ထိုင်းနိုင်ငံ ဘန်ကောက်မြို့ ဖလန်ဆောင်နယ်မြေအတွင်းက ဆောက်လုပ်ဆဲ မိုးပျံတံတား ပြိုကျတဲ့ ဖြစ်စဉ် တွင် မြန်မာအလုပ်သမားတစ်ဦးအလောင်း ထပ်မံ တွေ့ရှိတယ်လို့ ထိုင်းသတင်းတွေမှာဖေါ်ပြထားပါတယ်။

မတ်လ၁၅ရက်က ဘန်ကောက်ရှိ ဆောက်လုပ်ဆဲ မိုးပျံတံတား ပြိုကျတဲ့ အတွက်ကနဦးသတင်းတွေမှာ ထိုင်းနိုင်ငံသား ၃ ဦးနဲ့မြန်မာအလုပ်သမား၂ဦး စုစုပေါင်း၅ဦးသေဆုံး ခဲ့တယ်လို့ သတင်းထုတ်ပြန်ခဲ့ပါတယ်။

ပြိုကျတဲ့ တံတား ဧရိယာ အတွင် ရှာဖွေရှင်းလင်းရေး လုပ်ငန်းတွေ လုပ်ဆောင်တာ မှာ မတ်လ၁၆ရက်နေ့က မြန်မာအလုပ်သမားတစ်ဦးရဲ့ ရုပ်အလောင်းကို ထပ်မံ တွေ့ရှိခဲ့တဲ့ အတွက် သေဆုံးသူ ၆ဦး အထိ ရှိလာခဲ့ပါတယ်။

ထပ်မံတွေ့ရှိတဲ့ သေဆုံးသူမြန်မာအလုပ်သမား ဟာ အသက် ၂၂ နှစ်အရွယ် ကိုထိုက်ဝေယံဖြစ်ပြီး ယခင်သေဆုံးသူ မြန်မာအလုပ်သမား ၂ဦးမှာ ကိုဇင်ကိုအောင်နဲ့ ကိုနိုင်လင်းအောင်တို့ ဖြစ်ကာ တံတားပြိုကျမှုကြောင့် သေဆုံး မြန်မာအလုပ်သမား၃ဦး အထိ ရှိလာတယ်လို့ သိရပါတယ်။

ထိခိုက်ဒဏ်ရာ ရရှိသူ ၂၉ဦးခန့်ရှိပြီး ၎င်းတို့ ထဲ တွင် မြန်မာအလုပ်သမား၁၀ဦး အထက် ရှိတယ်လို့ သိရကာ ထိခိုက်ဒဏ်ရာ ပြင်းထန်သူများ လည်းပါဝင်တယ်လို့ ဆိုပါတယ်။

တံတားပြိုကျမှု ကို သက်ဆိုင်ရာက ဆက်လက် စုံစမ်းစစ်ဆေးတာတွေ ပြုလုပ်နေပြီး မတော်တဆမှုဖြစ်ပွားတဲ့ လုပ်ငန်းခွင်ကို ၁၄ ရက်ရပ်ဆိုင်းဖို့ သက်ဆိုင်ရာတာဝန်ရှိသူတွေက ညွှန်ကြားထားတယ်လို့ ဆိုပါတယ်။

၎င်းတံတားစီမံကိန်း မှာ ပြီးခဲ့တဲ့ ၂၀၂၄ ခုနှစ် နိုဝင်ဘာတုန်းကလည်း လုပ်ငန်းခွင်အတွင်း တံတား ပြိုကျခဲ့ပြီး မြန်မာအလုပ်သမား ၄ဦး အပါအဝင် ၆ဦးသေဆုံးခဲ့ကာ ၁၁ဦးထိခိုက်ဒဏ်ရာ ရရှိခဲ့ပါသေးတယ်။

ဓါတ်ပုံ-Bangkok Post