မလေးရှားနိုင်ငံ တွင် သွားရောက် အလုပ်လုပ်ကိုင်ဖို့ အတွက် ထိုင်းနိုင်ငံ အတွင်း အထောက်အထားမဲ့ နယ်စပ်ဖြတ်ကျော် လာတဲ့ မြန်မာရွှေ့ပြောင်းလုပ်သား ၁၆ ဦး ကို ဖမ်းဆီးခဲ့တယ်လို့ ထိုင်းအမြန်လမ်းရဲတပ်ဖွဲ့က သတင်းထုတ်ပြန်ထားပါတယ်။
နိုဝင်ဘာ ၃ ရက် ချွမ်ဖွန်ပြည်နယ်၊ မောင်းခရိုင်၊ အဝေးပြေးလမ်းမကြီးမှာ ထိုင်း အမြန်လမ်းရဲတပ်ဖွဲ့ မှ ကင်းလှည့်စစ်ဆေးနေစဉ် သံသယဖြစ်ဖွယ် အနက်ရောင်ပစ်ကပ်ကားတစ်စီး ကို စစ်ဆေးတာမှာ ယာဉ်မောင်းဖြစ်သူ မြန်မာနိုင်ငံသား ဝေယံ အသက်(၃၂ နှစ်) နှင့်အတူ မြန်မာရွှေ့ပြောင်းအလုပ်သမား ၁၆ ဦးကို စစ်ဆေးတွေ့ရှိခဲ့တယ်လို့ သိရပါတယ်။
ကနဦး စစ်ဆေးချက်အရ မြန်မာရွှေ့ပြောင်းအလုပ်သမားအားလုံးဟာ အောက်တိုဘာ ၂၆ ရက် က ရတ်တဖမ် အဝေးပြေးလမ်းမကြီးရဲတပ်ဖွဲ့မှ ဖမ်းဆီးခဲ့တဲ့ အဖွဲနှင့် တူညီကြောင်း သိရှိရပြီး ၎င်းတို့ကို တရားမဝင် ဝင်ရောက်လာမှုနဲ့ တရားစွဲဆိုခဲ့ကာ အောက်တိုဘာ ၃၀ ရက် တွင် ကန်ချနဘူရီပြည်နယ်ရှိ ဘုရားသုံးဆူတောင်ကြားမှတစ်ဆင့် မြန်မာနိုင်ငံသို ပြန်လည်ပိုဆောင်ရန် လူဝင်မှုကြီးကြပ်ရေးရဲတပ်ဖွဲ့ထံ လွှဲပြောင်းပေးခဲ့ တယ်လို့ ထိုင်းသတင်းမှာဖေါ်ပြထားပါတယ်။
၎င်းတိုအားလုံးကို ဖမ်းဆီးပြီး သုံးရက်အကြာ မှ မြန်မာဘက်သို ပြည်နှင်ဒဏ် ပေးခဲ့ပေမယ့် မြန်မာပွဲစားတစ်ဦးနဲ့ ထပ်မံဆက်သွယ်ပြီး လုပ်သား တစ်ဦးလျှင် ဘတ် ၂၀,၀၀၀ ကျော် ပေးဆောင်ကာ ထိုင်းနိုင်ငံသို တရားမဝင် ပြန်လည်ဝင်ရောက်လာတာ ဖြစ်တယ်လို့ ဆိုပါတယ်။
မြန်မာနိုင်ငံ အတွင်း မတည်မငြိမ် မှု တွေကြောင့် မလေးရှား တွင် အလုပ်ရှာဖွေရန်ရည်ရွယ်ကာ အခုလို ထပ်မံဝင်ရောက် တာဖြစ်တယ်လို့ မြန်မာလုပ်သားတွေက ထွက်ဆိုပါတယ်။
ဒါ့အပြင် မြန်မာယာဉ်မောင်း ဆိုသူမှာ ယာဉ်းမောင်းခအဖြစ်လုပ်သားတစ်ဦးအတွက် ဘတ် ၁၀၀၀ နှုန်း ရရှိကာ ယခင်က ပရာချွပ်ခီရီခန်ပြည်နယ်မှာ ဆောက်လုပ်ရေးလုပ်သားများအတွက် မြန်မာစကားပြန်အဖြစ် တာဝန်ထမ်းဆောင်ခဲ့ရာ ဝင်ငွေ ရရှိမှု များတာ ကြောင် စမွတ်စခွန်ပြည်နယ်ရှိ သူငယ်ချင်းတစ်ဦးထံမှ ကားငှားကာ ယခုအလုပ်ကို လက်ခံခဲ့တယ်လို့ သတင်းမှာဖေါ်ပြထားပါတယ်။
ဖမ်းဆီးခံရတဲ့ မြန်မာလုပ်သားများ ကို အမြန်လမ်းရဲတပ်ဖွဲမှ လူဝင်မှုကြီးကြပ်ရေးဌာနသို ဥပဒေအရ အရေးယူရန် လွှဲပြောင်းပေးခဲ့ကြောင်း သိရပါတယ်။
