အိမ်ရာချေးငွေထုတ်ပေးရာမှာ ချေးငွေစည်းကမ်းပျက်ကွက်မှုနဲ့ရိုးမဘဏ်၊ ဧရာ၀တီဘဏ်အပါအဝင်ဘဏ်၇ခုနဲ့အတူ ဗဟိုဘဏ်တာဝန်ရှိသူများကို အရေးယူမယ်လို့ စစ်ကောင်စီကထုတ်ပြန်ကြေညာလိုက်ပါတယ်။
"ဘဏ်ရဲ့လုပ်ငန်းစဥ်ဆိုရင်တော့ အကုန်ပါမှာပဲ။ ဗဟိုဘဏ်တာဝန်ရှိသူတွေပါပါမှာပေါ့"လို့ စီးပွားရေးလုပ်ငန်းရှင်တစ်ဦးက မှတ်ချက်ပြုပါတယ်။
အရေးယူခံရမဲ့ ပုဂ္ဂလိကဘဏ် ၇ ခုမှာ UAB ဘဏ်၊ ရိုးမဘဏ်၊ ဧရာဝတီဘဏ်၊ မြန်မာနိုင်ငံသားများဘဏ်၊ အသေးစားနှင့် အလတ်စားလုပ်ငန်းများဖွံဖြိုးရေးဘဏ်၊ မြန်မာမက်ထရိုဘဏ်၊ ဆောက်လုပ်ရေးအိမ်ရာဘဏ်စတဲ့ ဘဏ် ၇ ခုကို အရေးယူမှာဖြစ်တယ်လို့ ဇူလိုင် ၁ ရက်ညပိုင်းမှာ စစ်ကောင်စီက ဆက်လက်ထုတ်ပြန်လာပါတယ်။
အဆိုပါပုဂ္ဂလိကဘဏ် ၇ ခုဟာ အိမ်ရာချေးငွေများကို များစွာ ထုတ်ချေးလျက်ရှိရာမှာ ဗဟိုဘဏ်သတ်မှတ် ရာခိုင်နှုန်းထက် ကျော်လွန် ထုတ်ချေးထားတာကြောင့် အရေးသွားမှာဖြစ်တယ်လို့ စစ်ကောင်စီက ဆိုထားပြီး အိမ်ရာချေးငွေများကို ဗဟိုဘဏ်သတ်မှတ်ရာခိုင်နှုန်းထက် ပို၍ ထုတ်ချေးခဲ့သော ပုဂ္ဂလိက ဘဏ် ၇ ခုမှ တာဝန်ရှိသူများနှင့်အတူ စစ်ကောင်စီလက်အောက်ခံ မြန်မာနိုင်ငံတော် ဗဟိုဘဏ်မှ တာဝန်ရှိသူများကိုလည်း အရေးယူသွားမယ်လို့ စစ်ကောင်စီ၏ ကြေညာချက်တွင် ထည့်သွင်းထားပါတယ်။
ကြေညာချက်တွင် ပါဝင်တဲ့ ဘဏ် ၇ ခုကို ငွေရေးကြေးရေးအဖွဲ့အစည်းများဥပဒေ ပုဒ်မ ၁၅၄ ဖြင့် အရေးယူမှာဖြစ်ပြီး ထိရောက်တဲ့ ဒဏ်ကြေးကိုပါတောင်းမှာဖြစ်တယ်လို့ ဖော်ပြထားပါတယ်။
