ထိုင်းနိုင်ငံ ဖက်ခ်ျဘူရီခရိုင် ခက်ကွန်း(Cal-Comp) လျှပ်စစ်စက်ရုံရှိ မြန်မာအလုပ်သမား ၁၄၅၀ ဦးကို စက်ရုံဘက်မှ ကြိုတင်အကြောင်းမကြားဘဲ ရုတ်တရက် အလုပ်ထုတ်ခံလိုက်ရတယ်လို့ ကူညီပေးနေတဲ့ အလုပ်သမားအဖွဲ့စည်းတွေထံမှ သိရပါတယ်။

 

ဒီကနေ့ (စက်တင်ဘာ ၃၀) နံနက်ပိုင်းမှာ မြန်မာအလုပ်သမားများ စက်ရုံ သို့ အလုပ်ဝင်ရောက်လာစဉ် စက်ရုံ တာဝန်ရှိသူတွေက စာရွက်မှာ လက်မှတ်ထိုးရန် အပြင်သို့ တန်းစီးခေါ်ထုတ်ခဲ့ပြီး ရုတ်တရက် အလုပ်ထုတ်လိုက်ခြင်းဖြစ်တယ်လို့ နစ်နာသူ အလုပ်သမားတွေကပြောပါတယ်။

 

""သူတို့လက်မှတ်ထိုးခိုင်းတဲ့စာရွက်က ဘာစာရွက်မှန်းသေချာမဖတ်ခိုင်းဘဲ အတင်းလက်မှတ်ထိုးခိုင်းတာ လက်မှတ်ထိုးပြီးမှ အလုပ်ထုတ်တဲ့စာရွက်ဆိုတာသိတာစက်ရုံက အရှုံးပေါ်နေလို့ အလုပ်ထုတ်တာလို့ပြောတယ် ထုတ်ခံရတာလဲ မြန်မာလုပ်သားတွေကြီးဘဲအခုလည်း ကျွန်တော်တို့ကို စက်ရုံအမိုးအောက်လဲမနေခိုင်းဘူး သောက်ရေပေးမသောက်ဘူး အိမ်သာဆိုလည်း မိန်းကလေးတွေကိုပါ ပေးမသုံးတော့ဘဲ စက်ရုံကနေအဓမ္မ ထွက်ခိုင်းနေတာ""လို့အလုပ်သမားတစ်ဦးကပြောပါတယ်။

 

အလုပ်ထုတ်ခံရတဲ့ မြန်မာ လုပ်သားတွေမှာ ယခုစက်ရုံမှာ အလုပ် ဝင်လုပ်ရဖို့ အလုပ်စမတ်ခ တစ်ဦး ကို ဘတ် ၁၉၀၀၀ အထိ ပေးခဲ့ ရပြီး အလုပ်ဝင်ပြီး ၃လ အကြာအခုလို အကြောင်းမဲ့ အလုပ်ထုတ်တာဖြစ်တယ်လို့ အလုပ်သမားတွေကဆိုပါတယ်။

 

အလုပ်ထုတ်ချိန်တွင် စက်ရုံဘက်မှ အောက်တိုဘာ ၁ ရက်အထိ လုပ်ခရှင်းပေးပြီးရုတ်တရက်အလုပ်ထုတ်နစ်နာကြေး ဘတ် ၄၅၆၃ ဘတ်သာ ပေးဆောင်တယ်လို့သိရပါတယ်။

 

အခုလို အကြောင်းမဲ့ အလုပ်ထုတ်ခံရတဲ့ အတွက် မြန်မာအလုပ်သမားတွေ မှာ မကျေနပ်တဲ့ စက်ရုံရှေ့တွင် စုဝေးနေကျ

သည့် အတွက် စက်ရုံဘက်မှ ထိုင်းရဲများခေါ်ကာ စောင့်ကြည့်ခိုင်းထားတယ်လို့ MHAC မဟာမိတ်အဖွဲ့ တာဝန်ခံ ကိုရဲမင်းက လူမှုကွန်ယက်မှတစ်ဆင့် ပြောပါတယ်။

 

""အလုပ်စမတ်ခ တစ်ဦးကို ၁၉၀၀၀ ဘတ် ယူပြီး ၃လ လောက် ခေါ်ခိုင်းလိုက် အလုပ်ဖြုတ်လိုက် ငွေယူလူသစ်သွင်းလိုက် လုပ်နေတဲ့ လူပါးဝတဲ့ ဆပ်ကုမ္ပဏီ တစ်ခုက မြန်မာလုပ်သားတွေ ကို ဒုက္ခပေးနေတာ MHAC မဟာမိတ်အဖွဲ့ မှ ထိုင်းဥပဒေပါအတိုင်း ကူညီပေးဖို့ သွားရောက်နေပါတယ်""လို့ MHAC မဟာမိတ်အဖွဲ့ တာဝန်ခံ ကိုရဲမင်းကပြောပါတယ်။

ပြီးခဲ့တဲ့ ၂၀၂၃ ခုနှစ် ကလည်း မဟာချိုင်ရှိ Cal-Comp လျှပ်စစ် စက်ရုံ မှ MOU စနစ်ဖြင့် ခေါ်ယူထားတဲ့ မြန်မာလုပ်သား ၁၀၀၀ ကျော်ကို ရုတ်တရက်အလုပ်ထုတ်ပယ်ခဲ့တယ်လို့ သိရပါတယ်။