ပြည်ပ ကို တရားဝင် သွားရောက် အလုပ်လုပ်တဲ့ အလုပ်သမားတွေရဲ့ ကိုယ်ရေးအချက်အလက် တွေကို အလုပ်သမားဝန်ကြီးဌာန ထံ ကို gmail ကတစ်ဆင့် ဇူလိုင် ၁၅ရက် နေ့ မတိုင်မီပို့ပေးဖို့ လိုင်စင်ရအေဂျင်စီ တွေ ထံ အကြောင်းကြားထားတယ်လို့ သိရပါတယ်။
၂၀၂၃ ခုနှစ် ဧပြီလ ကနေ ဒီဇင်ဘာအထိ စေလွှတ်ခဲ့ တဲ့ အလုပ်သမား တွေရဲ့ ကိုယ်ရေးအချက်အလက် တွေကို ပို့ဆောင်ပေးခဲ့တဲ့ အေဂျင်စီ တွေ မှ စာရင်းပြုစုပြီး အလုပ်သမားဝန်ကြီးထံ ကို ပေးပို့ရတာ ဖြစ်တယ်လို့ ဆိုပါတယ်။
"ပြည်ပကို ထွက်သွားတဲ့ ကိုယ်ရေးအချက်အလက် တွေကို စပေးရတာ က ၂၀၂၃ စက်တင်ဘာလောက်ကနေ ပေးရတာ အဲ့တုန်းက ပေးရတာလဲ အလုပ်သမားရဲ့ နာမည်နဲ့ပတ်စပို့နံပတ်လောက်ပဲ အခုက ကိုယ်ရေးအချက်အလက် အသေးစိတ်ကိုပို့ပေးရတာ ၂၀၂၄ခုနှစ် အတွင်း မှာတော့ လစဉ်ပို့ပေးနေရတယ်၊ အခု တောင်းတာက ၂၀၂၃ခုနှစ်က စေလွှတ်ခဲ့တဲ့ အလုပ်သမားစာရင်းတွေ ကိုတောင်းတာ"လို့ လိုင်စင်ရ အေဂျင်စီ တစ်ခု မှ တာဝန်ရှိသူတစ်ဦးကပြောပါတယ်။
လိုင်စင်ရအေဂျင်စီ တွေ အနေနဲ့ နိုင်ငံအလိုက် မိမိတို့ စေလွှတ်ခဲ့တဲ့ အလုပ်သမားတစ်ဦးချင်းစီရဲ့ နာမည်၊အဖေနာမည်၊ မှတ်ပုံတင်နံပတ်၊ မွေးသက္ကရာဇ်၊ နိုင်ငံကူးလက်မှတ်နံပတ်၊ ပြည်တွင်းနေရပ်လိပ်စာ၊ ပြည်ပကို သွားရောက်တဲ့ နေ့စွဲ၊ ပြည်ပမှာ အလုပ် လုပ်နေတဲ့ အလုပ်အကိုင် နဲ့ နေရပ်လိပ်စာ စတာတွေ ကို စာရင်းပြုစုပြီး အလုပ်သမားဝန်ကြီးဌာနကို ပေးပို့ရတယ်လို့ ဆိုပါတယ်။
၂၀၂၃ခုနှစ် ဧပြီလ မှ ဒီဇင်ဘာအထိ စေလွှတ်ခဲ့တဲ့ အလုပ်သမား တွေရဲ့ ကိုယ်ရေးအချက်အလက် တွေ ပေးပို့ဖို့ ကျန်ရှိနေတဲ့ လိုင်စင်ရအေဂျင်စီ ၃၈၀ကျော်ရှိကာ ၎င်းတို့ကို ဇူလိုင် ၁၅ရက် မတိုင်မီပေးပို့ဖို့ အလုပ်သမားဝန်ကြီးဌာနက အကြောင်းကြားထားတယ်လို့ သိရပါတယ်။
