မလေးရှားနိုင်ငံ၊ ဆလန်ကောပြည်နယ်က စက်ရုံ တစ်ရုံမှာ အလုပ် လုပ်နေတဲ့ မြန်မာအလုပ်သမား အမျိုးသမီး ၃ ဦး စက်ရုံရှေ့ ရဲကားရောက်လာလို့ ဖမ်းဆီးမှာကို စိုးရိမ်ပြီး အုတ်တံတိုင်းပေါ်ကနေ ခုန်ချ ထွက်ပြေးရာကနေ ထိခိုက်ဒဏ်ရာရရှိခဲ့တယ်လို နှလုံးလှပရဟိတလူငယ်များသွေးလှူရှင်အဖွဲ့ ( ကွာလာလမ်ပူ-မလေးရှား ) ဆီက သိရပါတယ်။
လက်ရှိ မလေးရှား အစိုးရက အထောက်အထားမဲ့ နိုင်ငံခြားသားလုပ်သားတွေကို စီမံချက် (အော်ပရာစီ) နဲ့ ဖမ်းဆီးနေတဲ့ အတွက် မြန်မာအလုပ်သမားအမျိုးသမီးတွေ စိုးရိမ််ပြီး ထွက်ပြေးရာကနေ အခုလို ထိခိုက်ဒဏ်ရာ ရရှိခဲ့တယ်လို့ သိရပါတယ်။
" မြန်မာမိန်းကလေး လူသစ် ၃ယောက် ကြောက်ပြီး ထွက်ပြေးတာ၊ တစ်ယောက်က ခြေထောက် ကျိုးတယ်။ တစ်ယောက်က ခေါင်းကွဲတာ ရှစ်ချက်ချုပ်ရတယ်၊တစ်ဦးကတော့ ခြေဆစ်လွဲသွားတယ်။"လို့ နှလုံးလှပရဟိတလူငယ်များသွေးလှူရှင်အဖွဲ ( ကွာလာလမ်ပူ-မလေးရှား )အဖွဲ့ဝင် ကိုသက်က ပြောပါတယ်။
မြန်မာလုပ်သား အမျိုးသမီးတွေဟာ တရားဝင် အထောက်အထား မရှိဘဲ မလေးရှားနိုင်ငံကို ရောက်ရှိနေတာ ၃လ ဝန်းကျင် ရှိပြီလို့ သိရပါတယ်။
ဒဏ်ရာရတဲ့ အမျိုးသမီး ၃ဦး ကို စက်ရုံဘက်က ဆေးခန်းမှာ ကုသပေးပေမဲ့ လက်ရှိ အလုပ်မဆင်းနိုင်တဲ့ အပြင် စားသောက်ဖို့ ခက်ခဲနေလို့ နှလုံးလှပရဟိတလူငယ်များသွေးလှူရှင်အဖွဲ့က မလေးရှား ရင်းဂစ် ၁၃၀၀ ထောက်ပံခဲ့တယ်လို သိရပါတယ်။
မလေးရှားနိုင်ငံအတွင်း အထောက်အထားမဲ့ နိုင်ငံခြားသားတွေကို ဖမ်းဆီးတာတွေကြောင့် မြန်မာလုပ်သားတွေ ဖမ်းဆီးခံရသလို တချို့အလုပ်သမားတွေမှာ စိုးရိမ်ပြီး လုပ်ငန်းခွင်ကို ပုံမှန် မသွားနိုင်လို့ နေထိုင်စားသောက်ရေးပါ အခက်ခဲဖြစ်တာတွေ ရှိတယ်လို့ မလေးရှားနိုင်ငံရောက် မြန်မာနိုင်ငံသားတွေက ပြောကြားထားပါတယ်။
