စက်တင်ဘာ ၁၆ ရက် က ဖွင့်လှစ်ခဲ့တဲ့ ထိုင်းအစိုးရထီဖွင့်ပွဲမှာ ထိုင်းရောက် မြန်မာရွှေ့ပြောင်းလုပ်သား ဇနီးမောင်နှံနှစ်ဦး ဘတ် ၆ သန်းဆုပေါက် ခဲ့ကာ ကံထူးရှင်ဖြစ်ခဲ့တယ်လို့ ထိုင်းရောက်မြန်မာလုပ်သားကူညီစောင့်ရှောက် ရေးကော်မတီ MHAC ထံမှ သိရပါတယ်။

 

မြန်မာလုပ်သား ဇနီးမောင်နှံနှစ်ဦးဟာ မွန်ပြည်နယ်ကနေ ထိုင်းနိုင်ငံ မှာ အလုပ်လုပ်ကိုင်နေတာ နှစ်၂၀ရှိပြီ ဖြစ်ပြီး လက်ရှိမှာတော့ စာမွတ်ဆာခွန်ခရိုင်၊ မဟာချိုင်ရှိ သံရည်ကြိုစက်ရုံမှာ အလုပ်လုပ်ကိုင်နေတာဖြစ်တယ်လို့ ဆိုပါတယ်။

 

ဆုငွေထုတ်ယူပေး ဖို့ အတွက် ထိုင်းရောက်မြန်မာလုပ်သားအရေးကူညီဆောင်ရွက်ပေးနေတဲ့ အေအေစီရဲမင်း ဦးဆောင်သော M.H.A.C မဟာမိတ်အဖွဲ့ထံကို အကူအညီတောင်းခံလာတဲ့ အတွက် MHAC ရုံးအဖွဲ့က စက်တင်ဘာလ ၁၇ ရက်နေ့မှာဘဲ နေ့ချင်းပြီး ထီဆုငွေများ ထုတ်ယူပေးခဲ့ပြီး ကာယကံရှင် ဇနီးမောင်နှံနှစ်ဦးလက်၀ယ်ပေးအပ်ခဲ့တယ်လို့ သိရပါတယ်။

 

ထိုင်းအစိုးရတရားဝင်ထီ ဖြစ်တာ ကြောင့် ဆုငွေ ဘတ် ၆ သန်း အတွက် ထိုင်းအစိုးရမှ အခွန် ဖြတ်တာ မှာ ယခင် က ဘတ် ၃ သောင်းသာဖြတ်ပေမယ့် ယခုတွင် ထီဆုငွေ အတွက် အခွန် ဘတ် ၆ သောင်း ဖြတ်တယ်လို့ MHAC အဖွဲ့ ထံမှ သိရပါတယ်။

 

M.H.A.C မဟာမိတ်အဖွဲ့ အနေနဲ့ ထိုင်းအစိုးရထီ ဘတ် ၆ သန်းဆုပေါက်တဲ့ ထိုင်းရောက်မြန်မာလုပ်သားများကို ဆုကြေးငွေ ကူညီပြီး အခမဲ့ ထုတ်ယူပေးခဲ့တာဆိုရင် နှစ်စောင်တွဲ ကံထူးရှင် ၇ ဦး အပါအဝင် ကံထူးရှင် စုစုပေါင်း ၅၈ ဦးအထိရှိပြီဖြစ်ကြောင်း သိရပါတယ်။