စစ်မှုထမ်းဥပဒေကိုစတင်ကျင့်သုံးမယ်လို့စစ်ကောင်စီကကြေညာပြီးနောက်ပြီးမှာပြည်ပထွက်ခွာလိုသူပိုမိုများပြားလာတာကြောင့်သံရုံးတွေကလည်းပြည်ဝင်ခွင့်ဗီဇာလျှောက်ထားရာမှာကန့်သတ်မှုတွေစတင်လုပ်ဆောင်လာပါတယ်။
ပြည်တွင်းကနေသွားလာမှုအများဆုံးဖြစ်တဲ့ထိုင်းနိုင်ငံဟာပြည်ဝင်ခွင့်ဗီဇာလျှောက်ထားရာမှာကန့်သတ်တာတွေစတင်လုပ်ဆောင်လာတာဖြစ်ပြီးမကြာသေးခင်ကလည်း ဂျပန်သံရုံးကလည်းဗီဇာလျှောက်ထားတာနဲ့ပတ်သက်ပြီးသတင်းအချက်အလက်တွေထုတ်ပြန်ကြေညာခဲ့ပါတယ်။
“ဒီကလူတွေကသင်္ကြန်မတိုင်ခင်ပြည်တွင်းကနေထွက်ခွာချင်နေကြတာ။ထိုင်းသံရုံးတုန်းကလည်း သတင်းတွေလိုင်းပေါ်တက်လာတာလူတန်းကြီးကမတရားပဲ။အခုကသင်္ကြန်ပြီးရင်စစ်မှုထမ်းဖို့လူခေါ် မယ်လည်းပြောထားတော့လူတွေစိတ်ပူကြတာပေါ့။အဲဒါကြောင့်ပြည်ပထွက်ချင်တဲ့သူအရမ်းများလာတာ”လို့ပညာရေးဝန်ဆောင်မှုလုပ်ငန်းလုပ်ကိုင်သူတစ်ဦးကပြောပါတယ်။
လက်ရှိမှာထိုင်းသံရုံးကလည်းလူကိုယ်တိုင်တန်းစီစနစ်နဲ့ဗီဇာယူတဲ့စနစ်ကိုဖျက်သိမ်းပြီး Visa Appointment Booking Online (VABO)စနစ်ကို အသုံးပြုပြီးအွန်လိုင်းကနေဗီဇာရက်ချိန်းရယူတဲ့စနစ် ကိုပြောင်းလဲကျင့်သုံးနေတာပဲဖြစ်ပါတယ်။ယခင်ကဗီဇာလက်ခံရာမှာတစ်ရက်ကိုလူ(၂၀၀)သာလက်ခံခဲ့ပေမယ့်လက်ရှိမှာတော့တစ်ရက်ကိုယခင်လက်ခံထားသူတွေအပါလူဦးရေ (၄၀၀)အထိလက်ခံပေးမယ် လို့သိရပါတယ်။
ဒါ့အပြင်ဂျပန်သံရုံးကလည်းပြည်ဝင်ခွင့်ဗီဇာလျှောက်ထားတာနဲ့ပတ်သက်ပြီးလက်ရှိမှာလျှောက်ထားမှုအလွန်များပြားနေတာကြောင့်တယ်လီဖုန်းနဲ့ရက်ချိန်းရယူတဲ့စနစ်ကိုခေတ္တရပ်နားတယ်လို့သတင်းထုတ်ပြန်ထားပါတယ်။လက်ရှိမှာအီးမေးလ်နဲ့သာလက်ခံဆောင်ရွက်မယ်လို့ဖော်ပြထားပြီးလူအရေအတွက်ကန့် သတ်တာတော့မရှိသေးပါဘူး။
ဒါ့အပြင်ပြည်တွင်းကနေတရုတ်နိုင်ငံတွင်းကိုလည်းတစ်ပတ်ကတ်နဲ့ဝင်ရောက်လုပ်ကိုင်သူအများအပြားရှိနေပြီးကန့်သတ်ခံရတာတွေလည်းရှိနေတယ်လို့သိရပါတယ်။
စစ်မှုထမ်းဥပဒေထုတ်ပြန်ပြီးတဲ့နောက်မှာပြည်တွင်းကနေထွက်ခွာလိုသူများပြားလာတာဖြစ်ပြီးငွေကြေးတက်နိုင်သူတွေကလည်းတရားဝင်လမ်းကြောင်းကထွက်ခွာကြပြီးငွေကြေးမတက်နိုင်သူတွေကလည်းနီးစပ်ရာထိုင်းနိုင်ငံကိုတရားမဝင်သွားရောက်နေကြပါတယ်။
