မလေးရှား နိုင်ငံ ကွာလာလမ်ပူ Setapak မှာ အထောက်အထားမရှိတဲ့ မြန်မာလုပ်သား ၆၉ ဦး ကို စက်တင်ဘာ ၁၁ ရက်မနက်ပိုင်းမှာ မလေးရှား အာဏာပိုင်တွေက ဖမ်းဆီးခဲ့တယ်လို့ မလေးရှားလူဝင်မှုကြီးကြပ်ရေးဌာနရဲ့ ထုတ်ပြန်ချက်အရသိရပါတယ်။
တရားမဝင်နေထိုင်သူတွေများနေကြောင်း တိုင်ကြားမှုအရ Setapak ရှိ အထပ် ၁၉ ပါအဆောက်အဦး ကို အာဏာပိုင်တွေက ဝင်ရောက်စစ်ဆေးတာမှာ အထောက်အထားမရှိတဲ့ နိုင်ငံခြားသားလုပ်သား ၁၂၅ ဦး ကို စစ်ဆေးဖမ်းဆီးခဲ့တယ်လို့ သိရပါတယ်။
ဖမ်းဆီးခံရသူများထဲမှာ အသက် ၁၆ နှစ်မှ ၇၀ နှစ်အတွင်းရှိ အမျိုးသား ၈၁ ဦး၊ အမျိုးသမီး ၄၃ ဦးနှင့် ကလေးတစ်ဦး ပါဝင်ကြောင်း ဖော်ပြထားပြီး ၎င်းတို့ထဲတွင် မြန်မာနိုင်ငံသား ၆၉ ဦး၊ အိန္ဒိယ (၂၅)ဦး၊ ပါကစ္စတန် (၁၄)ဦး၊ အင်ဒိုနီးရှား (၁၂) ဦးနဲ့ ဘင်္ဂလားဒေ့ရှ် (၅)ဦး တို့ပါဝင်တယ်လို့ သိရပါတယ်။
""သိရသလောက်က မလေးနိုင်ငံသားတွေက တိုင်လို့ ဝင်စစ်ဆေး ပြီးဖမ်းတာ သတင်းဖေါ်ပြချက်အရဆိုရင် နိုင်ငံခြားသား လုပ်သားတွေက မူးယစ်သောက်စားတာတွေ မူးယစ်ဆေးသုံးစွဲတာတွေ ကြောင့် မို့ တိုင်ကြားတဲ့အတွက် အော်ပရာစီဝင်တာလို့ သိရတယ် ကိုယ်ကအထောက်ထားမရှိဘူးဆိုရင်လည်း အနေအထိုင်ဆင်ခြင်သင့်တယ်
မလေးမှာ အော်ပရာစီဝင်တာနဲ့ မြန်မာနိုင်ငံသား အဖမ်းခံရတာ အများဆုံးပါနေတယ် သွားလာသတိပြုဆင်ခြင်ဖို့လိုတယ်""လို့မလေးရောက်မြန်မာနိုင်ငံသားတစ်ဦးကပြောပါတယ်။
ယခု စစ်ဆေးဖမ်းဆီးမှုအတွက်အာဏာပိုင်တွေအနေနဲ့ နှစ်ပတ်ကြာ အချိန်ယူခဲ့ ပြီးနေအိမ်အလုံးရေ ၃၈၀ ကို ပိတ်ဆို့ရှာဖွေ ခဲ့တာလို့ မလေးသတင်းမှာဖေါ်ပြထားပါတယ်။
ဖမ်းဆီးခံရသူများသည် တရားဝင်ခရီးသွားစာရွက်စာတမ်း သို့မဟုတ် မှတ်ပုံတင် အစစ်အမှန်မရှိခြင်း သို့မဟုတ် သက်တမ်းကုန်ဆုံးနေခြင်း စတဲ့ အကြောင်းအရင်းတွေ ကြောင့် ဖမ်းဆီးခံရပြီး အဲဒီအမှုများကို ၁၉၅၉/၆၃ အင်မီဂရေးရှင်းဥပဒေ၊ ပုဒ်မ ၆(၁)(c) နှင့် ၁၅(၄) အရ စုံစမ်းစစ်ဆေးမှု လုပ်ဆောင်နေတယ်လို့ ဆိုပါတယ်။
ဖမ်းခံရတဲ့ နိုင်ငံခြားသားလုပ်သားတွေဟာ အိမ်ရာခန်းများကို တစ်လလျင် မလေးငွေ RM700 မှ RM1,200 အထိ ပေးချေငှားရမ်းထားကြောင်းသိရပါတယ်။
အိမ်ပိုင်ရှင်များဟာ မိမိတို့ အိမ်ရာမှာ နေထိုင်နေတဲ့ နိုင်ငံခြားသားများတွင် တရားဝင် စာရွက်စာတမ်းများ ရှိမရှိ စစ်ဆေးပေးရမှာ ဖြစ်ကာ ထိုသို့ မပြုလုပ်ပါက တရားမဝင် နေထိုင်သူများကို လက်ခံထားတဲ့အတွက် ၁၉၅၉/၆၃ အင်မီဂရေးရှင်းဥပဒေ ပုဒ်မ ၅၆(၁)(d) အရ တရားစွဲဆိုခံရနိုင်တယ်လို့ သတိပေးထားကြောင်းသိရပါတယ်။
လက်ရှိမှာ မလေးရှားနိုင်ငံ အတွင်း အဖမ်းဆီးများကြမ်းနေပြီး နေ့စဉ်လိုလိုအထောက်အထားမဲ့ မြန်မာလုပ်သားတွေလည်း ဖမ်းခံရတာတွေ ရှိရာ ယခုလ ၁၀ ရက်အတွင်းမှာတင် မြန်မာလုပ်သား ၃၀၀ နီးပါး ဖမ်းဆီးခံခဲ့ရပါတယ်။
Ref-BERNAMA
