မလေးရှားနိုင်ငံ၊ Negeri Sembilan ပြည်နယ်၊ Nilai မြို့မှာ မြန်မာနိုင်ငံသား ဖွင့်လှစ်ထားတဲ့ တရားမဝင် KTV ဖျော်ဖြေရေးစင်တာ ကို မလေးအာဏာပိုင်တွေ ဝင်ရောက်စီးနင်းရာ မြန်မာအမျိုးသမီး ၂၁ ဦး ကို ဖမ်းဆီးမိခဲ့တယ်လို့ မလေးရှား လူဝင်မှု ကြီးကြပ်ရေးက သတင်းထုတ်ပြန်ပါတယ်။
စက်တင်ဘာလ ၆ ရက်နေ့ ည ၁၂ နာရီ ၀၁ မိနစ်အချိန်မှာ မလေးရှား အာဏာပိုင်တွေ က အထူးစစ်ဆင်ရေး အဖြစ် KTV ဖျော်ဖြေရေးစင်တာကို ဝင်ရောက်စီးနင်းခဲ့တာ ဖြစ်ပြီး ဦးစီးဆောင်ရွက်နေသူ မြန်မာအမျိုးသမီး ၁ ဦးနဲ့ စားပွဲထိုး အလုပ် လုပ်ကိုင်တယ်လို့ ယူဆရတဲ့ မြန်မာ အမျိုးသမီး ၂၀ ဦးကို ဖမ်းဆီးခဲ့တာ လို့ သိရပါတယ်။
ဖမ်းဆီးခံရသူတွေမှာ အသက်၂၀နှစ်မှ ၄၀ နှစ်ကြားရှိကာ လတ်တလော စစ်ဆေးချက်များအရ မြန်မာအမျိုးသမီး ၈ ဦးမှာ ဗီဇာရက်လွန်နေထိုင်သူတွေ ဖြစ်ပြီး ကျန် မြန်မာအမျိုးသမီး ၁၃ ဦးမှာ တော့ မည်သည့် အထောက်အထောက်မှ မရှိဘဲ နေထိုင်ခြင်းဖြစ်ကြောင်း စိစစ်တွေ့ရှိရတယ်လို့ဆိုပါတယ်။
အဆိုပါ KTV မှာ မြန်မာတွေ အတွက် သီးသန့် ဖွင့်ထားတဲ့ KTV ဖြစ်ပြီး သောကြာ၊ စနေ၊ တနင်္ဂနွေည တွင် သာ ဖွင့်လှစ်ပြီး KTV သို့ လာရောက်သူတွေအနေနဲ့ အရက် မှာယူရန် လိုအပ်ကာ လူ ၁ ဦးလျှင် မလေးရှား ရင်းဂစ် ၁၅၀ မှ ၂၀၀ အထိ ပေးချေကာ စားပွဲထိုး မိန်းကလေး ခေါ်ယူရတယ်လို့ သိရပါတယ်။
KTV စင်တာ ဖွင့်လှစ်ထားသည်မှာ ၃ လကြာ ပြီ ဖြစ်ပြီး မလေးရှား အာဏာပိုင်တွေ ဘက်မှ ဖမ်းဆီးနိုင်ရေး အတွက် နှစ်ပတ်ကြာ စုံစမ်းထောက်လှမ်းခဲ့ရတယ်လို့ ထုတ်ပြန်ထားပါတယ်။
ဖမ်းဆီးခံရတဲ့ မြန်မာနိုင်ငံသားတွေကို Putrajaya လူဝင်မှုကြီးကြပ်ရေးရုံးကိုပို့ဆောင်ထားပြီးဆက်လက်အရေးယူဖို့လုပ်ဆောင်ထားတယ်လို့ ထုတ်ပြန်ထားပါတယ်။
