ပြည်ပကနေပြန်လည်ဝင်ရောက်လာတဲ့ အလုပ်သမား တွေကို ကျွမ်းကျင်မှုအလိုက်ပြည်တွင်းမှာအလုပ်ရရှိရန်ချိတ်ဆက်ဆောင်ရွက်ပေးနေ တယ်လို့ စစ်ကောင်စီ အလုပ်သမားဝန်ကြီးဌာနကနေအသိပေးထုတ်ပြန်ထားပါတယ်။
ဒါဟာ အလုပ်သမားဝန်ကြီးဌာနမှ အမေရိကန်အစိုးရရဲ့ ၂၀၂၄ ခုနှစ်၊ လူကုန်ကူးမှုတိုက်ဖျက်ရေးဆိုင်ရာအစီရင်ခံစာပါအကြံပြုချက်များနဲ့ပတ်သက်ပြီး ၂ဝ၂၅ ခုနှစ်၊ ဇန်နဝါရီလအတွင်း အကောင်အထည်ဖော်ဆောင်ရွက်နေမှုအခြေအနေကို အသိပေးထုတ်ပြန်ဖော်ပြတာလို့ဆိုပါတယ်။
အလုပ်သမားဝန်ကြီးဌာနရဲ့ထုတ်ပြန်ချက်မှာတော့အိမ်နီးချင်း ထိုင်းနိုင်ငံမှာအကြောင်းအမျိုးမျိုးကြောင့်ဖမ်းဆီးခံရတဲ့ မြန်မာအလုပ်သမားများကို တရားဝင်ပြန်လည်လွှဲပြောင်းပေးခြင်းကိစ္စရပ်တွေကိုလည်း သက်ဆိုင်ရာနယ်စပ်ဂိတ်များတွင် ကော်မတီများဖွဲ့စည်းကာ ပြန်လည်ကြိုဆိုလက်ခံလျက်ရှိရာ ၂၀၂၅ ခုနှစ်၊ ဇန်နဝါရီလအတွင်း အမျိုးသား (၁၂၇)ဦး၊အမျိုးသမီး(၂၇)ဦး(စုစုပေါင်း ၁၅၄ ဦး)ကို ပြန်လည်ကြိုဆိုလက်ခံခဲ့တယ်လို့လည်း ထုတ်ပြန်ချက်မှာဖော်ပြအသိပေးထားပါတယ်။
ပြည်ပမှ ပြန်လည်ဝင်ရောက်လာတဲ့ အလုပ်သမားများအနေနဲ့ နေပြည်တော်အပါအဝင် တိုင်းနှင့် ပြည်နယ်(၁၅)ခုရှိ အလုပ်အကိုင်နဲ့ အလုပ်သမားရှာဖွေရေးရုံးများတွင် အလုပ်သမားမှတ်ပုံတင်နိုင်တယ်လို့ထုတ်ပြန်ချက်မှာရေးသားဖော်ပြထားပါတယ်။
အဲ့ဒီ့ အလုပ်သမားမှတ်ပုံတင်ထားသူတွေအတွက် အလုပ်အကိုင်နဲ့အလုပ်သမားရှာဖွေရေးရုံးများက အလုပ်ရှင်များထံမှ အမှာစာများလက်ခံကာ၎င်းတို့ရဲ့ကျွမ်းကျင်မှုအလိုက်အလုပ်ရရှိရန် ချိတ်ဆက်ဆောင်ရွက်ပေးနေတယ်လို့ဆိုပါတယ်။
"အခုပြည်တွင်းကအလုပ်သမားဝန်ကြီးဌာနက ပြည်ပမှာအလုပ်လုပ်ပြီး ပြည်တွင်းကိုပြန်ဝင်လာသူတွေကို ချိတ်ဆက်ပြီးအလုပ်ရှာပေးနေတယ်ဆိုတော့ နည်းနည်းတော့ရီစရာလိုဖြစ်နေတာပေါ့။တကယ်ရှာပေးမပေးတော့သေချာမသိဘူးပေါ့။ရှာပေးချင်လည်းပေးမှာပေါ့။ ပြည်တွင်းမှာက အလုပ်အကိုင်ရှားပါးတာနဲ့ နိုင်ငံရေးအခြေအနေတွေကြောင့် ပြည်ပထွက်ပြီးအလုပ်လုပ်နေကြတာကို။ပြည်တွင်းမှာပြန်အလုပ်ချိတ်ပေးတယ်ဆိုတော့ ဘယ်လိုလုပ်ငန်းမျိုးတွေမှာအလုပ်ပြန်ပေးလဲစသဖြင့်မေးခွန်းထုတ်ရမှာပါပဲ။ ကိုယ်တွေဆိုလည်းပြီးခဲ့တဲ့လကမှ ပြည်ပကနေပြန်ဝင်လာတာ ဒီကအသက်ကန့်သတ်ချက်နဲ့ဆိုတော့ဝင်သာလာတာပြန်ထွက်ဖို့ကမလွယ်သလိုဖြစ်နေပြီ သူတို့ပြောထားတဲ့ အလုပ်အကိုင်ရုံးတွေမှာဖောင်တင်ဖို့ကတော့မရဲဘူး၊ အသက်ကန့်သတ်ချက်နဲ့ညီတယ်ဆိုပြီးစစ်မှုထမ်းခိုင်းပြီးလစာပေးအလုပ်ခန့်လိုက်ရင်မလွယ်ပါဘူး"လို့ ဒူဘိုင်းမှ ပြန်ရောက်လာတဲ့ အမျိုးသားတစ်ဦးကပြောပါတယ်။
ပြည်ပမှပြန်လာတဲ့အလုပ်သမားတွေအနေနဲ့လည်း လက်ရှိ ပြည်ပထွက်ခွာခွင့် အသက်ကန့်သတ်ချက်တွေနဲ့ တားမြစ်ချက်တွေကြောင့် ပြည်ပကိုပြန်လည်ထွက်ခွာရန် မလွယ်ကူတော့ကြောင်းပြောဆိုမှုတွေရှိနေပါတယ်။
အိမ်နီးချင်းတိုင်းပြည်တွေကို ပြည်ပထွက်ခွာခွင့်အထောက်အထားတွေမရှိပဲသွားရောက်ရာမှာ တစ်ဖက်နိုင်ငံတွင်ဖမ်းဆီးခံရကာ မြန်မာနိုင်ငံကိုပြန်လည်လွှဲပြောင်းပေးတဲ့ မြန်မာအလုပ်သမားတွေကို စစ်ကောင်စီအနေနဲ့ စစ်မှုထမ်းရာနေရာတွေကိုပို့ဆောင်ပေးနေတယ်လို့လည်း လူထုကြားမှာ အသံများပေါ်ထွက်မှုတွေလည်းရှိနေပါတယ်။
