အကြောင်းအမျိုးမျိုးနဲ့ ပြည်ပကို ရောက်ရှိနေတဲ့ မြန်မာနိုင်ငံသားတွေရဲ့ သား/သမီး ရဲ့ မွေးစားရင်း လက်မှတ်ကို အမျိုးသားညီညွှတ်ရေးအစိုးရပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာန မှာ လျှောက်ထားနိုင်တယ်လို့ NUG အစိုးရ က သတင်းထုတ် ပြန် ထားပါတယ်။
မွေးစာရင်း ထုတ်ယူနိုင်ရန် အတွက် မိခင်၊ ဖခင် တို့ရဲ့ ကိုယ်ရေးအကျဉ်း၊ လက်ရှိ နေထိုင်ရာနေရပ်လိပ်စာ၊ ကလေးမွေးဖွားခဲ့ရာမြို့နဲ့ဆေးရုံနာမည် သို့မဟုတ် မွေးခဲ့ကြောင်း အထောက်အထားတွေ လိုအပ်တယ်လို့ဆိုပါတယ်။
မွေးစာရင်းလျှောက်ထားသူရဲ့ ကိုယ်ရေးအချက်အလက်ကိုတော့ အမျိုးသားညီညွတ်ရေး အစိုးရ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာနအနေနဲ့ လျှို့ဝှက်အဆင့်ဖြင့် လုံခြုံစွာသိမ်းဆည်းပေးထားမယ်လို့ သိရပါတယ်။
အခုလို မွေးစာရင်း ထုတ်ပေးတာဟာ နိုင်ငံသား ဖြစ်ခြင်း မဖြစ်ခြင်းနဲ့ အကျုံးမဝင်ဘဲ ပြည်ပနိုင်ငံမှာ မွေးဖွားကြောင်း ကို အသိမှတ်ပြုခြင်း သာ ဖြစ်တယ်လို့ ဆိုပါတယ်။
ဒါကြောင့် ကလေးငယ်ရဲ့ နိုင်ငံသားဖြစ်ခြင်းမဖြစ်ခြင်းမှာ ထိုကလေးငယ် အရွယ်ရောက်ရှိ ၍ နိုင်ငံသားစိစစ်ရေးကတ်ပြား လျှောက်ထားချိန် မှာ တည်ရှိမယ့် တည်ဆဲနိုင်ငံသား ဥပဒေ နဲ့သာ ဆုံးဖြတ်ပေးမယ်လို့ သိရပါတယ်။
မွေးစာရင်း လက်မှတ် ထုတ်ပေးခြင်း လုပ်ငန်း အတွက် အမေရိကန်ဒေါ်လာ ၁၀ ဒေါ်လာ သို့မဟုတ် ၎င်းငွေကြေး ပမာဏ နဲ့ ညီမျှတဲ့ သက်ဆိုင်ရာ နိုင်ငံရဲ့ ငွေကြေးကို ဝန်ဆောင်စရိတ် အဖြစ်သတ်မှတ် ကောက်ယူမှာဖြစ်ပြီး ၎င်း စရိတ် ကို NUG-MOHAI ရဲ့ နွေဦးတော်လှန်ရေး လုပ်ငန်းစဉ်မှာ ထိရောက်စွာသုံးစွဲ သွားမယ်လို့ ဆိုပါတယ်။
ဝန်ဆောင်စရိတ် ၁၀ဒေါ်လာ သို့မဟုတ် ၎င်းငွေကြေးပမာဏ နဲ့ ညီမျှတဲ့ သက်ဆိုင်ရာနိုင်ငံရဲ့ ငွေကြေး ပေးသွင်းဖို့ အခက်ခဲရှိသူတွေ အနေနဲ့ လည်း အကျိုးကြောင်းဖော်ပြကာလျှောက်ထားနိုင်တယ်လို့ သိရပါတယ်။
