မလေးရှားနိုင်ငံ ဂျိုဟိုးပြည်နယ် ရှိ စက်ရုံ ကို အာဏာပိုင်တွေက ဝင်ရောက်စစ်ဆေးရာ အထောက်အထားမရှိ တဲ့ မြန်မာရွှေ့ပြောင်း လုပ်သား ၃၀၀ခန့် အဖမ်းခံရကြောင်း မလေးရှား လူဝင်မှုကြီးကြပ်ရေးဝန်ကြီးဌာန ရဲ့ ထုတ်ပြန်ချက်အရသိရပါတယ်။
ဒီဇင်ဘာ ၁၆ ရက်က ညပိုင်းမှာ ဂျိုဟိုး ပြည်နယ်ရှိ ကွန်ပျူတာ အစိတ်အပိုင်း တွေ ပြုလုပ်တဲ့ စက်ရုံ တွင် အလုပ်လုပ်ခွင့် လက်မှတ် မပါဘဲ အလုပ်လုပ်နေတဲ့ နိုင်ငံခြား သား အများအပြား ရှိနေကြောင်း သတင်းရရှိတဲ့အတွက် ဝင်ရောက် စစ်ဆေးရာ အထောက်အထားမပြည့်စုံတဲ့ နိုင်ငံခြားသား လုပ်သား ၃၅၆ဦး ကို ဖမ်းဆီးခဲ့တယ် လို့ လူဝင်မှုကြီးကြပ်ရေးဌာနက ထုတ်ပြန်ထားပါတယ်။
အဖမ်းခံရသူ ၃၅၆ဦး တွင် မြန်မာနိုင်ငံသား အမျိုးသား ၂၄၆ဦး၊အမျိုးသမီး ၅၃ ဦး၊ပါကစ္စတန်နိုင်ငံသား၃ ဦး၊ ဘင်္ဂလားဒေ့ရှ် နိုင်ငံသား ၂၆ ဦး၊နီပေါနိုင်ငံသား ၁ ဦး၊ အိန္ဒိယ နိုင်ငံသား ၂၂ ဦး၊ ဖိလစ်ပိုင်နိုင်ငံသား ၁ ဦး၊ နီပေါနိုင်ငံသား ၁ ဦးနှင့် အင်ဒိုနီးရှားနိုင်ငံအမျိုးသမီး ၃ ဦးပါဝင်ကြောင်း သိရပါတယ်။
အဖမ်းခံရသူ တွေ အားလုံး ကို ၁၉၅၆/၆၃ခုနှစ် လူဝင်မှုကြီးကြပ်ရေးအက်ဥပဒေနဲ့ ၁၉၆၃ခုနှစ် လူဝင်မှုကြီးကြပ်ရေးစည်းမျဉ်းတွေအရ အရေးယူသွားမှာဖြစ်ကာ Setia Tropika လူဝင်မှုကြီးကြပ်ရေးဌာန မှာ ထားရှိထားတယ်လို့ သိရပါတယ်။
မလေးရှား နိုင်ငံ အတွင်း မှာ အထောက်အထားမရှိတဲ့ နိုင်ငံခြားသား တွေကို ဖမ်းဆီးမှု ကို နိုင်ငံအနှံ နေ့စဉ် ပြုလုပ်နေပြီး အဖမ်းခံရသူတွေ ထဲမှာ မြန်မာရွှေ့ပြောင်းလုပ်သားတွေ အများဆုံး ဖြစ်နေကာ ဒီဇင်ဘာ ၆ရက်တစ်ရက်ထဲမှာတင် အဖမ်းခံရသူဦးရေ ၆၅၀ခန့်ရှိတဲ့အတွက် ယခုလအတွင်းအထောက်အထားမရှိလို့ အဖမ်းခံရတဲ့ မြန်မာလုပ်သားဦးရေ ၁၀၀၀ကျော် ရှိပြီ ဖြစ်ကြောင်း သိရပါတယ်။
HTH
