မလေးရှား နိုင်ငံရှိ မြန်မာအပါအဝင် နိုင်ငံခြားသား လုပ်သားတွေ အတွက် အနည်းဆုံး လုပ်ခ လစာ ကို ဩဂုတ်လ ၁ရက်ကစပြီး တစ်လလျင် မလေးရှား ငွေ ရင်းဂစ် ၁၇၀၀ သတ်မှတ်လိုက်တယ်လို့ မလေးရှား လူ့စွမ်းအားအရင်းမြစ်ဝန်ကြီးဌာနရဲ့ထုတ်ပြန်ချက်အရသိရပါတယ်။
နိုင်ငံခြားသားလုပ်သားတွေ အတွက် အနည်းဆုံးလုပ်ခ ကို ယခင်က ၁၅၀၀ ရင်းဂစ် သတ်မှတ်ခဲ့ ပြီး ၂၀၂၅ခု နှစ် ဇန်နဝါရီလ မှာ တော့ ရင်းဂစ် ၁၇၀၀ အထိ တိုးမြှင့်သတ်မှတ်ပေးခဲ့ပါတယ်။
နှစ်ဆန်းပိုင်းကတည်းက အနည်းဆုံးလုပ်ခ ရင်းဂစ် ၁၇၀၀ တိုးမြှင့်ပေး ပေမယ့် လုပ်ငန်း အများစုမှာ တိုးမြှင့်ပေးခြင်းမရှိတဲ့ အတွက် ဩဂုတ် ၁ရက်က စပြီး အလုပ်ရှင်များ အားလုံး အလုပ်သမားအရေအတွက် မခွဲခြားဘဲ တစ်လ လျှင် ရင်းဂစ် ၁၇၀၀ ပေးရမယ်လို့ ဆိုပါတယ်။
ယခု သတ်မှတ်ချက်မှာ ပုဂ္ဂလိက လုပ်ငန်းရှင်များ၊ဒေသခံများနဲ့ နိုင်ငံသားမဟုတ်တဲ့ နိုင်ငံခြားသားအလုပ်သမား၊ စာချုပ်အလုပ်သမားနဲ့ အလုပ်သင် အလုပ်သမား အားလုံး အကျုံးဝင်ပြီး အိမ်အကူ လုပ်သားအတွက် တော့ အကျုံးမဝင်ဘူးလို့သိရပါတယ်။
""ကျွန်တော်တို့ သူဌေးက ၂လပိုင်း ကတည်းက အခြေခံလစာကို ၁၇၀၀ ရင်းဂစ် တိုးပေးတယ် တချို့စက်ရုံတွေ လည်း တိုးမပေးတာတွေရှိတယ် အခုဩဂုတ်၁ရက်ကစပြီး မဖြစ်မနေတိုးပေးရမယ်ဆိုတော့မရသေးတဲ့ မလေးရောက်နေတဲ့ မြန်မာလုပ်သားတွေ အဆင်ပြေတာပေါ့ ဒီမှာလည်း ကုန်ဈေးနှုန်းက လည်း ပိုမြင့်လာတော့ လစာတိုးလည်းသိပ်တော့ မထူးပါဘူး""လို့မလေးရောက်မြန်မာလုပ်သားတစ်ဦးကပြောပါတယ်။
ယခုသတ်မှတ်လိုက်တဲ့ အခြေခံလစာ ကို လုပ်ငန်းရှင်ဘက်က ပေးချေခြင်း မပြုပါက ၂၀၁၁ခုနှစ် အမျိုးသားလစာညွှန်ကြားရေးကောင်စီ ဥပဒေပြဌာန်းချက် အရ ပြစ်မှုမြောက်သည်ဟု သတ်မှတ်ခံရမှာဖြစ်ပြီး အမှုထင်ရှားပါက လုပ်ငန်းရှင်ကို အလုပ်သမားတစ်ဦးအတွက် ဒဏ်ငွေ ရင်းဂစ် ၁၀၀၀၀ ချမှတ်ခံရမှာဖြစ်တယ်လို့ သိရပါတယ်။
ပြစ်ဒဏ်ခံယူပြီးတိုင် ဆက်လက်ကျူးလွန်ပါက ရင်းဂစ် ၁၀၀၀ ထပ်ပေါင်း ဒဏ်ငွေပေးရမှာဖြစ်ပြီး အများဆုံးဒဏ်ငွေ ရင်းဂစ် ၂၀၀၀၀ သို့မဟုတ် ထောင်ဒဏ် ၅နှစ် ချမှတ်ခံရမယ်လို့ သိရပါတယ်။
အနည်းဆုံးလုပ်ခ ရင်းဂစ် ၁၇၀၀ မှာ တရားဝင် အထောက်အထားပြည့်စုံတဲ့ နိုင်ငံခြားသား လုပ်သားတွေ ကိုသာမဖြစ်မနေပေးမှာဖြစ်ပြီးအထောက်အထား မပြည့်စုံသူတွေကတော့အလုပ်ရှင် အလုပ်သမား သဘောဆန္ဒသာဖြစ်တယ်လို့ သိရပါတယ်။မလေးရှားငွေကြေး ရင်းဂစ် ၁၇၀၀ ဟာ မြန်မာငွေကျပ် ၁၇ သိန်း၀န်းကျင်ရှိတယ်လို့သိရပါတယ်။
မြန်မာနိုင်ငံမှာတော့ အလုပ်သမားတွေအတွက် အနည်းဆုံးအခကြေးငွေကို တလလျင် မြန်မာငွေ ၁၄၄၀၀၀ ကျပ်နဲ့ ထောက်ပံ့ကြေး တစ်လကို ၆ သောင်းကျပ်ပေးဖို့ သတ်မှတ်ပြီးနောက်ပိုင်း အခကြေးငွေတိုးပေးဖို့ လုပ်ဆောင်တာမတွေ့ရသလို အခြေခံပြည်သူတွေအနေနဲ့ မြင့်တက်နေတဲ့ကုန်ဈေးနှုန်းကြား မငတ်ရုံစားသောက်လုပ်ကိုင်နေရပြီး အာဟာရပြတ်လပ်မှုတွေပါ ဖြစ်ပေါ်လျက်ရှိပါတယ်။
