ပြည်ပမှာသွားရောက်လုပ်ကိုင်နေတဲ့အလုပ်သမားတွေ နှစ်နိုင်ငံ ဘဏ်စနစ်အသုံးပြုပြီး ငွေလွှဲဖို့အတွက်ကို ပြည်ပအလုပ်အကိုင်ဝန်ဆောင်မှုအေဂျင်စီတွေက တိုက်တွန်းပေးဖို့ စစ်ကောင်စီလက်အောက်ခံအလုပ်သမားဝန်ကြီးဌာနက ပြောဆိုနေပါတယ်။

ဩဂုတ်လ (၃၀)ရက်မှာ လုပ်ဆောင်ခဲ့တဲ့ အစည်းအဝေးမှာ အလုပ်သမားဝန်ကြီးဌာန ပြည်ထောင်စု ဝန်ကြီး ဦးမြင့်နောင်က ပြောဆိုခဲ့တာပါ။

''MoU မြန်မာအလုပ်သမားတွေ မိသားစုလွှဲပို့ငွေကိစ္စနဲ့ ပတ်သက်ရင်  ငွေလွှဲအများစုကို နှစ်နိုင်ငံဘဏ်များမှတစ်ဆင့် စနစ်တကျစီးဆင်းစေဖို့၊ နိုင်ငံစီးပွားတိုးတက်ဖို့အတွက် ပြည်ပအလုပ်အကိုင်အကျိုးဆောင်လိုင်စင်ရအေဂျင်စီ‌ တွေက မိမိတို့စေလွှတ်တဲ့ အလုပ်သမားတွေ  တရားဝင်လမ်းကြောင်းကနေ ငွေလွှဲပို့နိုင်ရေး ရှင်းလင်းပြောကြား ပေးစေလိုပါတယ်''လို့ ဝန်ကြီးက ပြောဆိုခဲ့တာပါ။

လက်ရှိမှာ ပြည်ပရောက်မြန်မာအလုပ်သမားအများစုက ဟွန်ဒီ(ငွေလွှဲ)စနစ်ကို အသုံးပြုပြီ လစာငွေလွှဲနေကြတာပါ။ 

''ဟွန်ဒီနဲ့လွှဲတာ လွယ်တယ်။ အချိန်ကုန်သက်သာတယ်။ ပေါက်ဈေးအတိုင်းရတယ်။ ဘဏ်ကလွှဲရင် ပေါက်ဈေးနဲ့ရတာမှ မဟုတ်တာ။ နောက်တစ်ခုက သူတို့အတွက် နိုင်ငံခြားငွေရှာပေးသလို မဖြစ်ချင်ဘူး။ သူတို့လက်အောက်မနေချင်လို့ ပြည်ပထွက်လာတာကို လစာကိစ္စအထိ လိုက်ပြီးယုတ်မာနေချင်ကြတယ်''လို့ ထိုင်းရောက် မြန်မာအလုပ်သမားတစ်‌ဦးက မှတ်ချက်ပြုပါတယ်။

စစ်ကောင်စီဟာ နိုင်ငံခြားငွေရရှိဖို့ ပိုပိုခက်ခဲလာတာနဲ့အမျှ ပြည်ပရောက်မြန်မာ အလုပ်သမားတွေရဲ့ လစာကို အမြတ်ထုတ်ဖို့ ကြိုးပမ်းလာတာပါ။ 

ပြည်ပရောက် မြန်မာအလုပ်သမားတွေရဲ့လစာကို ရာခိုင်နှုန်းတစ်ခု သတ်မှတ်ပြီး ဘဏ်စနစ်နဲ့ မဖြစ်မနေ လွှဲပြောင်းဖို့ ဌာနတွင်း ဆွေးနွေးနေတယ်လို့ အလုပ်သမားဝန်ကြီးဌာနက သတင်းဌာနတွေမှာ ဖြေကြားတာတွေ ရှိထားပါတယ်။

#MyanmarLabourNews