စစ်ကောင်စီရဲ့ဖမ်းဆီးခြင်းခံထားရတဲ့မန္တလေးသပိတ်အင်အားစုမှကိုသူရအောင်ဟာခြေထောက်များကျိုးကြေနေသည်အထိရိုက်နှက်နှိပ်စက်ခံထားရပြီးစစ်ကြောရေးကိုရောက်ရှိနေတယ်လို့ပြည်ကြီးတံခွန်သပိတ်ဦးဆောင်ဆရာတော်တပါးရဲ့ပြောကြားချက်အရသိရပါတယ်။
ဒါ့အပြင် သုံးလနီးပါး အ ဆက်အသွယ်ပြတ် ပျောက်ဆုံးနေသော မန္တလေးသပိတ် တက်ကြွလှုပ်ရှားသူတစ်ဦးနှင့် အလွတ်တန်းသတင်း ထောက်နှစ်ဦး အိုးဘိုထောင်သို့ရောက်ရှိနေပြီဖြစ်တယ်လို့လဲအတည်ပြုချက်အရသိရပါတယ်။
"ကိုသူရအောင်အခြေအနေကဆိုးတယ်သူပထမအိုးဘိုထောင်ရောက်လာတယ် ကိုဗစ်ဖြစ်တယ်ဆိုပြီးစစ်ကြောရေးပြန်ပို့ခံရတယ်ခြေထောက်တွေကျေနေအောင်အရိုက်ခံထားရလို့ဆေးသောက်နေရတယ်မကျဆုံးသေးဘူး"လို့ပြည်ကြီးတံခွန်သပိတ်အင်အားစုမှ ဦးဆောင်ဆရာတော် ဦးအဂ္ဂဝံသကပြောပါတယ်။
စစ်ကောင်စီတပ်တွေဟာ မန္တလေးသပိတ်ခေါင်းဆောင် ကိုသူရအောင်၊ သပိတ်တက်ကြွလှုပ်ရှားသူ ကိုဖိုးလုံး(ခ)ကိုရဲဇင်ထွန်း၊ အလွတ်တန်းသတင်းထောက် နှစ်ဦးဖြစ်သည့် ကိုစိုးလင်းအောင်နှင့် ကိုလှမျိုးအောင်တို့ကို ဖေ ဖော်ဝါရီ ၉ ရက်တွင် စစ်ကောင်စီက မဟာအောင်မြေမြို့နယ်အတွင်းရှိ နေအိမ်တစ်အိမ်တွင် အကြမ်းဖက်ရိုက်နှက် နှိပ်စက်ဖမ်းဆီးခဲ့တာပါ။
"ခုကလဲမိသားစုကဆက်သွယ်မရဘာမရနဲ့ဆိုတော့အသက်အန္တရာယ်အတွက်အများကြီးစိတ်ပူနေကြရတယ်"လို့ဆရာတော်ကဆက်လက်မိန့်ကြားပါတယ်။
လက်ရှိအချိန်အထိဖမ်းဆီးခံထားရတဲ့ ကိုသူရအောင်၏အသက်ဘေးအခြေအနေမှန်ကို သိရှိနိုင်ရေး၊ အသက်အန္တရာယ် ဘေးကင်းလုံခြုံမှုရှိရေး၊ မိသားစုဝင်များ၊ မိတ်ဆွေများနှင့် အမြန်ဆုံး အဆက် အသွယ်ရရှိရေးတို့အတွက် အပြည်ပြည်ဆိုင်ရာ ကြက် ခြေနီကော်မတီ (ICRC)၊ လူ့အခွင့် အရေးဆိုင်ရာ အဖွဲ့အစည်းများ၊ ရှေ့နေရှေ့ရပ်များ၊ သံရုံးနှင့် သံတမန် အဖွဲ့အစည်းများအပါအဝင် တတ်စွမ်းနိုင်သူများအနေဖြင့် အရေးပေါ် ကြားဝင် ကူညီဆောင်ရွက်ပေးကြရန် မန္တလေး သပိတ်အင်အားစုကတောင်းဆိုထားပါတယ်။
