ပြည်ပနိုင်ငံတွေမှာသွားရောက်လုပ်ကိုင်နေသူတွေအနေနဲ့မိသားစုကိုတရားဝင်လမ်းကြောင်းကတစ်ဆင့်ငွေလွှဲတာမရှိရင်လည်းစာရင်းပေးရမယ်လို့စစ်ကောင်စီလက်အောက်ခံအလုပ်သမားဝန်ကြီးဌာနကညွှန်ကြားမှုလုပ်ဆောင်ပြန်ပါတယ်။
အလုပ်သမားဝန်ကြီးဌာနဟာရွှေ့ပြောင်းလုပ်သားတွေလုပ်ခလစာရဲ့၂၅ရာခိုင်နှုန်းကိုပြည်တွင်းကိုပြန်လည်လွှဲပြောင်းပေးဖို့ပြည်ပအလုပ်အကိုင်ရှာဖွေရေးအေဂျင်စီေတွ၊သံရုံးတွေ၊ပတ်စပို့စ်ရုံးတွေကိုကြပ်မတ်မှုတွေနည်းမျိုးစုံနဲ့လုပ်ဆောင်နေတာဖြစ်ပါတယ်။
အရင်ကတော့တရားဝင်လမ်းကြောင်းနဲ့ငွေလွှဲသူစာရင်းကိုလစဉ်တောင်းခံခဲ့ပေမယ့်အခုချိန်မှာတော့ပြန်လည်လွှဲပြောင်းမှုမရှိတာတွေကိုပါအချက်အလက် စတင်စုဆောင်းလာတာဖြစ်ပါတယ်။
"လစာငွေပြန်မလွှဲတဲ့သူတွေစာရင်းလည်းပို့ပါဆိုတော့စိတ်ပူမိတယ်။နည်းမျိုးစုံနဲ့ဘယ်လိုယုတ်မာမလို့လဲတွေးမိတယ်။လစာကိုဘဏ်ကလွှဲဖို့အိမ်ကိုပြောကြည့်ဖူးတယ်။ဒါပေမယ့်အိမ်ကလူတွေကဘဏ်မသွားချင်ဘူး။အချိန်ပေးရတာနဲ့စာရွက်စာတမ်းတွေရှုပ်လို့မသုံးချင်ဘူး"လို့ထိုင်းရောက်မြန်မာအလုပ်သမားတစ်ဦးကပြောပါတယ်။
ပြည်ပမှာအလုပ်လုပ်ကိုင်သူအများစုဟာတရားမဝင်ငွေလွှဲစနစ်(ဟွန်ဒီ)ကိုအသုံးပြုတာပိုများပြီးပေါက်ဈေးအတိုင်းကျပ်ငွေရရှိတာ၊ အိမ်တိုင်ရာ ရောက်ဖြစ်စေ၊ ငွေထုတ်ရလွယ်ကူတဲ့ဘဏ်စနစ်ထဲဖြစ်စေရောက်ရှိတဲ့အားသာချက်ကိုသဘောကြတာပဲဖြစ်ပါတယ်။
"ကိုရီးယားကတစ်လဆယ်သိန်းလွှဲပါတယ်။တစ်ခါကြုံဖူးတယ်။လွှဲနေကျပိုက်ဆံဆယ်သိန်းရဖို့ကိုနောက်တစ်ပတ်စောင့်ပေးပါဆိုလို့ဆေးဖိုးကအစတိုင်ပတ်ဖူးတယ်"လို့ရွေ့ပြောင်းလုပ်သားတစ်ဦးရဲ့မိခင်ဖြစ်သူကပြောပါတယ်။
အလုပ်သမားဝန်ကြီးဌာနဟာနိုင်ငံခြားငွေရရှိရေးအတွက်စေလွှတ်ရေးလုပ်ငန်းစဉ်တွေမှာတကူးတကထည့်သွင်းမှာကြားတာတွေ၊ အေဂျင်စီတွေကိုဖိအားပေးတာတွေနဲ့အလုပ်သမားရှိရာလုပ်ငန်းခွင်တွေထဲသွားပြီးလစာငွေလွှဲပြောင်းဖို့ပြောဆိုခိုင်းတာတွေလည်းရှိခဲ့ပါတယ်။
"အခုကတော့မပို့ရင်လည်းမပို့ဘူးရေးဆိုတော့နည်းနည်းလေးတော့အဆင်ပြေတာပေါ့။ကျွန်တော်တို့ကိုဖိအားပေးလည်းတတ်နိုင်တဲ့ကိစ္စမဟုတ်ဘူးလေ။ဘာထပ်လုပ်မလဲတော့ကြည့်ရမှာပေါ့"လို့ပြည်ပအလုပ်အကိုင်ရှာဖွေရေးဝန်ဆောင်မှုအေဂျင်စီမှာလုပ်ကိုင်သူတစ်ဦးကပြောပါတယ်။
ပြည်ပကိုလုပ်သားစေလွှတ်တဲ့အေဂျင်စီတွေကိုလုပ်သားစေလွှတ်မှုရှိသည်ဖြစ်စေ၊ မရှိသည်ဖြစ်စေငွေလွှဲရရှိ၊မရရှိစာရင်းကိုလဆန်း(၅)ရက်မတိုင်ခင်လစဉ်ပေးပို့ရမယ်လို့ညွှန်ကြားချက်ထုတ်ပြန်ထားပါတယ်။
#MyanmarLabourNews
