ထိုင်း-မြန်မာနယ်စပ်၊ မဲဆောက်သို့ အကြောင်းအမျိုးမျိုးနဲ့ တိမ်းရှောင်ရောက်ရှိနေတဲ့ မြန်မာနိုင်ငံသားတွေအတွက် တောင်ကိုရီးယားနိုင်ငံတွင် အလုပ်အကိုင်အခွင့်အလမ်းတွေ ရရှိဖို့ ဆွေးနွေးခဲ့တယ်လို့ အမျိုးသားညီညွတ်ရေးအစိုးရNUGက ဇန်ဝါရီ ၁၆ရက်မှာ ထုတ်ပြန်ကြေညာပါတယ်။

 

မဲဆောက်မြို့ရှိ မြန်မာရွှေ့ပြောင်းနေထိုင်သူတွေအတွက် အလုပ်အကိုင်အခွင့်အလမ်းတွေ ဖန်တီးဖော်ဆောင်ရေး၊ လူသားချင်းစာနာထောက်ထားမှု အကူအညီတွေ ရရှိရေးနဲ့ အဆင်ပြေစွာ ရှင်သန်ရပ်တည်နေထိုင်နိုင်ရေးအတွက် ဒုတိယအကြိမ်မြောက် ဆွေးနွေးပွဲကို The Korea National Assembly ၊ NUG လူမှုရေးရာ၊ အလုပ်သမားနှင့် လူသားချင်းစာနာထောက်ထားမှုဝန်ကြီးဌာန၊ အလုပ်သမားရေးရာ ဦးစီးဌာန၊ ကိုရီးယားနိုင်ငံ NUG ကိုယ်စားလှယ်ရုံး၊ MFDMC တို့ ပူးပေါင်းပြီးဇန်နဝါရီ ၁၄ရက်က မဲဆောက်မြို့မှာ ကျင်းပပြုလုပ်ခဲ့ပါတယ်။

 

ဆွေးနွေးပွဲ မှာ မဲဆောက်ကို အကြောင်းအမျိုးမျိုးနဲ့ ရောက်ရှိနေတဲ့ မြန်မာနိုင်ငံသားတွေ အထူးသဖြင့် လူငယ်တွေကို ကိုရီးယားနိုင်ငံမှာ အလုပ်အကိုင်အခွင့်အလမ်းတွေ ရရှိရေး၊ ထိုင်းနိုင်ငံအတွင်း သင့်တော်တဲ့ အလုပ်အကိုင်အခွင့်အလမ်းများ ဖန်တီးဖော်ဆောင်ပေးနိုင်ရေးနဲ့ လူသားချင်းစာနာထောက်ထားမှုဆိုင်ရာ အကူအညီတွေ ပေးအပ်နိုင်ရေးဆွေးနွေးခဲ့ကြပါတယ်။

 

ဒါ့အပြင် ထိုင်းနိုင်ငံ တာ့ခ်ခရိုင် စီမံအုပ်ချုပ်မှုပုံစံအတိုင်းရွှေ့ပြောင်းနေထိုင်သူတွေ တည်ငြိမ်စွာ နေထိုင်နိုင်ဖို့ အလုပ်အကိုင်အခွင့်အလမ်း ဖန်တီးပေးနိုင်ဖို့ ဆွေးနွေးခဲ့တယ်လို့ သိရပါတယ်။

 

ယခုဆွေးနွေးမှုဟာ ဒုတိယအကြိမ်ဖြစ်ပြီး ပထမအကြိမ် ဆွေးနွေးပွဲကို ၂၀၂၅ ဇန်နဝါရီလမှာ ပြုလုပ်ခဲ့ကာ နေထိုင်အလုပ်လုပ်ကိုင်ခွင့်နဲ့ အထောက်အထားတွေ ရရှိရေးအတွက် တွန်းအားပေးလုပ်ဆောင်နိုင်ခဲ့တယ်လို့ NUGမှ ထုတ်ပြန်ထားပါတယ်။