ပြည်ပနိုင်ငံမှာရောက်ရှိနေထိုင်ကြတဲ့ မြန်မာနိုင်ငံသားတွေ အနေနဲ့ ရွေးကောက်ပွဲအတွက် ကြိုတင်မဲ ပေးလိုပါက မိမိရဲ့ ကိုယ်ရေးအချက်အလက် ပြည့်စုံစွာဖေါ်ပြပြီး မြန်မာသံရုံးကို ပေးပို့တောင်းဆိုရမယ် လို့ စစ်ကောင်စီရဲ့ ပြည်ထောင်စု ရွေးကောက်ပွဲ ကော်မရှင်က သြဂုတ် ၂၁ ရက်မှာ ထုတ်ပြန်ပါတယ်။
၎င်းထုတ်ပြန်ချက်နဲ့ ပက်သက်ပြီး ယနေ့ ဩဂုတ် လ ၂၂ရက် မှာလည်း ပြည်ပနိုင်ငံတွေရှိ မြန်မာသံရုံးတွေရဲ့ လူမှုကွန်စာမျက်နှာတွေမှာ ကြိုတင်မဲ ပေးနိုင်ရေးနဲ့ ပတ်သက်ပြီး လုပ်ဆောင်ရမယ့် အချက်တွေ ကို ထပ်မံအသိပေးကြေညာလာပါတယ်။
ပြည်ပရောက် မြန်မာနိုင်ငံသားအနေနဲ့ ကြိုတင်မဲ ပေးလိုပါက ဖြည့်စွက်ရမယ့် ပုံစံ (၁၅) မှာ မိမိကိုယ်ရေးအချက်အလက် အပြည့်အစုံ၊ပြည်တွင်းရှိနေရပ်လိပ်စာလက်ရှိရောက်နေတဲ့ နိုင်ငံမှာ နေထိုင်တဲ့ လိပ်စာတွေကိုပါဖြည့်စွက် ရမယ်လို့ဆိုပါတယ်။
"အတင်းကြပ်မဲလာထည့်ပါဆိုရင်တောင် တနည်းနည်းနဲ့ရှောင်နေမှာ အခုလို သံရုံးကို ကြိုတင်မဲပေးဖို့ ကိုယ့်ရဲ့ ကိုယ်ရေးအချက်အလက် လိပ်စာ ပေးပို့ တောင်းဆိုရမယ်ဆိုတာတော့ ပြည်ပရောက်သူ အယောက် ၁၀၀ မှာ ၉၉ယောက်က တောင်းဆိုမှာမဟုတ်ဘူး စစ်အာဏာသိမ်းလိုက်လို့ အခုလို နိုင်ငံရပ်ခြားမှာ ဒုက္ခတွေ ရောက်နေရတာ ပြန်ချင်လို့လဲမပြန်ရနဲ့ ပြည်သူကို နည်းမျိုးစုံဒုက္ခပေးနေတဲ့သူကို ဘယ်သူက ထောက်ခံမှာလဲ""လို့ ကိုရီးယားရောက်မြန်မာနိုင်ငံသားတစ်ဦးကပြောပါတယ်။
ကြိုတင်မဲအတွက် ပုံစံ (၁၅) တွေကို ရွေးကောက်ပွဲကော်မရှင်၊ နိုင်ငံခြားရေးဝန်ကြီးဌာနနဲ့ သက်ဆိုင်ရာသံရုံးတွေရဲ့ ဝက်ဆိုဒ် တွေမှာ ဒေါင်းလော့ခ် ရယူနိုင်တယ်လို့ မြန်မာသံရုံးများက အသိပေးထား ပါတယ်။
အဆိုပါ ပုံစံ (၁၅) မှာ အချက်အလက်ဖြည့်ပြီး ပါက သြဂုတ် ၂၂ ရက်ကနေ စက်တင်ဘာ ၈ ရက်အထိ သက်ဆိုင်ရာ သံရုံးတွေကို လူကိုယ်တိုင်ဖြစ်စေ၊ကိုယ်စားလှယ်ဖြင့်ဖြစ်စေ၊ စာတိုက်သို့မဟုတ် သံရုံး အီးမေးကတစ်ဆင့် ပေးပို့နိုင်တယ်လို့ ထုတ်ပြန်ထားပါတယ်။
စစ်ကောင်စီ က ရွေးကောက်ပွဲ ကို ဒီဇင်ဘာ၂၈ ရက်က စပြီး အပိုင်းလိုက် လုပ်ဆောင်ဖို့ ကြေညာပေမယ့် ပြည်တွင်းပြည်ပရှိ ပြည်သူတွေက စစ်ကောင်စီ ပြုလုပ်တဲ့ အတုအယောင် ရွေးကောက်ပွဲ ကို ဆန့်ကျင်ကြောင်း ဆန္ဒထုတ်ဖေါ်တာတွေရှိနေသလို နွေဦးတော်လှန်ရေး အဖွဲ့အစည်းအသီးသီးကလည်း စစ်အာဏာရှင်သက်ဆိုးရှည်မယ့် ရွေးကောက်ပွဲကို နည်းလမ်းပေါင်းစုံနဲ့ ဆန်ကျင်ကြဖို့ တိုက်တွန်း ထားပါတယ်။
