မလေးရှား နိုင်ငံ ကွာလာလမ်ပူ မြို့ မှာ ကျင်းပမယ့် အာဆီယံထိပ်သီးအစည်းအဝေးကာလ မှာ မလေးရှား နိုင်ငံ အတွင်း ရှိ အထောက်အထားမပြည့်စုံတဲ့ မြန်မာနိုင်ငံသားတွေ အနေနဲ့ အသွားအလာ ဂရုစိုက်ဖို့ Alliance of Chin Refugees ( ACR)အဖွဲ့က အောက်တိုဘာလ ၂၀ ရက်နေ့မှာ အသိပေးထုတ်ပြန်ထားပါတယ်။
၄၇ ကြိမ်မြောက် အာဆီယံထိပ်သီးအစည်းဝေး ( ASEAN Summit 2025)ကို အောက်တိုဘာလ ၂၃ ရက်နေ့ကနေ ၂၈ ရက်နေ့ အထိ ကွာလာလမ်ပူမြို့မှာ ကျင်းပမှာ ဖြစ် လို့ မလေးရှား အစိုးရက ကွာလာလမ်ပူမြို့တွင်း လုံခြုံရေးအတွက် ရဲအင်အား ၁၆၀၀၀ အထိ တိုးချဲ့ ပြီး လမ်းတွေ ပိတ်ဆို့ကန့်သတ်တာတွေ ပြုလုပ်သွားမယ်လို့ဆိုပါတယ်။
ဒါကြောင့် မလေးရှား ရောက် မြန်မာနိုင်ငံသားတွေ အနေနဲ့ ကွာလာလမ်ပူ မြို့ဘက် သို့မဟုတ် မြို့အတွင်း ကို မလိုအပ်ဘဲ သွားလာခြင်းမပြုလုပ်ဖို့နဲ့သွားလာရန် လိုအပ်ပါက မိမိရဲ့လုံခြုံရေး ကို သတိထားကြဖို့ ACRမှ အထူးအကြံပြုထားပါတယ်။
အထောက်အထား မပြည့်စုံတဲ့ မြန်မာနိုင်ငံသားတွေ အနေနဲ့ လည်း အထူးသတိထားသွားလာကြဖို့ကို လည်း တိုက်တွန်းထားပါတယ်။
မလေးရှား နိုင်ငံ အတွင်း အထောက်အထား မပြည့်စုံတဲ့ နိုင်ငံခြားသား လုပ်သားတွေ ကို စီမံချက်နဲ့ ဖမ်းဆီးနေသလို နိုင်ငံသားတွေရဲ့ တိုင်ကြားမှုကြောင့် စိစစ် ဖမ်းဆီးတာတွေ ပြုလုပ်တဲ့ အတွက် အထောက်အထားမပြည့်စုံတဲ့ မြန်မာနိုင်ငံသားတွေ မကြာခဏအဖမ်းခံနေရပါတယ်။
အဖမ်းခံရသူတွေ ကို မလေးရှားဥပဒေအရ ပြစ်ဒဏ်ချမှတ်ခံရကာ ပြစ်ဒဏ် လွတ်မြောက်ပါက မြန်မာနိုင်ငံသို့ မိမိစရိတ်ဖြင့် ပြန်လည်ပို့ဆောင် ခံရပြီး ပြည်နှင်ဒဏ်ပေးခံရတယ်လို့သိရပါတယ်။
