ပြည်ပ နိုင်ငံ တွေ ကို တရားဝင် သွားရောက် အလုပ်လုပ်မယ့် အလုပ်သမားတွေ အတွက် စစ်ကောင်စီက မူဝါဒတွေ တိုးမြှင့် သက်မှတ်လိုက်တာတွေကြောင့် ပြည်ပကနေ ခွင့်ဖြင့် ပြန်လာတဲ့ လုပ်သား တွေဟာ အချိန်မီ လုပ်ငန်းခွင်ကို ပြန်မဝင်ရောက် နိုင်မှာကို စိုးရိမ်လျက်ရှိနေတယ်လို့ ခွင့်ပြန်လုပ်သားတွေထံကသိရပါတယ်။
ပြည်ပ ထွက် အလုပ်လုပ်မယ့်သူတွေ အတွက် မရှိမဖြစ်လိုအပ်တဲ့ ပြည်ပအလုပ်အကိုင်သက်သေခံ OWIC ကတ် ပြုလုပ်ပေးတာကို ဖေဖေါ်ဝါရီ လဒုတိယအပတ်က ကြိုတင်အကြောင်းကြားမှု မရှိဘဲ ပိတ်လိုက်တဲ့ အတွက် ခွင့်ပြန်လုပ်သားတွေအပါအဝင် တရားဝင် ပြည်ပထွက်အလုပ်လုပ်မယ့် အလုပ်သမားတွေ အနေနဲ့ အခက်ခဲ နစ်နာမှုတွေ ဖြစ်ပေါ်ခဲ့ပါတယ်။
OWIC ကတ် ပြုလုပ်မှုကို မတ်လ၂၀ရက် မှာ ပြန်လည်ရိုက်ခွင့်ပေးမယ်လို့ ကြေညာခဲ့ပေမယ့် OWIC ကတ် ပြုလုပ်ခွင့်လျှောက်ထားမှု ကို ယခင်က မရမ်းကုန်း၈မိုင်ရှိ အလုပ်သမားရုံးမှာ နေ့ချင်းပြီး ပြုလုပ်ပေးပေမယ့် လက်တလော ပြောင်းလဲ သတ်မှတ်ချက်အရ OWICကတ်ပြုလုပ်ရန် လျှောက်ထားချက်ကို စာတိုက်ကနေတစ်ဆင့် နေပြည်တော်ရှိ အလုပ်သမားရုံးချုပ် ကို လျှောက်ထားရမှာဖြစ်ပြီး ပြုလုပ်ခွင့်ရရှိမှ မြောက်ဒဂုံ အလုပ်သမားသင်တန်းကျောင်း မှာ ထုတ်ယူရမယ်လို့ ထုတ်ပြန်ထားပါတယ်။
" မတ်လကုန် ကို ပြန်ဖို့ ပြင်ထားတာ အခုက OWIC ကတ် ပြုလုပ်တာတွေ နဲ့ ပြည်ပ ထွက်ခွင့်တွေ တောင်းရမယ်ဆိုတော့ ဧပြီလ ပထမအပတ်ကို လေယာဉ်လက်မှတ် ချိန်းလိုက်တယ် OWICကတ် ကို မတ်လ ၁၉ရက်က တင်ထားတာ အခုထိနာမည်စာရင်းမပါသေးဘူး ခွင့်ယူထားတာလည်းတစ်လကျော်ပြီ စက်ရုံဘက်ကလည်း နောက်ထပ်ခွင့်ယူမယ်ဆိုရင် သူဌေးဘက်ကလည်းပြောလာတော့မယ် အချိန်မီ လုပ်ငန်းခွင် ပြန်ရောက်ပါစေဆုတောင်းနေရတယ်""လို့ မလေးရှားမှခွင့်ဖြင့်ပြန် လုပ်သားတစ်ဦးကပြောပါတယ်။
အခုလိုပြည်ပထွက်ခွာမယ့် လုပ်သားတွေအပေါ် စစ်ကောင်စီရဲ့ မူဝါဒ ပြောင်းလဲ သတ်မှတ်ချက်တွေကြောင့် ခွင့်ပြန် အလုပ်သမားတွေအပါအဝင် ပြည်ပထွက်ခွာမယ့် အလုပ်သမားတွေ ဟာ အချိန်မီ လုပ်ငန်းခွင် ပြန်မရောက်မှာစိုးရိမ်ပြီး ကြိုတင် လျှောက်ထားတာတွေကြောင့် အလုပ်သမားဝန်ကြီးဌာနလက်အောက်ရှိ ရုံးဝန်ထမ်းတွေ အနေနဲ့ မနိုင်မနင်းတွေ ဖြစ်ပေါ်လျက်ရှိတယ်လို့ သိရပါတယ်။
""သူတို့က တနေ့တမျိုး စည်းကမ်း သတ်မှတ်ချက်တွေ ထုတ်နေတော့ လုပ်သားတွေက ပြည်ပထွက်ခွင့် မရမှာ စိုးရိမ်ပြီး အီးမေးပို့တာတွေ စာတိုက်က ပို့တာတွေ ကြိုလုပ်လာကြတယ် အဲ့တော့ ဝန်ကြီးဌာန ဘက်က ဝန်ထမ်းတွေ မနိုင်မနင်းတွေ ဖြစ်ပြီး ပြုလုပ်ခွင့် ပြန်ချပေးတဲ့ စာတွေ မှာဆို Male နဲ့ Female မှားတာတွေ date တွေ ခုနှစ်တွေ မှားတာတွေ အများကြီး အခုလိုမှားတာက အလုပ်သမားတွေ လေဆိပ် ရောက်လို့ အဲ့က စစ်ဆေးတဲ့ လူကြီးတွေကို ပြောလို့ရရင်တော်သေးတယ် ပြောလို့မရရင် ကြားထဲက အလုပ်သမားကနစ်နာအုံးမယ်"လို့အေဂျင်စီ အသိုင်းဝိုင်းနဲ့ နီးစပ်သူတစ်ဦးကပြောပါတယ်။
ပြည်ပထွက်ခွာခွင့်ပြုချက်ကို လည်း Gmail ကနေတစ်ဆင့် တောင်းရာမှာလည်း ခွင့်ပြုချက် တောင်းခံသူ အလွန်များ တဲ့ အတွက် ထွက်ခွာမယ့် ရက်ထက် နှစ်ပတ်ထက်စော ပြီး ခွင့်ပြုချက်မတောင်းဖို့ စစ်ကောင်စီရဲ့ အလုပ်သမားဝန်ကြီးဌာနက ကြေညာထားပါတယ်။
