ထိုင်းနိုင်ငံ လယောင်မြို့ က ဓါတ်မီး ထုတ်လုပ်တဲ့ စက်ရုံမှာ လုပ်ကိုင်နေတဲ့ မြန်မာလုပ်သား ၁၁ဦးကို မိမိဆန္ဒအရ အလုပ်ထွက်တယ်လို့ လက်မှတ်ထိုး ခိုင်း ကာ နစ်နာကြေး မပေးဘဲ အလုပ်မှ ထုတ်ပယ် လိုက်တယ်လို့ ၎င်း အမှု ကို ကူညီပေးနေတဲ့WAGအလုပ်သမားမဟာမိတ်အဖွဲ့ထံမှ သိရပါတယ်။

 

ပြီးခဲ့တဲ့ ဖေဖေါ်ဝါရီ ၁၀ ရက် က မြန်မာအလုပ်သမားတွေကို အလုပ်ရှင်သူဌေး ဖြစ်သူက ရုံးခန်း ကို ခေါ် ပြီး အလုပ်ရုံမှာ အလုပ်ပါးနေလို့ ဆိုကာ အလုပ်ဖြုတ်ဖို့ အတွက် မိမိသဘောဆန္ဒအရအလုပ်ထွက်တယ်လို့ စာချုပ်ထဲတွင် လက်မှတ်ထိုးခိုင်းကြောင်း သိရပါတယ်။

 

၎င်းလက်မှတ်ထိုး မှသာ ဖေဖေါ်ဝါရီ ၂၀ရက်အထိ အလုပ်ဆင်းရမှာ ဖြစ်ပြီး လက်မှတ်မထိုးပါက အလုပ်ဆင်းစရာ မလိုတော့ဟု အလုပ်ရှင်မှ ပြောဆိုခဲ့တယ်လို့ အလုပ်သမားတွေကပြောပါတယ်။

 

မြန်မာအလုပ်သမားတွေ ဘက်က လည်း လက်မှတ်မထိုးတာကြောင့် အလုပ်မှ ချက်ချင်း အထုတ်ခံရသဖြင့် WAGအလုပ်သမား မဟာမိတ်အဖွဲ့ထံ အကူညီတောင်းခံ ခဲ့တယ်လို့ သိရပါတယ်။

 

လက်ရှိတွင် မြန်မာအလုပ်သမားတွေဟာ အလုပ်ရှင်သူဌေး မှ ထိုက်သင့်တဲ့ နစ်နာကြေးကို မပေးဘဲ အလုပ်ထုတ် တဲ့ အတွက် အလုပ်သစ်ရှာဖွေရန်နဲ့ စားဝတ်နေရေးအတွက် အခက်အခဲကြုံတွေ့နေရတယ်လို့ သိရပါတယ်။

 

WAGအလုပ်သမား မဟာမိတ်အဖွဲ့ အနေနဲ့ လည်း ယခု အမှု ကိစ္စကို ကူညီပေးရန် လက်ခံ ခဲ့ ပြီး မြန်မာအလုပ်သမားတွေရဲ့ နစ်နာမှု အတွက် ထိုက်သင့်တဲ့ နစ်နာကြေးရရှိဖို့ မြို့နယ် ဆဝါဒီကန် ရုံးမှာ အလုပ်သမားတွေနဲ့ အတူ သွားရောက် တိုင်ကြားသွားမယ်လို့ သိရပါတယ်။

 

မြန်မာလုပ်သားတွေဟာ ၎င်းလုပ်စက်ရုံ မှာ အလုပ်လုပ်နေတဲ့ သက်တမ်းမှာ ၁၀လ ဝန်းကျင်ရှိပြီ ဖြစ်တယ်လို့ သိရပါတယ်။