မလေးရှား နိုင်ငံ အတွင်း အကြောင်းအမျိုးမျိုးနဲ့ ပြစ်ဒဏ်ကျခံ ခဲ့ပြီး တဲ့ မြန်မာနိုင်ငံသား ၂၁ဦး ကို နိုဝင်ဘာ ၁၇ ရက်က မြန်မာ နိုင်ငံဘက်သို့ ပြန်လည် လွှဲပြောင်းပေးခဲ့တယ်လို့ မလေးရှားလူဝင်မူကြီးကြပ်ရေးဌာနကထုတ်ပြန်ထားပါတယ်။
နိုဝင်ဘာ ဒုတိယ အပတ် မှာ ဂျိုဟိုးပြည်နယ် လူဝင်မှုကြီးကြပ်ရေးဌာနက မြန်မာအပါအဝင် နိုင်ငံခြားသား ၃၃၁ ဦးကို မူရင်းနိုင်ငံများသို့ ပြန်လည်လွှဲပြောင်းပေးခဲ့တယ်လို့ ထုတ်ပြန်ထားပါတယ်။
မိခင် နိုင်ငံ သို့ ပြန်ပို့ခံရတဲ့ ၃၃၁ ဦး တွင် မြန်မာနိုင်ငံသား ၂၁ ဦး၊ အင်ဒိုနီးရှားနိုင်ငံသား ၂၉၂ ဦး၊ ပါကစ္စတန်နိုင်ငံသား ၉ ဦး၊ ကမ္ဘောဒီးယားနိုင်ငံသား ၅ ဦးနှင့် လာအိုနိုင်ငံသား ၄ ဦး တို့ပါဝင်ကြောင်း ဖော်ပြထားပါတယ်။
မလေးရှားလူဝင်မှုကြီးကြပ်ရေးဌာနက ပြီးခဲ့ တဲ့ အောက်တိုဘာ လ မှာလည်း ပြစ်ဒဏ်ကျခံ ပြီး တဲ့ မြန်မာ နိုင်ငံသား ၆၂ဦး ကို မြန်မာနိုင်ငံသို့ ပြန်လည်ပို့ဆောင်ပေးခဲ့ပါတယ်။
နေရပ်ပြန်လည်ပို့ဆောင်ခံရသူတွေဟာ မလေးရှား လူဝင်မူကြီးကြပ်ရေးဌာနမှာ အမည်ပျက်စာရင်းသွင်းထားပြီး ၅ နှစ်အတွင်း မလေးရှားနိုင်ငံသို့ဝင်ရောက်ခွင့်ရရှိမှာ မဟုတ်ဘူးလို့ သိရပါတယ်။
မလေးရှားနိုင်ငံ အတွင်း က အကျဉ်းထောင် များ မှာ အထောက်အထားမရှိဘဲ နိုင်ငံ အတွင်း ဝင်ရောက်နေထိုင်မှုကြောင့် အဖမ်းခံရတဲ့ မြန်မာလုပ်သားတွေ များစွာ ရှိနေပြီး ပြစ်ဒဏ်ကျခံ ပြီးပေမယ့် မြန်မာနိုင်ငံသို့ ပြန်ရန် နိုင်ငံသား ဖြစ်ကြောင်း အထောက်အထားစာရွက်စာတမ်း တွေ စောင့်နေရသူတွေလည်း များစွာရှိနေတယ်လို့ မြန်မာလုပ်သားအရေးကူညီပေးနေသူတွေထံမှ သိရပါတယ်။
