ထိုင်းနိုင်ငံ Pathum Thani ခရိုင်မှာ မြန်မာလုပ်သားတွေ ကို တင်ဆောင်လာတဲ့ယာဉ်တိမ်းမှောက် မှုကြောင့် ၂ ဦးသေဆုံးကာ ၇ ဦး ထိခိုက်ဒဏ်ရာ ရရှိခဲ့တယ်လို့ ထိုင်းသတင်းဌာန တွေရဲ့ ဖေါ်ပြချက်အရသိရပါတယ်။

 

စက်တင်ဘာ၂၂ရက် မနက် ၅နာရီ ၂၀မိနစ်ခန့်မှာ မြန်မာလုပ်သားတွေ စီးနင်းလာတဲ့ အနက်ရောင် Toyota Innova ယာဉ်တစ်စီးဟာ အရှိန်လွန်ကဲပြီး မထိန်းနိုင်ဘဲ လမ်းလယ်ကျွန်းကွန်ကရစ်တုံးပေါ် ကျော်တက်ပြီး တိမ်းမှောက် သွားတယ်လို့ ဆိုပါတယ်။

 

ယာဉ်တိမ်းမှောက်မှုကြောင့်ယာဉ်ပေါ်လိုက်ပါလာတဲ့ ၉ဦး တွင် ယာဉ်မောင်းအမျိုးသားတစ်ဦးနဲ့မြန်မာလုပ်သားအမျိုးသမီးတစ်ဦးတို့သေဆုံး ခဲ့ကာ ကျန်၇ဦးမှာ ဒဏ်ရာရရှိခဲ့တယ်လို့ သိရပါတယ်။

 

ရဲတပ်ဖွဲ့ရဲ့ စုံစမ်းစစ်မေးမှုအရ ယာဉ်မောင်းဟာ မောင်းနှင်လာတဲ့ခရီးလမ်းရှည်ခြင်းနဲ့မီးအလင်းရောင်မရှိတဲ့ အတွက် အိပ်ငိုက်ကာ အခုလို ယာဉ်တိမ်းမှောက်တာဖြစ်တယ်လို့ယူဆကြောင်း၊ယာဉ်ပေါ်လိုက်ပါလာတဲ့ မြန်မာလုပ်သားတွေ မှာလည်း တရားဝင်ခရီးသွားလာခွင့်ဆိုင်ရာ စာရွက်စာတမ်းများ မတွေ့ရှိတဲ့ အတွက် တရားမဝင်နယ်စပ်ဖြတ်ကျော်လာတဲ့ ရွှေ့ပြောင်းလုပ်သားတွေ ဖြစ်နိုင်တယ်လို့ ရဲတပ်ဖွဲ့က ဆိုပါတယ်။

 

သေဆုံးသူ၂ဦးနဲ့ဒဏ်ရာရရှိသူတွေအားလုံးဟာ မြန်မာနိုင်ငံသားတွေ ဖြစ်ပြီး ဒဏ်ရာရရှိသူတွေကို Pathum Thani ဆေးရုံသို့ အမြန်ပို့ဆောင်ကုသပေးလျက်ရှိကာ ထိုင်းနိုင်ငံအတွင်း သို့ တရားမဝင် လာရောက်ခြင်း ဟုတ်မဟုတ်ကို ဆက်လက်စုံစမ်းပြီးဥပဒေအရ ဆောင်ရွက် သွားမယ်လို့ သတင်းမှာဖေါ်ပြထားပါတယ်။

 

Ref-Pathumthani News,Matichon News