ထိုင်းနိုင်ငံကို ဖြတ်သန်းပြီး မလေးရှားနိုင်ငံကိုသွားရောက်ကြတဲ့ အထောက်အထားမဲ့ မြန်မာလုပ်သားတွေ ဖမ်းခံရမှု ဆက်တိုက် ဖြစ်ပေါ်နေတာကို ထိုင်းဒေသတွင်းသတင်းဖော်ပြချက်အရ သိရပါတယ်။
ဇွန်လ ၉ရက် မှာ မလေးရှား ကို သွားရောက်မယ့် မြန်မာလုပ်သား တွေ တင်ဆောင်လာတဲ့ ယာဉ်တစ်စီး တိမ်းမှောက်တာကြောင့် မြန်မာလုပ်သား၇ဦး ထိခိုက်ဒဏ်ရာရပြီး တရားမဝင် ဝင်ရောက်ခဲ့လို အရေးယူခဲ့ရတယ်လို့ ဒေသအာဏာပိုင်တွေက ပြောဆိုပါတယ်။
ဇွန်လ ၁၂ရက်မှာ ထိုင်းနိုင်ငံ ကန်ချနဘူရီ ခရိုင် မှာ မလေးရှားသွားမယ့် မြန်မာလုပ်သား ၂၉ဦး အဖမ်းခံခဲ့ရသလို၊ဇွန်လ ၁၆ ရက်ကလည်း ကန်ချနဘူရီခရိုင် အတွင်းမှာကဒ မလေးရှားသွားမယ့် မြန်မာလုပ်သား ၂၄ဦး ထပ်မံ အဖမ်းခံရတယ်လို ထိုင်းသတင်းတွေ မှာဖေါ်ပြထားပါတယ်။
အဖမ်းခံရတဲ့ မြန်မာနိုင်ငံသားတွေဟာ ထိုင်းနိုင်ငံကို ဖြတ်သန်းပြီး မလေးရှားနိုင်ငံကို သွားရောက်ဖို့ စီစဉ် ခေါ်ဆောင်ပေးသူကို ပွဲစားခဘတ် ၅၀၀၀၀ ကနေ ၇၀၀၀၀ ကျော်အထိ ပေးချေရတယ်လို ဖမ်းခံရတဲ့ မြန်မာလုပ်သားတွေက အာဏာပိုင်တွေကို ပြောကြားထားပါတယ်။
အဖမ်းခံရသူတွေက အမျိုးသား အများဆုံးဖြစ်ပြီး အသက် ၃၅နှစ်အောက် လူငယ်တွေ ဖြစ်တယ်လို သိရပါတယ်။ လက်ရှိ မလေးရှားနိုင်ငံက နိုင်ငံ အတွင်းက စက်ရုံအလုပ်ရုံတွေ အတွက် တရားဝင် နိုင်ငံခြားသား လုပ်သား ခေါ်ယူမှုကို ရပ်ဆိုင်း ထားပါတယ်။
"မလေးရှားက တရားဝင် လမ်းကြောင်း ပိတ်ထားတော့ အောက်လမ်းကနေ နည်းအမျိုးမျိုးနဲ့ လာနေကြတာပဲ ။ မလေးမှာကလည်း အထောက်အထားမဲ့ နိုင်ငံခြားသား လုပ်သား တွေ ကို ဖမ်းဆီးမှုက နေ့တိုင်း ရှိတယ် ။ အထောက်အထားမရှိရင် အလုပ်ရှာ ဖို မလွယ်ဘူး။ ဒီမှာ အရင် ရောက်နေတဲ့ အထောက်အထား မရှိတဲ့သူတွေ တောင် အဖမ်းဆီးကြောင့် အလုပ် ပုံမှန်မဆင်းရတာတွေ အလုပ်ပြုတ်တာတွေ နဲ့ အဆင်မပြေကျဘူး။"လို့ မလေးရှားရောက် မြန်မာလုပ်သားတစ်ဦးကပြောပါတယ်။
ထိုင်းနိုင်ငံ၊ မလေးရှားနိုင်ငံတွေ အတွင်း အဖမ်းခံရတဲ့ မြန်မာလုပ်သားတွေကို သက်ဆိုင်ရာနိုင်ငံ အာဏာပိုင်တွေ က ပြစ်ဒဏ်ချမှတ်ပြီး မြန်မာနိုင်ငံ စစ်ကောင်စီဆီကို ပြန်လည်လွှဲပြောင်းတာတွေ ပြုလုပ်တဲ့အတွက် ပြည်ပရောက် အထောက်အထားမဲ့ မြန်မာလုပ်သားတွေ မှာ အဖမ်းခံ စိုးရိမ်ကြတယ်လို့ သိရပါတယ်။
