ရန်ကုန်တိုင်းဒေသကြီးတွင် ပြည်တွင်း လုပ်သား ၄၀၀၀ ခန့်ကို အလုပ်အကိုင်ပေးနိုင်မယ့် နိုင်ငံခြားရင်းနှီးမြုပ်နှံမှု ၄ခုကို ခွင့်ပြုလိုက်တယ်လို့ စစ်ကော်မရှင် လက်အောက်ခံရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီ YRICရဲ့ ထုတ်ပြန်ချက်အရသိရပါတယ်။
ကော်မတီရဲ့ (၁၀/၂၀၂၅)ကြိမ်မြောက် အစည်းအဝေးမှာ ထုတ်လုပ်မှုကဏ္ဍ အတွက် ၎င်း ရင်းနှီးမြှုပ်နှံမှု လုပ်ငန်းသစ် ၄ ခုကို အတည်ပြုပေးခဲ့တယ်လို့ ဆိုပါတယ်။
အတည်ပြုပေးခဲ့တဲ့ လုပ်ငန်းတွေမှာ CMP စနစ်ဖြင့် Wearing Apparel အမျိုးမျိုးနဲ့ အဝတ်အထည် အမျိုးမျိုးချုပ်လုပ်ခြင်းလုပ်ငန်းများဖြစ်တယ်လို့ သိရပါတယ်။
၎င်းရင်းနှီးမြှုပ်နှံမှုလုပ်ငန်းသစ် ၄ ခုရဲ့ မတည်ရင်းနှီးငွေ ပမာဏအနေနဲ့ အမေရိကန်ဒေါ်လာ ၅ ဒသမ ၁၉၆ သန်းဖြစ်ပြီး ပြည်တွင်းအလုပ်အကိုင်အခွင့်အလမ်း ၃,၆၉၅ ဦးအတွက် အလုပ်အကိုင် ဖန်တီးပေးနိုင်တယ်လို့ YRIC က ထုတ်ပြန်ထားပါတယ်။
၎င်း အစည်းအဝေး တွင် ရင်းနှီးမြှုပ်နှံမှုပမာဏ တိုးမြှင့်မယ့် လုပ်ငန်းတစ်ခုအပါအဝင် အထွေထွေ ကိစ္စရပ်များတင်ပြလာတဲ့ ကုမ္ပဏီ ၁၀ ခု၏ တင်ပြချက်တွေကိုပါ ဆွေးနွေးဆုံးဖြတ်ခဲ့တယ်လို့ အသိပေးထားပါတယ်။
ရန်ကုန်တိုင်းဒေသကြီး တွင် စက်မှုဇုန် ၂၉ဇုန်ရှိပြီး လက်ရှိကာလ တွင် ပြည်တွင်း လုပ်ခလစာရရှိမှုနှင့် စားဝတ်နေရေး ကုန်ကျစရိတ် မှာ လောက်ငှ မှုမရှိတာကြောင့် လုပ်သားအများစု ဟာ ပြည်ပသို့ သွားရောက်အလုပ်လုပ်ကိုင်ကျတဲ့အတွက် စက်ရုံ အများစု တွင် ကျွမ်းကျင် လုပ်သားရှားပါးမှုနဲ့ရင်ဆိုင်နေရတယ်လို့သိရပါတယ်။
