ၊ အလုပ် အကိုင်ဦးစီးဌာန (DOE) မှ ညွှန်ကြားရေးမှူးချုပ် Mr. Somchai Morakotsriwan ဦးဆောင်တဲ့အဖွဲ့ တို့ တွေ့ဆုံဆွေးနွေးခဲ့ပြီးနောက် အခုလို အသိပေးကြေညာထားတာဖြစ်ပါတယ်။

၎င်း တွေ့ဆုံဆွေးနွေး မှု တွင် ၂၀၂၅ ခုနှစ် ဖေဖေါ်ဝါရီ ၁၃   ရက်နေ့အထိ ထိုင်းနိုင်ငံ၌ ယာယီ နေထိုင်ခွင့်နှင့် အလုပ်လုပ်ကိုင်ခွင့်ပြုထားသည့် နိုင်ငံကူးလက်မှတ်၊ သို့မဟုတ် မည်သူမည်ဝါဖြစ်ကြောင်း သက်သေခံလက်မှတ် (CI) ကိုင်ဆောင်ထားသူများအား ဆက်လက် သက်တမ်းတိုးဆောင်ရွက်မည့်ကိစ္စကို ထည့်သွင်း ညှိနှိုင်းဆွေးနွေးခဲ့တယ်လို့ ကြေညာထားပါတယ်။

ထို့ကြောင့်  ထိုင်းနိုင်ငံအတွင်း ယာယီနေထိုင်အလုပ်လုပ်ကိုင်ခွင့် သက်တမ်း (၂) နှစ်စီ (၂)ကြိမ်ဖြင့်၊ စုစုပေါင်း (၄)နှစ် ခွင့်ပြုသွားမှာဖြစ်ကြောင်း သိရပါတယ်။

ဒါကြောင့် ၂၀၂၅ ခုနှစ် ဖေဖေါ်ဝါရီ ၁၃  ရက်နေ့အထိ ထိုင်းနိုင်ငံ၌ ယာယီနေထိုင်ခွင့်နှင့် အလုပ်လုပ်ကိုင်ခွင့် ရရှိထားတဲ့ ရွှေ့ပြောင်းမြန်မာအလုပ်သမားများအနေနဲ့   နိုင်ငံကူးလက်မှတ် (သို့မဟုတ်) မည်သူမည်ဝါဖြစ်ကြောင်း သက်သေခံလက်မှတ် (CI) သက်တမ်းအနည်းဆုံး (၂) နှစ်ကျော် ကျန်ရှိနေရန်လိုအပ်တဲ့ အတွက်  နိုင်ငံကူးလက်မှတ် သက်တမ်းအနည်းဆုံး (၂) နှစ်ကျော် မကျန်ရှိသူများအနေနဲ့  မြန်မာသံရုံးနှင့် ချင်းမိုင်မြို့ရှိ မြန်မာကောင်စစ်ဝန်ချုပ်ရုံးတို့မှာ  နိုင်ငံကူးလက်မှတ်သက်တမ်းတိုး ထားဖို့  ထပ်မံအသိပေး ထားပါတယ်။