ထိုင်းနိုင် ဘန်ကောက်မြို့၊ ဘန်ခိုလမ်းခရိုင်က လုပ်ငန်းခွင်တစ်ခုမှာ မတော်တဆမှု ဖြစ်ပွားခဲ့ပြီး အသက် ၃၂ အရွယ် မြန်မာလူမျိုးတဦး ဓါတ်လိုက်သေဆုံးခဲ့တယ်လို့ Thaiger အွန်လိုင်းသတင်း စာမျက်နှာက ဖော်ပြထားပါတယ်။

 

ဇန်နဝါရီ ၂၅ ရက်၊ နေ့လယ် ၁ နာရီလောက် ၊ ဘန်ခလိုးရပ်ကွက်၊ ရာမ ၃ လမ်းမှာ အဲဒီ ဖြစ်စဉ် ဖြစ်ပွား ခဲ့ပြီး မြန်မာလုပ်သားဟာ ငါးထပ်ကုန်သွယ်ရေး အဆောက်အဦး ပြင်ပ သန့်ရှင်းရေးလုပ်နေစဉ် ဓါတ်လိုက် သေဆုံးခဲ့တာလို့ ရေးသားထားပါတယ်။

 

အဆောက်အဦးရဲ့ ပြင်ပ သုံးထပ်မြောက်မှာ ချိတ်ဆွဲထားတဲ့ ပခတ်အတွင်း ဓါတ်လိုက်သေဆုံးခဲ့တာ ဖြစ်ပြီး ရုပ်အလောင်းရဲ့ ညာဘက်ခြေထောက်မှာ မီးလောင်ဒဏ်ရာတွေ တွေ့ရတယ်လို့ ရဲတပ်ဖွဲ့က ပြောကြားထားပါတယ်။

 

သေဆုံးခဲ့သူ မြန်မာအမျိုးသားနဲ့အတူ လုပ်ဖော်ကိုင်ဖက် ၄ ဦးက အဆောက်အဦးနံရံတွေ သန့်ရှင်းရေး လုပ်ကိုင်နေစဉ် အခုလို မတော်တဆမှု ဖြစ်ပွားခဲ့တာလို့ တခြားအလုပ်သမားတဦးက ပြောကြားပါတယ်။

 

တခြားအလုပ်သမားတွေ သီးခြားအလုပ်တွေ လုပ်ကိုင်နေစဉ် ပေါက်ကွဲသံနဲ့အတူ သေဆုံးသူ ဓါတ်လိုက် တာကို တွေ့ရတယ်လို့ လုပ်ဖော်ကိုင်ဖက်တဦးက ပြောပါတယ်။ ဒီနောက် ကြိုးတွဲထားတဲ့ ပခတ် လျောကျတာကို တွေ့ရတယ်လို့လည်း ပြောပါတယ်။ ဗို့အားမြင့် ၂၀၀၀၀ ဗို့ လျှပ်စစ်ကြိုးကို ထိမိပြီး သေဆုံးခဲ့တယ်လို့ အာဏာပိုင်တွေက ယူဆထားပါတယ်။

 

ကူညီရေးအဖွဲ့တွေ ရောက်ရှိပြီး အသက် ကယ်ဆယ်ဖို့ ကြိုးစားခဲ့ပေမဲ့ သေဆုံးနေပြီ ဖြစ်တယ်လို့ KhaoSod သတင်းစာမှာ ဖော်ထားတယ်လို့ ရေးသားထားပါတယ်။ ‌စေတနာ့ဝန်ထမ်းတွေက ရုပ်အလောင်း ကို သက်ဆိုင်ရာ ဆေးရုံဆီ သယ်ယူပို့ဆောင်ပေးခဲ့ပြီး သင်္ဂြိုဟ်ဖို့အတွက် သေဆုံးသူရဲ့ ဆွေမျိုးသားတွေ ဆီ ဆက်သွယ်ထားပြီး ဖြစ်တယ်လို့လည်း ဖော်ပြထားပါတယ်။