နိုင်ငံကူးလက်မှတ်ပြုလုပ်ဖို့ အတွက် မြစ်ကြီးနားနဲ့ လားရှိုးတို့ရှိ နိုင်ငံကူးလက်မှတ်ထုတ်ပေးရေးရုံးတို့မှာ လျှောက်ထားရန် ကြိုတင်ရက်ချိန်းရယူထားသူတွေ အနေနဲ့ ရန်ကုန်၊မန္တလေးနဲ့တောင်ကြီး ရုံးတို့မှာ သွားရောက် လုပ်ဆောင်နိုင်တယ်လို့ မြန်မာနိုင်ငံကူးလက်မှတ်ထုတ်ပေးရေးရုံး က ဩဂုတ်လ ၁၃ ရက် မှာ အသိပေးထားပါတယ်။
နိုင်ငံကူးလက်မှတ်ထုတ်ပေးရေးရုံး မြစ်ကြီးနား ရုံးခွဲ မှာ၂၀၂၄ခုနှစ် ဇူလိုင် ၂၂ရက် ကစပြီး appointment date ရယူထားပြီး နိုင်ငံကူးလက်မှတ် လျှောက်ထား သူတွေ ကိုဩဂုတ်လ ၁၃ရက်က စပြီး မန္တလေးရုံးမှာ သွားရောက်ဆောင်ရွက်နိုင်တယ်လို့ သိရပါတယ်။
ဒါ့အပြင် လားရှိုးရုံးခွဲ မှာ ၂၀၂၄ ခုနှစ် ဇူလိုင်လ ၅ရက် နေ့ကစပြီး appointment date ရယူထားပြီး နိုင်ငံကူးလက်မှတ် လျှောက်ထားသူတွေကို ဩဂုတ် ၁၃ရက်ကစပြီး ရန်ကုန်ရုံးနဲ့ တောင်ကြီး ရုံးတို့မှာ ဆောင်ရွက် နိုင်တယ်လို့ ကြေညာထားပါတယ်။
"မြစ်ကြီးနားတို့လားရှိုးတို့ မှာက နယ်မြေအခြေနေကြောင့် သွားလာလို့မရတော့ဘူး နိုင်ငံကူးလက်မှတ်ထုတ်ပေးနိုင်တဲ့ရုံးတွေလည်း အဲ့နေရာ တွေမှာ ပိတ်ထားတဲ့ အတွက် မြစ်ကြီးနား၊ လားရှိုး ရုံးတွေမှာ စာအုပ်လုပ်ဖို့ အွန်လိုင်း ဘိုကင် တင်ထားသူတွေက ရန်ကုန်၊ မန္တလေး၊ တောင်ကြီးရုံးတွေမှာ သွားလုပ်လို့ရတယ်ဆိုပြီး အသိပေးကြေညာတာပါ"လို့ နိုင်ငံကူးလက်မှတ်ထုတ်ပေးရုံးနဲ့နီးစပ်သူတစ်ဦးကပြောပါတယ်။
လက်ရှိမှာ နိုင်ငံကူးလက်မှတ်လျှောက်ထားလိုသူတွေ အနေနဲ့ ရန်ကုန်အပါအဝင် တိုင်းဒေသကြီးနဲ့ပြည်နယ်တွေ မှာ ရှိတဲ့ နိုင်ငံကူးလက်မှတ်ထုတ်ပေးရေးရုံးတွေမှာ လုပ်ဆောင်နိုင်မယ့် နေ့ရက်ကိုအွန်လိုင်းကနေကြိုတင်ဘိုကင်ယူကာ လုပ်ဆောင်ရတာဖြစ်ပါတယ်။
ပြည်တွင်းမှာ နိုင်ငံကူးလက်မှတ်လျှောက်ထားသူများတဲ့ အတွက် နိုင်ငံကူးလက်မှတ်လျှောက်ထားရန်အွန်လိုင်း မှ ကြိုတင်ရက်ချိန်း ယူရာမှာ အနည်းဆုံး ၃လ မှ အများဆုံး ၆ လကျော်ထိ စောင့်ရကာ အမြန်လုပ်ဆောင်လိုသူတွေ ကို ပွဲစားများ မှ နိုင်ငံကူးလက်မှတ်ထုတ်ပေးတဲ့ရုံးမှဝန်ထမ်းတွေနဲ့ ချိတ်ဆက်လုပ်ပေးတာရှိပြီး ငွေကျပ် သိန်း၂၀ ဝန်းကျင်အထိ ပေါက်ဈေးရှိနေတယ်လို့ သိရပါတယ်။
