ထိုင်းနိုင်ငံ တာ့ခ်ခရိုင်၊ မဲဆောက် တွင် ဖေဖေါ်ဝါရီ ၁၁ရက် ဒီကနေမနက်ပိုင်းမှာ ယာဉ်မတော်တဆမှု ဖြစ်ပွား တာကြောင့် ယာဉ်ပေါ်လိုက်လာပါလာတဲ့ မြန်မာနှစ်ဦး သေဆုံးခဲ့တယ်လို့ ထိုင်းဒေသတွင်းသတင်းတွေ အရသိရပါတယ်။
ဘန်ကောက်ကနေ မဲဆောက် သို့ မောင်းနှင်လာတဲ့ အဖြူရောင် တိုယိုတာ ကားငယ်တစ်စီးဟာ မဲဆောက်-တာ့ခ် လမ်းမကြီးပေါ် စာသင်ကျောင်းအနီးမှာ ရပ်ထားတဲ့ ကုန်တင်တွဲကား တစ်စီးကို အရှိန်ပြင်းပြင်းနဲ့ အနောက်မှ ဝင်တိုက်မိပြီး ယာဉ်ပေါ်ပါလာတဲ့ မြန်မာ အမျိုးသားတစ်ဦးနဲ့ အမျိုးသမီး တစ်ဦးတို့ မှာ အခင်းဖြစ်တဲ့နေရာမှာပင် သေဆုံးခဲ့တယ်လို့ သိရပါတယ်။
ယာဉ်အရှေ့ခန်းမှာလိုက်ပါလာတဲ့ အသက် ၄၉ နှစ်အရွယ် ထိုင်းနိုင်ငံသား ကတော့ ကားအပျက်အစီးတွေကြားထဲ ညပ်နေတဲ့အတွက် ကယ်ဆယ်ရေးအဖွဲ့တွေက အချိန်အတော်ကြာ ကယ်ထုတ်ခဲ့ရကာ မဲဆောက်ဆေးရုံကြီးကို ပို့ဆောင်ထားတယ်လို့သိရပါတယ်။
ယာဉ်မတော်တဆမှုကြောင့် NISCO(Thailand)co.,ldဝန်ထမ်းကတ် ကိုင်ဆောင် ထားသူ အသက် ၂၀ အရွယ် မခင်နှင်းဝေ နဲ့ အသက်၂၈နှစ်အရွယ် ကိုမျိုးမင်းဦးတို့သေဆုံးခဲ့ ပြီး ရဲတပ်ဖွဲ့ရဲ့ ကနဦးစုံစမ်းချက်အရ သူတို့ဟာ ဘန်ကောက်ကနေ အလုပ်သမားရေးရာကိစ္စတွေအတွက် မဲဆောက်နယ်စပ်ဂိတ်ကို ဦးတည်လာတာဖြစ်ပြီး ဂိတ်ရောက်ဖို့ ၅ ကီလိုမီတာအလိုမှာ ခုလိုဖြစ်ပွါးခဲ့တာ ဖြစ်တယ်လို့ ဆိုပါတယ်။
လက်ရှိမှာတော့ မဲဆောက်ရဲစခန်းက သက်သေတွေကို ဆက်လက်စစ်ဆေးနေပြီး သေဆုံးသူ မြန်မာနိုင်ငံသား ၂ ဦးရဲ့ မိသားစုဝင်တွေဆီ အကြောင်းကြားဖို့ ချိတ်ဆက်ဆောင်ရွက်နေတယ်လို့ ထိုင်းသတင်းတွေ အရသိရပါတယ်။
Ref-MGR
