အီလက်ထရောနစ် စက်ရုံ မှာ အလုပ်သွင်းပေးမယ်ဆ်ိုပြီး ပွဲစားမှ စမတ်ကြေး တွေ ယူကာ လိမ် ပြေး ခံရတဲ့ မြန်မာလုပ်သား ၆၃ဦး အား ဘတ်၄သိန်း ကို ပွဲစားက ပြန်ပေးတယ်လို့ ၎င်းအမှု ကို ကူညီပေးနေတဲ့ WAGအလုပ်သမား မဟာမိတ်အဖွဲ့ထံမှ သိရပါတယ်။
၎င်းအလုပ်သမား ၆၃ဦး ထံမှ စမတ်ကြေး ဘတ် ၅ သိန်းကျော် (၅၃၅,၅၀၀)ကို မြန်မာပွဲစား တစ်ဦး က လိမ်လည် ပြေးသွားတဲ့ အတွက် WAGအဖွဲ့နဲ့အတူ အလုပ်သမားတွေက မြို့နယ် ကျဟာငန် အလုပ် သမားရုံးတွင်သွားရောက်တိုင်ကြားခဲ့သလို WAGအဖွဲ့အနေနဲ့ မြန်မာနိုင်ငံဘက်မှလူများနဲ့ ချိတ်ဆက်လုပ်ဆောင်ပေးခဲ့ရာ ဖေဖော်ဝါရီလ ၁၆ ရက် တွင် ပွဲစားမှ ၄၂ ဦးစာ ဘတ် ၄ သိန်း (၄၀၀,၀၀၀)ကို ပြန်လွှဲပေးခဲ့တယ်လို့ WAG အဖွဲ့ကထုတ်ပြန်ထားပါတယ်။
"လိမ်ပြေးတဲ့ ပွဲစားက မြန်မာဘက်ကနေ ဘတ်၄သိန်း ပြန်လွှဲပေးတယ် အခုက ၄၂ယောက်စာ အတွက်က မြို့နယ် ကျဟာငန်ရုံးမှာ ထုတ်ပေးပြီးပြီ ကျန်တဲ့ အယောက်၂၀ကျော် အတွက် က လာမယ့် ၂လပိုင်း၂၀ရက်မှာ ထပ်မံပေးမှာဖြစ်လို့ စမတ်ကြေး ပြန်ရမယ့် သူတွေ အဲ့နေလာယူပါ"လို့ WAGအလုပ်သမားမဟာမိတ်အဖွဲ့ မှတာဝန်ရှိသူကပြောပါတယ်။
စမတ်ကြေး အလိမ်ခံရတဲ့ မြန်မာလုပ်သား ၆၃ဦးဟာ ချွန်ဘူလီ၊ဘောဝင်း (C)တိုက်တွင်နေထိုင်တဲ့ ပွဲစားအမည် Pyae Phyo Paing (Facebook) အခြားအမည် Min Min Paingနှင့် ဇနီးဖြစ်သူ Phoo Zin တို့က အီလက်ထရောနစ် စက်ရုံ မှာ အလုပ်သွင်းပေးမယ် ဟုဆိုပြီး အလုပ်သမား ၁ ဦးလျှင် စမတ်ကြေး (အလုပ်လျှောက်ပေးခ) ၈၅၀၀ ဘတ်နှုန်းဖြင့်ကောက်ခံခဲ့ပြီးနောက် အလုပ်ရရှိခြင်းမရှိတဲ့ အတွက် ဖေဖော်ဝါရီလ ၁၁ ရက် မှာ ၎င်းပွဲစားအခန်းသို့ လိုက်သွားခဲ့ရာ အခန်းတွင်မတွေ့ရတော့ဘဲ ထွက်ပြေးသွားတယ်လို့ သိရပါတယ်။
ဒါကြောင့် ဖေဖော်ဝါရီ ၁၃ ရက်နေ့ မှာ အလုပ်သမားများက စမတ်ကြေးများပြန်လည်ရရှိရန်နှင့် ပွဲစားအားအရေးယူနိုင်ရန်အတွက် WAG အလုပ်သမားမဟာမိတ်အဖွဲ့ထံအကူအညီတောင်းခံခဲ့ပြီး နောက် အခုလို လိမ်ခံရတဲ့ ငွေအချို့ ပြန်ရခဲ့တာ ဖြစ်ကြောင်း သိရပါတယ်။
