မလေးရှားနိုင်ငံမှာ အလုပ်လုပ်ဖို့အတွက် ပွဲစားခဘတ်၅သောင်းကျော်ပေးပြီး လာခဲ့ရတဲ့ မြန်မာလုပ်သား ၂၀ဦးဟာ ထိုင်းနိုင်ငံ ပရာကျွတ်ခီရီခန်ခရိုင် ကလောင်ဝမ်မြို့နယ် ထဲက အုန်းခြံတစ်ခုအတွင်း ပုန်းအောင်းနေစဉ် ထိုင်းအာဏာပိုင်တွေရဲ့ ဖမ်းဆီးခြင်းကို ခံလိုက်ရတယ်လို့ ထိုင်းဒေသတွင်း သတင်းတွေအရ သိရပါတယ်။
၎င်းနေရာရှိ ဒေသခံ တွေက အုန်းခြံ အတွင်း သံသယဖြစ်ဖွယ် လူအုပ်စု တစ်စု တွေ့ရှိတယ်လို့ ထိုင်းအာဏာပိုင်တွေထံ ဇန်နဝါရီ ၆ရက် နေ့မှာသတင်းပေး အကြောင်းကြားတာကြောင့် ထိုင်းစစ်တပ် နဲ့ နယ်ခြားစောင့် ရဲတပ်ဖွဲ့တို့ ပူးပေါင်းပြီး ကလောင်ဝမ် ဒေသက အုန်းခြံတစ်ခုကို ဝင်ရောက် စစ်ဆေးခဲ့ရာ အထောက်အထားမရှိတဲ့ မြန်မာနိုင်ငံသား အမျိုးသား ၁၂ ဦးနဲ့ အမျိုးသမီး ၈ ဦး စုစုပေါင်း ၂၀ ဦး ကို အထုပ်အပိုးတွေနဲ့အတူ ဖမ်းမိခဲ့တယ်လို့ ဆိုပါတယ်။
မြန်မာလုပ်သားတွေဟာ ရန်ကုန်၊ပဲခူးနဲ့ မြ၀တီ မြို့ တို့ကနေ ကန်ချနပူရီခရိုင်၊ ဘုရားသုံးဆူ နယ်စပ်ဂိတ်ကနေတစ်ဆင့် ထိုင်းနိုင်ငံထဲကို ခိုးဝင်လာကြောင်း လမ်းခရီးတွင် ထိုင်းက ပွဲစား က ကုန်တင်ကားအလုံပိတ်ဖြင့် တစ်ဆင့်ပြီးတစ်ဆင့် ခေါ်ယူလာပြီး ရာချ်ပူရီခရိုင် ဝမ်မနောင်းနယ်မြေကို ရောက်ခဲ့ရာ အဲ့ဒီနောက် ကလောင်ဝမ်မြို့နယ် အုန်းခြံ အတွင်း ပွဲစားက ထားခဲ့ပြီး ခေတ္တစောင့်ဆိုင်း ခိုင်းထားစဉ် အခုလို အဖမ်းခံရတာ ဖြစ်ကြောင်း သိရပါတယ်။
အခု လို လာရောက်ဖို့ အလုပ်သမားတစ်ဦးစီဟာ ပွဲစားခအဖြစ် ဘတ် ၅၁,၀၀၀ အထိ ပေးချေခဲ့ရကြောင်း လက်ရှိမှာတော့ အဖမ်းခံရသူအားလုံးကို အထောက်အထားမရှိဘဲ ခိုးဝင်မှုနဲ့ ဖမ်းဆီးထားပြီး ဥပဒေအရ အရေးယူဖို့ ပြင်ဆင်နေသလို၊ ပို့ဆောင်ပေးတဲ့ ပွဲစားကွင်းဆက်တွေကိုလည်း အာဏာပိုင်တွေက ဆက်လက်စုံစမ်းနေတယ်လို့ ထိုင်းသတင်းအရ သိရပါတယ်။
Photo-ข่าวประจวบ
