မလေးရှားနိုင်ငံ ဆလန်ဂေါပြည်နယ် ကလန်း မဲရူးဈေးကြီးမှာ မလေးရှားအာဏာပိုင်တွေက အထောက်အထားမဲ့ နိုင်ငံခြားသား လုပ်သား တွေ ကို ဝင်ရောက်စစ်ဆေးဖမ်းဆီး တာမှာ မြန်မာအလုပ်သမား ၅၀၀ကျော် အဖမ်းခံရတယ်လို့ မလေးရှားဒေသတွင်းသတင်းတွေအရ သိရပါတယ်။
ဖေဖေါ်ဝါရီ ၂၂ရက် နံနက်ပိုင်း က ဈေးကြီး အတွင်း ဝင်ရောက် စစ်ဆေးတာမှာ အထောက်အထားမပြည့်စုံတဲ့ နိုင်ငံခြားသား အလုပ်သမား ၆၃၀ကိုဖမ်းဆီးခဲ့တယ်လို့ သိရပါတယ်။
ဖမ်းမိသူတွေ ထဲ မှာ အင်ဒိုနီးရှား၉ဦး၊ ဘင်္ဂလားဒေရှ့် ၈၅ဦး ၊ အိန္ဒိယ ၅ဦး၊ နီပေါ ၁ဦး နဲ့ မြန်မာ အလုပ်သမား ၅၃၀ဦး တို့ ဖမ်းဆီးခံခဲ့ရကာ အများစုမှာ အသက်၁၇နှစ်မှ ၅၇နှစ်ကြား အမျိုးသားတွေ ဖြစ်တယ်လို့ ဆိုပါတယ်။
""ဒီဈေးက အသီးအနှံ သားငါး တွေ ရောင်းတဲ့ဈေး အဲ့မှာ က မြန်မာအလုပ်သမားတွေ အများစု လုပ်ကျတာက ကုန်တင်ကုန်ချ များတယ် တရားမဝင် လာနေလို့ အဖမ်းခံရတယ်ဆိုပေမယ့် မြန်မာနိုင်ငံရဲ့ အခြေနေ ကြောင့် ဒီကို လာနေကြရတာလေ ကိုယ့်နိုင်ငံမှာ အဆင်ပြေနေရင် ဘယ်လာနေမလဲ အခုလို မြန်မာအလုပ်သမား အများကြီး တနေရာထဲ အဖမ်းခံရတာ အတော်လေး စိတ်မကောင်း ဖြစ်မိတယ် မလေးမှာ အော်ပရာစီ ဝင်တာ အခုနှစ်ထဲ အရမ်းကြမ်းလာပြီ မြန်မာတွေ အချင်းချင်းလဲ သတိ ပေးနေကြရတာပဲ တချို့ အနေထိုင် မတတ်တဲ့ မြန်မာလုပ်သားအချို့ကြောင့်လဲ ပတ်ဝန်းကျင်က တိုင်လို့ ဝင်စစ်ဆေးတာတွေ ဖမ်းတာတွေ လည်းရှိတယ် အခုလို အဖမ်းဆီးကြမ်းနေတဲ့အချိန်မြန်မာတွေ အနေထိုင်လေးစည်းကမ်းရှိစေချင်တယ် ""လို့ မလေးရောက် မြန်မာအလုပ်သမားတစ်ဦးကပြောပါတယ်။
ပြီးခဲ့တဲ့ ၂၀၂၄ခုနှစ် ဇွန်လ ၁ ရက်က စပြီး မလေးရှား နိုင်ငံ အတွင်းတရားဝင် နိုင်ငံခြားသားလုပ်သားခေါ်ယူမှု ကို ပိတ်ပင်ခဲ့ ပြီးနောက် ပိုင်းအထောက် အထားမဲ့ နိုင်ငံခြားသား လုပ်သားတွေ ကို ဖမ်းဆီးမှု မှာ အရှိန်မြှင့် လာတယ်လို့ သိရပါတယ်။
အခုလို အဖမ်းဆီး ကြမ်းနေပေမယ့် မြန်မာနိုင်ငံ အတွင်း နိုင်ငံရေး မတည်မငြိမ်မှု နဲ့ စားဝတ်နေရေး အခက်ခဲ တွေ ကြောင့် မြန်မာအလုပ်သမားတွေ အနေနဲ့ ထိုင်းနိုင်ငံကတစ်ဆင့် မလေးရှား နိုင်ငံ ကို တရားမဝင် ဝင်ရောက်တာတွေ ရှိနေပြီး တရားမဝင် နယ်စပ်ဖြတ်ကျော် မှု ကြောင့် ဖမ်းဆီးခံရတာတွေရှိကာ ဖေဖေါ်ဝါရီ ၂၁ရက် ညနေပိုင်း က တင် မြန်မာအလုပ်သမားအမျိုးသား ၁၅ဦး ၊အမျိုးသမီး ၁၃နဲ့ ကလေးငယ်တစ်ဦး တို့ ထိုင်း-မလေးရှား နယ်စပ်မှာ ဖမ်းဆီးခံရတယ်လို့ သိရပါတယ်။
