စစ်အာဏာသိမ်းစဉ် ပထမဆုံး အာဏာရှင်ဆန့်ကျင်ရေး ဦးဆောင်ဆန္ဒပြခဲ့တဲ့ ဒေါက်တာတေဇာဆန်းဟာ မန္တလေးမြို့မှာ စစ်တာဏာရှင် အဆုံးသတ်တိုက်ပွဲအတွက် အာဏာရှင်ဆန့်ကျင်ရေးလှုပ်ရှားဆန္ဒပြမှုကိုထပ်မံလုပ်ဆောင်လိုက်ပါတယ်။
စစ်အာဏာရှင်ကို တွန်းလှန်တိုက်ထုတ်ရာမှာ စစ်ရေးတိုက်ပွဲတွေနဲ့အတူ လူထုတိုက်ပွဲ လူထုအုံကြွမှု အာဏာဖီဆန်ရေးလှုပ်ရှားမှုတွေ အထူးလိုအပ်ပြီး စစ်ရေးနည်းနာတစ်ခုတည်းကို လုံးလုံးလျားလျား အားပြုထားလို့မရဘူးလို့ သတင်းစကား ပြောကြားပါတယ်။
"ဒီပွဲကို စောစောသိမ်းနိုင်ဖို့ဆိုရင် စစ်ရေးတိုက်ပွဲများနဲ့အတူ လူထုတိုက်ပွဲ၊ လူထုအုံကြွမှု၊ အာဏာဖီဆန်ရေးလှုပ်ရှားမှုများကို ဟန်ချက်ညီညီ ဖော်ဆောင်နိုင်ဖို့ အထူးလိုအပ်ပါတယ်။ ကျနော်တို့ တော်လှန်ရေးကြီးက စစ်ရေးနည်းနာတခုတည်းကို လုံးလုံးလျားလျား အားပြုထားလို့ မရပါဘူး။ စစ်ရေးနဲ့အတူ လူထုတရပ်လုံး ပါဝင်ဆင်နွှဲနိုင်တဲ့ လူထုတိုက်ပွဲ၊ လူထုအုံကြွလှုပ်ရှားမှုကြီးတွေကို အရှိန်တိုးမြှင့် ဖော်ဆောင်ကြဖို့ လိုအပ်ပါတယ်။ ဒါမှသာလျှင် ဒီခရီး ပိုနီးပါလိမ့်မယ်။
အထူးသဖြင့် တော်လှန်ရေးကြီး စကတည်းက လူထုတရပ်လုံး စွဲကိုင်ခဲ့တဲ့ လူထု CDM နဲ့ “ဘူး” သပိတ် (Boycott and Social Punishment) လှုပ်ရှားမှုများကို အခုချိန်မှာ အစွမ်းကုန် အရှိန်တင်ကြဖို့ လိုနေပါပြီ"လို့ ဒေါက်တာတေဇာဆန်းက တိုက်တွန်းထားပါတယ်။
ပြည်သူတွေလုပ်ဆောင်ရမဲ့ "ဘူး"သပိတ်အနေဲ့ အကြမ်းဖက်စစ်အုပ်စုကို လက်မခံဖို့၊ မပူးပေါင်း မနာခံဖို့ အခွန်အခတွေမပေးဖို့ ၊ စစ်တပ်ပိုင်ကုန်စည်နဲ့ ဝန်ဆောင်မှုတွေကို မသုံးဖို့၊ မသယ်ဖို့၊ မရောင်းဖို့၊ စစ်တပ်ထောက်တိုင်တွေကို လက်မခံဖို့၊ စစ်တပ်ရဲ့ ရွေးကောက်ပွဲကို လက်မခံဖို့ ၊ မဲမပေးဖို့ အစရှိသဖြင့် စစ်အာဏာရှင်ကို သွေးပျက်ခြောက်ခြားအောင် ထိုးနှက်ကြဖို့ လှုံ့ဆော်ထားပါတယ်။
နောက်ပြီး "ကျနော်တို့ ပြည်သူများအားလုံး စစ်အာဏာရူးတွေကို “ငုံ့မခံဘဲ တုံ့ပြန်” ကာ အထွေထွေ အာဏာဖီဆန် အုံကြွတော်လှန်ကြဖို့ အချိန်ကြပါပြီ"လို့ ယင်းက တိုက်တွန်းပြောကြားပါတယ်။
